ՀԱՐԱՒԻ ԴՐԱՑԻԻՆ ԳՈՐԾՕՆԸ


ՀԱՅՐԵՆԻՔ
Խմբագրական

Հ․Հ․ վարչապետ Նիկոլ Փաշինեանի Իրան այցելութիւնը կատարուեցաւ այն օրերուն երբ կը նշուէր Սումկայիթի ջարդերու 31-ամեակը, իսկ այս խիստ կարեւոր եւ արդիւնաբեր հանդիպումը նաեւ կը կատարուէր՝ զուգադիպութեամբ․․․ Փետրուար 28-ին նշուելիք Սրբոց Վարդանանց տօնի սեմին։

Պատմութեան սլաքը շտապօրէն ետ տանելով․․․ 451 թուականին, այդ օրերու հեթանոս Պարսկաստանի Յազկերտ Բ․ թագաւորը յատուկ հրամանագրով մը հրահանգած էր իր տիրապետութեան տակ գտնուող բոլոր քրիստոնեաներուն, որ ուրանային իրենց կրօնքը եւ ընդունէին զրադաշտականութիւնը։

Հայոց պատմութեան էջերը մանրամասնօրէն մրոտուած են Տղմուտ գետակի ափին մղուած Աւարայրի ճակատամարտին նկարագրականով։

Լեռ ու ձոր կար երկու բանակներուն մարդուժին եւ զինամթերքին միջեւ։ Բարոյական յաղթանակ կերտած՝ Վարդան Մամիկոնեան եւ իր հերոս բանակը մինչեւ արեան վերջին կաթիլ կռուեցան։ Հակառակ ծանր հարուածներուն, մրցակից բանակը ի վերջոյ կրցաւ յաղթական դուրս գալ՝ շնորհիւ թուային գերակայութեան։

Սլաքները ներկայ օրերուն վերադարձնելով, Իրանի իսլամական պետութեան մէջ, հայ գաղութը կը գործէ ամենայն ինքնավարութեամբ եւ ազատութեամբ, վայելելով իրեն ընծայուած դիւրութիւններն ու օժանդակութիւնները։

Դեռ աւելին, նոյնինքն Իրանի իսլամական պետութիւնը այսօր տարիներէ ի վեր գործի լծուած է վերանորոգելու յատկապէս Ատրպատականի մէջ գտնուող տասնեակներով հայկական եկեղեցիներ, կոթողներ եւ կառոյցներ։ Անցնելով Արաքս գետին միւս ափը, այս սրբատեղիները տարածուած են – էին դժբախտաբար – Նախիջեւան, որոնց ճակատագիրը եղաւ ճի՛շտ հակառակը։

Երբ ազերիներ կը քանդէին մշակութային միջազգային ճանաչում վայելող խաչքարեր, լերան դիմացը, Իրանի իսլամական պետութեան մշակոյթի նախարարութեան պաշտօնեաներու ներկայութեամբ եւ հարիւր առ հարիւր պետութեան նիւթական օժանդակութեամբ կը կատարուէին եւ ցայսօր կը շարունակուին հայկական սրբատեղիներու վերանորոգումն ու վերակառուցումը։

Ատրպետականի երբեմնի առաջնորդանիստ Սուրբ Ստեփանոս, կամ պատմութիւն կերտած Սուրբ Թադէի վանքերու հանդէպ ցուցաբերուած գուրգուրանքը բաւարար չէ միայն նշելու համար Հայաստանի հարաւի դրացիին օրինակելի վերաբերմունքը։ Հոս շատ աւելի յիշատակելի է Ծործորի (Մակու քաղաքի մօտակայքը գտնուող այս վանքին մէջ, Յովհաննէս Երզնկացի 14-րդ դարուն գրութիւններ, թարգմանութիւններ եւ աստուածանբանական վերլուծումներ կատարած է) մատրան հանդէպ փափկանկատութիւնը։ Արդարեւ, ջրամբարի տակ գտնուելու վտանգէն դուրս գալու համար, Իրանի իսլամական պետութիւնը առասպելական գումարներ ծախսած էր այդ ամբողջական կառոյցը վիթխարի շինարարական մեքենաներով փոխադրելու մօտակայ ապահով վայր մը, առանց բիծ մը իսկ քանդում յառաջացնելու։

Հայաստանի հանդէպ Իրանի վերաբերմունքը միեւնոյնը եղած է։ Եւ այս գծով պարզ ու յստակ է նախագահ Հասան Ռուհանիի հաստատումը, թէ Իրան միշտ կ՛ուզէ իր դրացիներուն, յատկապէս Հայաստանի հետ ունենալ լաւ յարաբերութիւններ եւ շարունակել զանոնք:

Հարաւի դրացիի գործօնին կարեւորութիւնը նաեւ նշելի է երեք անգամ եւ երեք տարբեր պաշտօններով՝ թէ՛ լրագրող, թէ՛ պատուիրակ եւ թէ՛ վարչապետ Փաշինեանի համար։

Be the first to comment

Leave a Reply

Your email address will not be published.


*