Վարչապետ Փաշինեան Ներկայացուց 5-ամեայ Ծրագիրը


ԵՐԵՒԱՆ․- Փետրուար 12-ին, Ազգային ժողովին մէջ Հայաստանի Հանրապետութեան վարչապետ Նիկոլ Փաշինեանը ներկայացուց կառավարութեան ծրագիրը:
«Յառաջիկայ հինգ տարիներուն` Հայաստանի կառավարութեան գործունէութիւնը միտուած պիտի ըլլայ Հայաստանի Հանրապետութեան մէջ բարձր արհեստագիտական, արդիւնաբերական, ինչպէս նաեւ բնապահպանական բարձր չափանիշներուն համապատասխանող, արտահանման միտուած մրցունակ եւ ներառական տնտեսութիւն կառուցելուն», ըսաւ Փաշինեան։
Վարչապետը նշեց, որ կառավարութիւնը կ՛որդեգրէ տնտեսական աճի քաղաքականութիւնը տնտեսական զարգացման քաղաքականութեամբ փոխարինելու ուղեգիծ:
Սփիւռքի մասին անդրադառնալով, ան յայտնեց․ «Մենք պէտք է կարենանք ձեւաւորել եւ ձեւակերպել յստակ հասցէ` արձանագրելու համար, թէ սփիւռքի հետ խօսելու համար մենք որո՛ւն հետ պէտք է խօսինք: Շատ հարցեր կան կառավարութեան, քաղաքական օրակարգին մէջ, երբ կ՛ըսուի, որ այս հարցերը պէտք է քննարկել սփիւռքի հետ, իսկ յստակ որո՞ւ հետ, որովհետեւ սփիւռքը շատ մեծ ծաւալներ ունի եւ շատ ընդգրկուն է: Կան հազարաւոր կազմակերպութիւններ, եւ եթէ ֆիզիքապէս անոնց մէկ մասին հետ կարելի է քննարկել, ապա միւս մասին եւ բոլորին հետ կարելի չէ քննարկել: Հետեւաբար մենք խնդիր ունինք ձեւաւորելու ամբողջ սփիւռքը ներկայացնող ինչ որ ներկայացուցչական կառոյց եւ մենք բոլորս կը հասկնանք, որ սա պիտի ըլլայ չափազանց մեծ մարտահրաւէր եւ լրջագոյն խնդիր, որովհետեւ գիտէք, որ սփիւռքը բազմաշերտ է, շատ բարդ է, այնտեղ կան բազմաթիւ յարաբերութիւններ, հակասութիւններ»:

Be the first to comment

Leave a Reply

Your email address will not be published.


*