Վրաստանի Նախագահ Սալոմէ Զուրապիշվիլիի Պաշտօնական Այցելութիւնը՝ Հայաստան

ԵՐԵՒԱՆ․- Վրաստանի նախագահ Սալոմէ Զուրապիշվիլի կատարեց առաջին պաշտօանական այցելութիւնը Հայաստան։
Հայաստանի նախագահ Արմէն Սարգսեան ողջունեց Վրաստանի նախագահը: Ան նշեց, որ երկու ժողովուրդներու պատմութիւնը այսօր համատեղուած է անոնց ունեցած ապագայի ներուժով:

Հայաստանի նախագահ Արմէն Սարգսեան եւ Երեւանի մէջ տեղի ունեցած հանդիպումի ընթացքին քննարկեցին շրջանային տագնապներու խաղաղ լուծման վերաբերող հարցեր:

«Համակարծիք էինք, որ հիմնահարցերը եւ տագնապները նոյնական չեն, հետեւաբար նոյնական չեն նաեւ անոնց լուծման հիմքերը: Իմ անձնական համոզումով` լուծումները պէտք է փնտռել բացառապէս խաղաղ ճամբով` միջազգային իրաւունքի եւ օրէնքներու, իսկ Արցախի պարագային` ինքնորոշման իրաւունքի յարգանքի հիման վրայ», «Արմէնփրես»-ի հաղորդումով` Երեւանի մէջ Վրաստանի նախագահին հետ հանդիպումէն ետք լրագրողներուն հետ հանդիպման ժամանակ ըսած է Արմէն Սարգսեան:
Վրաստանի նախագահը, իր կարգին յայտնեց, թէ․ «Մենք կ՛ապրինք շրջանի մը մէջ, որուն համար վճռական է կայունութիւնն ու խաղաղութիւնը, որոնք պարտադիր նախապայման են մեր երկու երկիրներու տնտեսութեան զարգացման ու տնտեսական համագործակցութեան խորացման համար: Բազմաթիւ մարտահրաւէրներ կան մեր շրջանին մէջ, որոնց լուծման ուղին խաղաղ ճամբան է` հիմնուած միջազգային իրաւունքի օրէնքներուն վրայ: Այդ ամէնը պէտք է ըլլայ բանակցութիւններու շնորհիւ։ Վրաստանի համար կարեւոր է, որ Վրաստանի տարածք չտեղափոխուի շրջանին մէջ առկայ տագնապը: Մեզի համար շատ կարեւոր է, որ Վրաստանի մէջ ապրող` Հայաստանի ու Ազրպէյճանի քաղաքացիները խաղաղ ըլլան ու համարկուած մեր երկրի մշակոյթին մէջ: Իբրեւ նախագահ` պարտաւոր եմ այնպէս ընել, որ անոնք լիարժէք մասնակից դառնան Վրաստանի տնտեսական ու մշակութային զարգացման»:

Նշենք, թէ Սալոմէ Զուրապիշվիլի Ծիծեռնակաբերդի յուշահամալիրին մէջ յարգանքի տուրք մատուցած է Հայոց ցեղասպանութեան զոհերու յիշատակին:
Վրաստանի նախագահը ծաղիկներ զետեղած է Հայոց ցեղասպանութեան զոհերուն յիշատակը յաւերժացնող անմար կրակին մօտ: Վրաստանի նախագահին կ՛ընկերակցէին Հայաստանի Հանրապետութեան փոխվարչապետ Տիգրան Աւինեան եւ Երեւանի քաղաքապետ Հայկ Մարութեան:

Be the first to comment

Leave a Reply

Your email address will not be published.


*