Ոչ Եւս Է Հայոց Ցեղասպանութիւնը Վերապրած՝ 104ամեայ Հայկ Արթինը


Միլուոքիի մէջ, Երկուշաբթի Մարտ 4-ին, իր մահկանացուն կնքեց 104 տարեկան Հայկ Արթին Քոճապապեանը։ Ծնած 1914-ին, ան Հայոց Ցեղասպանութիւնը վերապրած հանրածանօթ լուսանկարիչ մըն էր:
Համաշխարային առաջին պատերազմին սկսած օրէն անոր ողբերգութիւնը սկսած է։ Հազիւ չորս գարուններ բոլորած, ականատես եղած է իր մօր առեւանգման, թուրք զինուորներու կողմէ։
Մեծահարուստ ընտանիքի զաւակ, Արթին Հայկ մնաց հօրեղբօր մօտ, ապա գաղթեց Մարսէյ (Ֆրանսա), ապա Պուէնոս Այրէս (Արժանթին) եւ ի վերջոյ տաս տարեկանին՝ Նիւ Եորք:
Ուսանած տարիներուն, Հայկ իր մօտիկ մեծահարուստ ազգականներէն մէկուն մօտ աշխատած է, իբրեւ նպարավաճառ։
Սակայն Հայկ յատուկ սէր ունէր լուսանկարչութեան հանդէպ։ Այլ ազգական մը Նիւ Եորքի սրտին՝ «Թայմ Սքուէր»-ի մէջ լուսանկարիչի խանութ մը ունէր։ Հոն է, որ Հայկ առաջին փորձերը կատարեց։
Ան Ուաշինկթըն փոխադրուեցաւ եւ դարձաւ հանրածանօթ լուսանկարիչ մը։ Նոյնիսկ ան այցելեց Սպիտակ Տուն եւ լուսանկարեց օրուան նախագահ Ֆրանքլին Ռուզվէլթը։
Կարճ ժամանակաշրջան մը Տալաս փոխադրուած, ապա 1954-ին վերջնակապէս Միլուոքի հաստատուած, ան քաղաքի բեղուն շրջաններէն մէկուն մէջ, ունեցաւ իր անձնական գործատեղին։
1977-ին, Հայկ կորսնցուց քառասուն տարուայ իր կողակից Քէրըլայնը։
Հայկ Արթին ունի չորս դուստրեր, 9 թոռնիկներ, 17 ծոռեր եւ մէկ մեծ ծոռ: Անոնք շրջապատած էին, զինք վերջին ժամերուն։
2008-ին, 93 տարեկան հասակին, Հայկ ընտանեկան կարգ մը պարագաներու հետ, այցելած էր Հայաստան։

Be the first to comment

Leave a Reply

Your email address will not be published.


*