Հ.Յ. Դաշնակցութեան Մտահոգութիւնն Ու Անվերապահ Աջակցութիւնը

ԽԱԺԱԿ ՄԿՐՏԻՉԵԱՆ

Արցախի Հանրապետութեան Անկախութեան հռչակագրով եւ Սահմանադրութեամբ ամրագրուած Անկախ պետականութեան կարգավիճակն ու տարածքային ամբողջականութիւնը անսակարկելի են:
                                                                                                                                                                                                                                                                             Հ.Յ.Դ. 33-րդ Ընդհանուր Ժողով

Հ.Յ. Դաշնակցութեան համար Արցախի հարցը 1988 թուականէն ի վեր եղած է ու կը մնայ օրակարգային առաջին խնդիր: Նոյն թուականին գումարուած Ընդհանուր Ժողովէն ի վեր Արցախը եղած է Հ.Յ.Դ. ռազմավարութիւնն ու մարտավարութիւնը ձեւաւորող կարեւորագոյն առանցքներէն մէկը: Այս փաստը կ’ընդունին Դաշնակցութեան համակրողներն ու հակակրողները: Համակրողները Դաշնակցութեան այս սկզբունքայնութիւնը կը դիտեն, որպէս Արցախի անվտանգութեան ու հարցի հայանպաստ լուծման երաշխիք: Իսկ հակակրողները՝ զայն կը դիտեն իրենց պարտուողական ու զիջողական մօտեցումներուն խոչընդոտող կեցուածք:

Տարբեր չէր կրնար ըլլալ նաեւ Արցախի Հանրապետութեան մայրաքաղաք Ստեփանակերտի մէջ գումարուած Հ.Յ.Դ. 33րդ Ընդհանուր Ժողովը: Այս ժողովը իր վայրի ընտրութեամբ իսկ կ’ընդգծէր Հայ Յեղափոխական Դաշնակցութեան, իր համահայկական կառոյցով, Արցախի կողքին ամուր կանգնած ըլլալու պատգամը: Ժողովը իր այդ պատգամը աւելի ցայտուն կը դարձնէր Ժողովին կողմէ Արցախի հարցով յատուկ յայտարարութեամբ, որուն մէջ Հայ Յեղափոխական Դաշնակցութիւնը յստակ ու բազմակողմանի կը ձեւակերպէր իր դիրքորոշումը Արցախի խնդրին կապակցութեամբ:

Դաշնակցութեան յղած այս պատգամը անարձագանգ չմնաց Արցախի Հանրապետութեան ղեկավարութեան մօտ, որոնք ողջունեցին այն փաստը, ըստ որուն «Աշխարհասփիւռ իր կառոյցով, Հ.Յ. Դաշնակցութիւնը անվերապահ աջակցութիւն կը յայտնէ Արցախի Հանրապետութեան իշխանութիւններուն՝ երկրի սոցիալ-տնտեսական զարգացման, անվտանգութեան և տարածքային ամբողջականութեան ապահովման հարցերով և կը յայտնէ իր պատրաստակամութիւնը՝ շարունակելու այդ յանձնառութիւնը»:

Դաշնակցութեան յանձնառութիւնն ու Արցախի ողջոյնը միացեալ պատգամ մըն էր առաջին հերթին ուղղուած Ատրպէյճանին, հասկցնելու համար, որ Արցախի խնդիրը համայն հայութիւնը միաւորող ու բռունցքող հարց է, ուր մերժուած է «որեւէ փաթեթ, որ «Մատրիտեան Սկզբունքներ»-ու նման չ’երաշխաւորեր Արցախի ինքնորոշման իրաւունքը եւ փուլային տարբերակով, Արցախէն, Հայաստանէն եւ Սփիւռքէն կը պահանջէ կանխաւ ռազմավարական ու հողային զիջումներ կատարել, այնպիսի անորոշ խոստումներու դիմաց, որ պիտի տրուի Ատրպէյճանի ներկայ կամ զինք յաջորդող վարչակարգի մը կողմէ»:

Հ.Յ.Դ. Ընդհանուր Ժողովը մտահոգութիւն յայտնեց վերջին ամիսներուն Արցախի շուրջ բանակցութիւններու աշխուժութեան կապակցութեամբ, որոնց կ’ընկերակցին միջազգային որոշ կողմերուն ցուցաբերած շտապողականութիւնը ու երբեմն ալ ոչ-հայանպաստ մօտեցումներ պարտադրելու ակնարկները: Դաշնակցութեան կամքը արտայայտող այս ժողովին արտայայտած մտահոգութիւնը հասցէագրուած է նախ եւ առաջ Հ.Յ.Դ. աշխարհասփիւռ կառոյցին, որոնցմէ կը պահանջուի կացութիւնը սթափ դատել եւ ողջ հնարաւորութիւնները լարել, որպէսզի կարենան ձախողութեան մատնել հայութեան պարտուողական լուծում պարտադրելու որեւէ փորձ: Այդ ուժերու լարումին մէջ կան քաղաքական ու քարոզչական պատերազմը, Արցախի միաջազգային ճանաչման ուղղուած աշխատանքը եւ Արցախի տնտեսութեան, անվտանգութեան ու պետականութեան ամրապնդման նպաստող ծրագիրները: Ի վերջոյ, մենք իրաւունք չունինք ազատագրական պայքարի արիւնով ու զոհերով ձեռք բերուած յաղթանակը զիջիլ յանուն թուացեալ խաղաղութեան:

Այս բոլորի կողքին, Դաշնակցութեան համար կը շարունակէ հրատապ հարց մնալ «Հայաստանի եւ Արցախի Հանրապետութիւններու միջև ռազմաքաղաքական դաշինքի մասին համաձայնագրի սեղմ ժամկէտներու մէջ կնքումը», որպէսզի ամրագրուի Հայաստանի իշխանութիւններու այն պարտաւորութիւնը, զոր պէտք է ցուցաբերեն միջազգային հարթակներու վրայ, իբրեւ Արցախի անկախութեան եւ անվտանգութեան երաշխաւոր:

Քաղաքական իրավիճակներու լոյսին տակ ձեւակերպուած ՀՅԴ վերոնշեալ սկզբունքներու կողքին, Հ.Յ.Դ. Ընդհանուր Ժողովը անգամ մը եւս վերահաստատեց, որ Արցախի հարցը Դաշնակցութեան համար Հայ Դատի ընդհանուր ծիրի մէկ մասնիկն է եւ ՄիացեալՀայաստանի կերտման այժմէական հանգրուան: Ի վերջոյ, ազգովին պիտի ընկալենք, որ Արցախի ինքնորոշման իրաւունքի միջազգային ճանաչումը` Հայաստանի հետ միաւորման միջանկեալ օղակ մըն է պարզապէս:

 

Be the first to comment

Leave a Reply

Your email address will not be published.


*