«ՀԱՅ ՄԱՄՈՒԼԻ ՏԱՐԻ». ՎԵՀԱՓԱՌԻՆ ՈՒՂԵՐՁԸ ՓԵՏՐՈՒԱՐ 10-ԻՆ ՊԻՏԻ ԿԱՐԴԱՑՈՒԻ ԵԿԵՂԵՑԻՆԵՐՈՒ ՄԷՋ

Մեծի Տանն Կիլիկիոյ Ն.Ս.Օ.Տ.Տ. Արամ Ա. Կաթողիկոսը «Հայ Մամուլի Տարի» հռչակած է 2019 թուականը։ Կիրակի, Փետրուար 10-ին, Ա.Մ.Ն. Արեւելեան շրջանի բարեջան առաջնորդ Գերշ. Տ. Անուշաւան արք. Դանիէլեանի հրահանգով, Վեհափառ Հայրապետի 2019ի ուղերձը պիտի կարդացուի թեմի բոլոր եկեղեցիներուն մէջ՝ Սուրբ Պատարագի ընթացքին։
Այս առթիւ, Ազգային Առաջնորդարանի եկեղեցիներէն ներս Վեհափառ Հայրապետի պատգամը պիտի ընթերցուի Կիրակի, Փետրուար 10-ին, յընթացս Սուրբ Պատարագին։ Յաւարտ Պատարագին հոգեհանգստեան արարողութիւն պիտի կատարուի Հայ մամուլի հին ու նոր բոլոր նուիրեալ աշխատակիցներու հոգիներուն համար։
Նորին Սրբութիւնը կը գրէ, թէ լիբանանահայ մամուլի ներկայացուցիչներու հետ վերջերս տեղի ունեցած հանդիպումէ մը ետք, յարմար նկատած է՝ այս տարի հայ մամուլը մեծարել ։ Ընդունելով հանդերձ, որ արդի ժամանակներուն «մամուլ» հասկացութիւնը աւելի լայն սահմանում մը ստացած է, Կաթողիկոսը կ՚ընդգծէ, որ խօսքը գլխաւորաբար տպագիր մամուլի մասին է՝ օրաթերթեր ու պարբերականներ։ Վեհափառ Հայրապետը տպագիր հաղորդակցութեան հնագոյն ձեւերուն ակնարկ մը նետելէ ետք, կը կեդրոնանայ առաջին հայ թերթին՝ «Ազդարար«ի (Կալկաթա), եւ աշխարհի չորս ծագերուն հայ մամուլի յետագայ աճին վրայ։
Վեհափառ Հայրապետը Կիլիկիոյ Կաթողիկոսութեան իրաւասութեան տակ գտնուող թեմերուն հրահանգած է, որ այս առիթով 2019 թուականի ընթացքին հայ մամուլի պատմութիւնն ու դերը լուսաբանեն տարբեր ձեռնարկներով՝ դասախօսութիւններ, դասախօսական շարքեր, գիտաժողովներ, ցուցահանդէսներ, գիրքերու հրատարակութիւններ, եւ այլն։

 

Be the first to comment

Leave a Reply

Your email address will not be published.


*