Հ.Յ.Դ. Երիտասարդականի Մասնակցութիւնը Ընկերվարական Երիտասարդներու Միջազգային Միութեան Խորհուրդի Ժողովին


Հ.Յ.Դ. Բիւրոյի երիտասարդական գրասենեակը կը տեղեկացնէ, թէ Փետրուար 21-24-ին,. Թունուզի Սուսա քաղաքի մէջ, տեղի ունեցաւ Ընկերվարական Երիտասարդներու Միջազգային Միութեան Խորհուրդի ժողովը, որուն Հ.Յ.Դ. Երիտասարդականը ներկայացուցին Անահիտ Յակոբեանն (Ֆրանսա) ու Եղիա Թաշճեանը (Լիբանան): Համագումարին մասնակցեցան աւելի քան յիսուն ընկերվարական, յառաջդիմական եւ աշխատաւորական կուսակցութիւններու երիտասարդական կազմակերպութիւններ` ժամանած տարբեր երկիրներէ։
Ժողովի հիմնական թեմաներն էին բնապահպանական եւ ընկերային արդարութեան հարցերը։ Մասնակիցները քննադատեցին մեծ պետութիւններու անտարբերութիւնը վերոյիշեալ հարցերու շուրջ։ Բնապահպանութեան վերաբերեալ ժողովը կոչ ուղղեց աշխարհի երկիրներուն` ջանք գործադրել միացնելու իրենց ճիգերը՝ կանխելու համար բնապահպանական աղէտը:
Մասնակիցները նաեւ պահանջեցին, որ ընկերվարական կուսակցութիւնները բնապահպանութեան հարցը դիտեն որպէս առաջնահերթութիւն, այն ներառելով իրենց քաղաքական եւ ընտրական ծրագրերու մէջ եւ որդեգրեն կայուն զարգացման ծրագրեր։ Նաեւ ընկերային արդարութեան հաստատման հարցը քննուեցաւ, որուն չիրականացումը կը վնասէ աղքատ եւ բանուոր դասակարգերու շահերը:
Խորհուրդի ժողովին, ի շարս այլ հարցերու, քննարկուեցաւ Վենեզուելլայի տագնապը։ Այս գծով, մասնակիցները կոչ ուղղեցին մեծ պետութիւններուն` միջամուխ չըլլալ երկրի ներքին հարցերուն, ինչպէս նաեւ շեշտեցին տագնապի խաղաղ լուծման եւ երկխօսութեան կարեւորութիւնը։
Ժողովը գնահատեց կանանց իրաւունքներու բնագաւառէն ներս արձանագրուած յառաջխաղացքը եւ յայտարարեց, որ ընկերվարութիւնը ամբողջական չէ առանց ժողովրդավարութեան:
Ընկերվարական երիտասարդներու միջազգային միութեան Խորհուրդի ժողովը որդեգրեց բազմաթիւ բանաձեւեր, որոնք կապուած էին բնապահպանական հարցերուն, կանանց իրաւունքներուն եւ ընկերային արդարութեան:
Հ.Յ.Դ. Երիտասարդականի առաջարկած բանաձեւը, որ կը վերաբերէր «Յանցագործութիւնը եւ անոր ազդեցութիւնը բնութեան վրայ» հարցին, միաձայնութեամբ ընդունուեցաւ։ Բանաձեւի մշակման գործին մասնակցեցան Պուլկարիոյ, Պելառուսիոյ եւ Ուքրայինայի երիտասարդական միութիւնները: Բանաձեւին ի նպաստ խօսք առին բազմաթիւ կազմակերպութիւնների ներկայացուցիչներ։
Հ.Յ.Դ. Երիտասարդականի ներկայացուցիչները առանձին հանդիպումներ ունեցան Թունուզի, Պաղեստինի, Ուքրայինայի, Լիբանանի, Իրաքի քրտական եւ այլ երիտասարդական կազմակերպութիւններու ներկայացուցիչներու հետ։ Կողմերը շեշտեցին համագործակցութեան կարեւորութեան եւ շարունակականութեան հարցը:
Ընկերվար երիտասարդներու միջազգային միութիւնը Ընկերվար-Միջազգայնականի երիտասարդական ուղեկից կազմակերպութիւնն է։ Հ.Յ.Դ. Երիտասարդականը լիիրաւ անդամ է։

Be the first to comment

Leave a Reply

Your email address will not be published.


*