Արցախի Մէջ Տնտեսական Աճ Արձանագրուած Է

ՍՏԵՓԱՆԱԿԵՐՏ․- Փետրուար 1-ին, կառավարութեան նիստին Արցախի Հանրապետութեան նախագահ Բակօ Սահակեան ամփոփեց 2018-ի ընկերային – տնտեսական զարգացման արդիւնքները, ինչպէս նաեւ նախանշած է 2019-ին կատարուելիք աշխատանքները` համապատասխան յանձնարարականներ տալով զանոնք պատշաճ կերպով իրագործելու ուղղութեամբ:
Նախագահ Սահակեան ընդգծեց, որ նախորդ տարի, ընդհանուր առմամբ, յաջողած են իրականացնել նախանշուած ծրագիրները եւ ապահոված են տնտեսութեան զարգացումը: Արցախի Հանրապետութեան նախագահը նշեց, որ համախառն ներքին արդիւնքի ցուցանիշը կազմած է շուրջ 303 միլիառ դրամ, ապահովուած է երկնիշ տնտեսական աճ, որուն համար հիմք հանդիսացած են նիւթական արտադրութեան ճիւղերու, մասնաւորապէս` հանքագործական արդիւնաբերութեան եւ ուժանիւթի, ինչպէս նաեւ առեւտուրի եւ ծառայութիւններու մարզերուն մէջ արձանագրուած զարգացումը: Նախագահը դրական նկատեց այն հանգամանքը, որ տարին աւարտած է առանց նիւթական պարտաւորութիւններու արձանագրութեան:
Նախագահ Սահակեանը կարեւոր նուաճումներէն մէկը նկատեց նաեւ այն, որ ելեկտրականութեան արտադրութեան մարզին մէջ ապահովուած է ո՛չ միայն ինքնաբաւութիւն, այլ նաեւ արտահանման կարելիութիւն:
Նախագահը շեշտեց, որ Արցախի Հանրապետութիւնը ընկերային պետութիւն է, եւ ընկերային մարզը մշտապէս առաջնահերթութիւն է երկրի զարգացման օրակարգին մէջ` նշելով, որ պետութիւնը կը շարունակէ տարբեր ծրագիրներ իրականացնել բնակչութեան ընկերային-տնտեսական բարեկեցութեան բարձրացումին ուղղութեամբ` յատուկ ուշադրութիւն սեւեռելով ընկերային առումով խոցելի խաւերու, յատկապէս` զոհուած ազատամարտիկներու եւ զինուորական ծառայութեան մասնակցողներու, բազմազաւակ եւ անապահով ընտանիքներու կեանքի որակի բարելաւումին վրայ:
Անդրադառնալով 2019-ին կատարուելիք աշխատանքներուն` Սահակեան նշած է, որ անհրաժեշտ է հաւանական բոլոր քայլերը առնել` նախատեսուած ծրագիրներուն պատշաճ իրականացման համար` շեշտելով պետական միջոցներու խնայողութեան ու արդիւնաւէտ օգտագործման անհրաժեշտութիւնը:

 

Be the first to comment

Leave a Reply

Your email address will not be published.


*