ԱՄԵՐԻԿԱՅԻ ՀԱՅ ՄՇԱԿՈՒԹԱՅԻՆ ՄԻՈՒԹԵԱՆ 22-ՐԴ ՆԱՒԱՊՏՈՅՏԸ

Պարպարա Յարութիւնեան

(թարգմանաբար)

 

Օդին մէջ կարծէք կախարդական բան մը կար, երբ 1200 հայերու մասնակցութեամբ «Ռոյըլ Քարիպիըն» ընկերութեան «Ալըր տը Սիզ» շքեղ ու արդիական ամէն տեսակ սարքաւորումներով օժտուած զբօսանաւը ուղղուեցաւ ծովուն բացերը։

Ամերիկայի Հայ Մշակութային Միութեան կազմակերպած 22-րդ տարեկան նաւապտոյտը  Յունուար 20-ին ընթացք առաւ Մայամի, Ֆլորիտա նաւահանգիստէն եւ տեւեց մինչեւ  Յունուար 27։ Անիկա հանգիստի ու ջերմանալու բացառիկ առիթ էր յատկապէս հիւսիսային շրջաններուն մէջ տիրող ցուրտէն եւ ձիւնէն փախուստ տալու ուզողներուն համար։  Նաւը կանգ առաւ Նասօ, Պահամաս, Քոսումէլ, Մեքսիքա, Ռոաթան, Հոնտուրաս եւ Քոսթա Մայա նաւահանգիստներուն մէջ։

Մասնակցող հայորդիները ժամանած էին զանազան երկիրներէ` Արժանթին, Աւստրալիա, Գանատա, Անգլիա, Ֆրանսա, Գերմանիա, Յունաստան, Լիբանան, Ուրուկուէյ, Շուէտ, Զուիցերիա, ինչպէս նաեւ Միացեալ Նահանգներու զանազան նահանգներէն: Իւրաքանչիւր հիւր ստացաւ տոպրակ մը նուէր` կազմակերպիչներուն եւ ճամբորդական ընկերութեան կողմէ։

Ամերիկայի Հայ Մշակութային Միութեան նաւապտոյտին մասնակիցներուն մեծամասնութիւնը կը հաստատէ, որ հիանալի շաբաթ մը անցուցած է։ Արդարեւ, 7 օր շարունակ անոնք վայելած են հաճելի երաժշտութիւն, համեղ ճաշ, հանդիպում ունեցած են հին ընկերներու հետ, ինչպէս նաեւ նոր ընկերութիւններ հաստատած են, հեւքոտ եւ միապաղաղ առօրեայէն դուրս գալով` արեւոտ ու գեղեցիկ պահեր ապրած են, սորված են հայկական մշակոյթը, ժառանգութիւնն ու աւանդութիւնները պահպանել եւ աջակցիլ այս աշխատանքին, նաեւ` լաւ բարեկամութիւններ մշակել։

Ուրախութիւն եւ պատիւ էր այս տարուան նաւապտոյտին վայելել ներկայութիւնը Կիպրոսի հայոց թեմի կաթողիկոսական փոխանորդ Խորէն Արք. Տողրամաճեանի, որ ամէն առաւօտ Ս. Պատարագ մատուցանեց։

Պարահարթակին վրայ օգնութիւն ուզողներուն աջակցեցաւ Մարկօ Քաֆթաճեան, որ սորվեցուց շուրջպար, Թամզարա եւ այլ հայկական պարեր։ Անդրանիկ Պուտագեանի ղեկավարութեամբ տեղի ունեցան պլոթի եւ նարտի մրցումներ։ Մասնակիցներուն տրամադրութեան տակ կար նաեւ ճոխ գրադարան մը, որ օժտուած էր ամէն տեսակ հայկական ապրանքատեսակներով։  Զետեղուած էր յատուկ սեղան մը, ուր Մարօ Ասատուրեան տեղեկութիւններ կը փոխանցէր  Ամերիկայի Հայ Մշակութային Միութեան կազմակերպած դէպի Հայաստան եւ Արցախ շրջապտոյտին մասին, որ տեղի պիտի ունենայ Սեպտեմբեր 19- էն Հոկտեմբեր 3, ինչպէս նաեւ օժանդակելու մասնակիցներուն ընդհանրապէս։

Արեւամուտին եւ աստղերու երեւումին հետ երաժշտութիւնն ու ճոխ մթնոլորտը աւելի տիրական կը դառնային` թէ՛ ունկնդրել, եւ թէ պարել ուզողներուն համար` Յարութ Փամպուքճեանի, Գէորգ Արթինեանի եւ Խաչիկ Ճինկիրեանի հետ։

