Պրիւքսէլի Մէջ «Հայատեացութիւն. Պատմական եւ արդի դրսեւորումները» Խորագրով Գիտաժողով


ՊՐԻՒՔՍԷԼ․- Մարտ 6-ին, Եւրոպական խորհրդարանին մէջ իր աշխատանքները սկսաւ «Հայատեացութիւն. պատմական եւ ժամանակակից դրսեւորումներ» նիւթով, Եւրոպայի Հայ դատի գրասենեակին կողմէ եւ Եւրոպական խորհրդարանի երեսփոխանուհի Էլենի Թէոխարուսի (Կիպրոս) աջակցութեամբ կազմակերպուած գիտաժողովը:
Ձեռնարկին իրականացման օժանդակեց նաեւ «Թիւֆէնքեան» հիմնարկը:
Գիտաժողովին կը մասնակցին պատմաբաններ, քաղաքագէտներ, լրագրողներ, մարդկային իրաւանց պաշտպաններ, հանրային գործիչներ եւ ականատեսներ: Հիւրերու շարքին են Թուրքիոյ մէջ մարդկային իրաւանց պաշտպան Ռակըփ Զարաքոլու, Քրաքովի Եակելոնական համալսարանի դասախօս Եակուպ Օսիէցքի, Ալեքսանտր Լափշին, Արցախի մարդկային իրաւանց պաշտպան Արտակ Բեգլարեան եւ նախկին մարդկային իրաւանց պաշտպան եւ իրաւաբան Ռուբէն Մելիքեան:
Գիտաժողովին կը մասնակցէր նաեւ Արցախի Հանրապետութեան Ազգային ժողովի նախագահ Աշոտ Ղուլեան: Ան ողջոյնի խօսքով դիմեց համաժողովի մասնակիցներուն՝ յատկապէս ընդգծելով նման կարեւոր միջոցառման կազմակերպումը Եւրոպական խորհրդարանի շէնքին մէջ՝ իբրեւ կառոյց մը, որ ոչ միայն եւրոպական ընտանիքին մէջ ապրող ժողովուրդներուն, այլ նաեւ ամբողջ աշխարհի համար ժողովրդավարութեան օրինականութեան եւ համերաշխութեան յառաջամարտիկներէն է:
Իր խօսքին մէջ Ղուլեան անդրադարձաւ այլատեացութեան՝ իբրեւ ժամանակակից աշխարհին մէջ մարդկութեան սպառնացող ամենամեծ մարտահրաւէրներէն մէկուն դէմ միասնաբար պայքարելու անհրաժեշտութեան եւ շեշտեց, որ այս ուղղութեամբ յաջողութեան կարելի է հասնիլ, եթէ բոլորը գիտակցին, որ այլատեացութեամբ թունաւորուած հանրութիւնը երբեք չի կրնար հասարակական եւ համամարդկային արժէք ստեղծել:


Թուրքիոյ մէջ մարդկային իրաւանց պաշտպան Ռակըփ Զարաքոլու կը ստանայ յատուկ յուշանուէր մը։ Իր կողքին, Եւրոպայի Հայ դատի յանձնախումբի նախագահ Գասպար Կարապետեան եւ Եւրոպական խորհրդարանի երեսփոխանուհի Էլենի Թէոխարուս

Այնուհետեւ, խօսելով Ատրպէյճանի կողմէ պետական մակարդակով գործադրուող հայատեացութեան քաղաքականութեան մասին՝ Ղուլեան նշեց, որ այդ երեւոյթը հարեւան երկրին մէջ նոր չէ, աւելին, տարիներու ընթացքին դարձած է ատրպէյճանական ինքնութեան անբաժանելի մասը, իսկ չկարգաւորուած հակամարտութեան պայմաններուն մէջ, Ատրպէյճանի իշխանութիւններուն կողմէ կ՛օգտագործուի՝ իբրեւ սեփական ժողովուրդին մոլորեցնելու եւ Արցախի մասին թիւր տեղեկութիւններ տարածելու գործիք։
Գիտաժողովի նիւթը ունի բացառիկ նշանակութիւն, որովհետեւ կարծրատիպերու արգիլումն ու ատելութեան խօսքին դէմ պայքարը պարտադիր պայմաններ են յաջող բանակցութիւններու, երկխօսութիւններու համար, նոյն ժամանակ անոնք հող կը նախապատրաստեն հակամարտութիւններու կայուն եւ խաղաղ լուծման համար:

Be the first to comment

Leave a Reply

Your email address will not be published.


*