Առաջին օրուան երեկոյեան բարի գալուստի ընդունելութիւնը տեղի ունեցաւ Մարիա Դաւիթեանի եւ Մարկօ Քաֆթաճեանի կողմէ, որոնք ներկայացուցին շաբթուան ծրագիրը եւ յատուկ նախաձեռնութիւնները։

Տարբեր ծրագիրներ դրուած էին նաւապտոյտի մասնակիցներուն տրամադրութեան տակ. անոնք կրնային պարզապէս ծովը, արեւը եւ լողաւազանը վայելել, մասնակցիլ հայկական գործունէութեան, նաւուն կողմէ կազմակերպուած յայտագիրներ վայլել կամ պարզապէս հանգստանալ։

Երկրորդ օրը բաւական ճոխ էր մթնոլորտը Խաչիկ Ճինկիրեանի եւ «Օլ Սթար Քէֆ Պենտ»-ին  հետ, նաեւ կազմակերպուեցաւ մրցում` Եռագոյնը լաւագոյն ձեւով ներկայացուցած հագուստի։

Յաջորդաբար երկրորդ տարին ըլլալով, տեղի ունեցաւ սեմինար մը, կազմակերպութեամբ բժշկական-ատամնաբուժական-առողջապահական բնագաւառին մէջ մասնագիտացած բժիշկներու, որոնք Հայաստանի մէջ իրենց մասնակցութիւնը բերած են առողջապահական մակարդակի բարելաւման աշխատանքներուն։ Դասախօսութիւններ տրուեցան զանազան մասնագէտ բժիշկներու կողմէ, որոնց կարգին՝ Սամուէլ Պատալեան, Ճոն Պիլէզիկեան եւ Լորենս Նաճարեան։

Ամէնօրեայ դրութեամբ հայկական զանազան նիւթեր ու ծրագիրներ ներկայացուեցան նաւապտոյտի մասնակիցներուն։

– Անահիտ Երէմեան խօսեցաւ Հայաստանի մէջ տիեզերական ճառագայթներու բաժանմունքի գիտական աշխատանքներուն մասին։

– Ճորճ Աղճայեան անդրադարձաւ հայ ընտանիքին արմատներուն։

– Թուրք պատմաբան Թաներ Աքչամ ներկայացում մը կատարեց` «Թալէաթ փաշային հեռագիրն ու Հայոց ցեղասպանութիւնը» գիրքին վրայ հիմնուելով։

– Պարէտ Մարոնեան խօսեցաւ իր ապագայ ծրագիրներուն- ժապաւէններուն մասին, որոնք կը վերաբերին Հայաստանի մէջ 2018-ին տեղի ունեցած ժողովրդային շարժման` «Առանց արեան», «Թայթենիքի սէրը» ժապաւէնին, որուն մէջ անդրադարձ կը կատարուի ընկղմած «Թայթենիք» նաւուն վրայ գտնուած եւ վերապրած հայերուն։

– Իբրեւ գործարար Վալոթ Աթախանեան անդրադարձաւ իր հիմնած սիկարի գործարարութեան, անոր դիմագրաւած մարտահրաւէրներուն։

– Միջերկրականի եւ Յունաստանի մէջ հայութեան ներկայութեան մասին դասախօսեց Կիպրոսի հայոց թեմի կաթողիկոսական փոխանորդ Խորէն արք. Տողրամաճեան։

– Արուեստագէտ Վահէ Պէրպէրեանի մենաներկայացումները մեծ ուրախութիւն ստեղծեցին։

– Հ.Օ.Մ.-ը հովանաւորած էր յատուկ յայտագիր մը, որուն հրաւիրուած էին ՀՕՄ-ականներ եւ բարեկամներ ամբողջ աշխարհէն։

– Սեպտեմբեր 2018-ին Հայաստան կատարուած «Վերադարձ հայրենիք» – 3 ճամբորդութեան վերաբերող ներկայացում մը եղաւ տոքթ. Կերի Զամանիկեանի եւ Տիրուհի Տիանա Թուքմանեանի կողմէ։

– Յատուկ ներկայացումով հանդէս եկաւ Հ.Մ.Ը.Մ.-ը։

 

Ամերիկայի Հայ Մշակութային Միութեան կազմակերպած նաւապտոյտը աշխարհին վրայ միակն է, որ մէկ շաբթուան համար ի մի կը բերէ այսքան հայեր տարբեր երկիրներէ եւ անոնց առիթ կու տայ ապրելու մշակութային, դաստիարակչական , հոգեւոր եւ ընկերային յատուկ փորձառութիւն։ Ան կը հիւրընկալէ անհատներ, կ’ողջունէ բարեսիրական գործունէութիւնը, ազգային եւ միջազգային մակարդակներու վրայ հայութեան շահերուն կը ծառայէ։ Այս նաւապտոյտը կը նկատուի իբրեւ Ամերիկայի Հայ Մշակութային Միութեան յարգուած եւ համբաւ ունեցող ոչ շահաբեր նախաձեռնութիւն։

Այս նաւապտոյտը ներգրաւուած է նախաձեռնութիւններու ու աշխատանքներու մէջ, որոնք կը միտին օգտակար դառնայ հայութեան` Հայաստանի մէջ եւ սփիւռքի։ Միացեալ Նահանգներէն բազմաթիւ կամաւորներ աշխատած են այս ծրագիրի իրականացման համար, ներկայացուած են Եւրոպան, Գանատան, Միացեալ Նահանգներն ու Հարաւային Ամերիկան։

Յառաջիկայ` 23-րդ նաւապտոյտը տեղի պիտի ունենայ Յունուար 2020, 12-19-ին, Մայամիէն։ Միացէք մեզի եւ վայելեցէք հետաքրքրական ծրագիրներ, որոնց պիտի մասնակցին կատակերգակ Քէվ Օրքեան, Ներսիկ ու Արաբօ Իսբիրեաններ եւ Սարինա Քրոս։ Իւրայատուկ փորձառութիւն ապրելու եւ ձեր տեղերը ապահովելու համար կապուեցէք հետեւեալ թիւին  866-447-0750։

 

Մասնակցողներուն կարծիքները

4-րդ անգամն ըլլալով կը մասնակցիմ Ամերիկայի Հայ Մշակութային Միութեան կազմակերպած նաւապտոյտին, ուր հոյակապ պահեր ապրեցայ։ Ամէն մարդ հայերէն կը խօսէր… կարծէք Հայաստան կը գտնուէի։ Դասախօսութիւնները օգտակար էին, մթնոլորտը` բաւական ոճ։ Ապագային անպայման կրկին պիտի մասնակցիմ։

Լիլի Սարգիսեան

Մահուահ, Նիւ Ճըրզի

 

– Տարեդարձիս առիթով այս տարի ծրագրեցի մայր ու դուստր պտոյտի, որպէսզի մօրս հետ իւրայատուկ պահեր անցընեմ, մանաւանդ որ հիմա իւրաքանչիւրս տարբեր քաղաք կ’ապրի։ Որոշեցինք միանալ  Ամերիկայի Հայ Մշակութային Միութեան կազմակերպած 22-րդ տարեկան նաւապտոյտին։ Կրնանք հաստատ ըսել, որ պտոյտը մեր ակնկալութիւններէն շատ աւելին տուաւ մեզի, շատ լաւ փորձառութիւն ապրեցանք, հանդիպեցանք ծանօթ դէմքերու, նոր բարեկամութիւններ հաստատեցինք աշխարհի տարբեր երկիրներէ եկած հայերու հետ, եւ այս բոլորը մեզի տուին անմոռանալի յիշատակներ։

Թինա Թիւմպերեան

Սան Տիակօ, Քալիֆորնիա

 

– Ասիկա 16-րդ անգամն է, որ կը մասնակցիմ Ամերիկայի Հայ Մշակութային Միութեան կազմակերպած նաւապտոյտին` Աւստրալիայէն, Գանատայէն, Լոս Անճելոսէն եւ Պոսթընէն բարեկամներու հետ։ Յոյսով եմ, որ բոլորին կը հանդիպիմ յառաջիկայ տարի կազմակերպուելիք նաւապտոյտին։

 

Աւետիս եւ Սեդա Նաճարեան

Պոսթըն, Մասաչուսէց

– Հիանալի ժամանակ անցուցինք «Ալըր տը Սիզ» նաւուն վրայ։ Այս նաւապտոյտը հիանալի ձեւ է աշխարհի տարբեր ծագերէն եկած հայերու միջեւ կապեր ստեղծելու։ Սիրեցի բոլոր երգիչները, սակայն Յարութ Փամպուքճեանը գագաթնակէտն էր այս նաւապտոյտին։ Նաւուն վրայ կան բազմաթիւ աշխատանքներ ո ծրագիրներ, որոնց կրնաս մասնակցիլ։ Անհամբեր կը սպասենք յառաջիկայ տարուան նաւապտոյտին։

Սիլվա Տեմիրճեան

Նորթվիլ, Միշիկըն

 

Be the first to comment

Leave a Reply

Your email address will not be published.


*