Եւրոպայի Հայ Դատի Յանձնախումբի Հանդիպումը Հայաստանի Ազգային ժողովի «Եուրոնեսթ»-ի Պատուիրակութեան Հետ

ՊՐԻՒՔՍԷԼ․- Եւրոպայի Հայ Դատի գրասենեակը յատուկ հաղորդագրութեամբ մը, կը տեղեկացնէ, թէ Երեքշաբթի, Յունուար 29-ին, Եւրոպայի Հայ Դատի յանձնախումբի նախագահ Գասպար Կարապետեան եւ գրասենեակի գործադիր տնօրէն Հեղինէ Էվինեան, աշխատանքային հանդիպում մը ունեցան Հայաստանի Հանրապետութեան Ազգային ժողովի «Եուրոնեսթ»-ի պատուիրակութեան անդամներուն եւ պատուիրակութեան նախագահ Մխիթար Հայրապետեանին հետ,  Հայաստանի Հանրապետութեան դեսպանատան մէջ:

Հանդիպումի ընթացքին Հեղինէ Էվինեանը վերահաստատեց գրասենեակին պատրաստակամութիւնը լիովին օժանդակելու Հայաստանի խորհրդարանական պատուիրակութիւններուն, որոնք կը գործուղուին Պրիւքսէլ կամ Սթրազպուրկ, մասնաւորապէս «Եւրոնեսթ» խորհրդարանական վեհաժողովին գալիք պատուիրակութիւններուն:

Առաւօտեան Պրիւքսէլ հասած հայաստանեան պատուիրակութիւնը մասնակցեցաւ Եւրոպական Միութեան Արեւելեան գործընկերութեան «Եուրոնեսթ» խորհրդարանական վեհաժողովին` Եւրոպական խորհրդարանին մէջ:

Ամփոփելով հանդիպումը` Գասպար Կարապետեան ըսաւ. «Եւրոպական խորհրդարանի անդամներէն զատ, «Եուրոնեսթ»-ին մէջ ներկայացուած են Արեւելեան գործընկերութեան դրացի երկիրներու (Մոլտովա, Ուքրայինա, Վրաստան, Հայաստան եւ Ատրպէյճան) խորհրդարաններու անդամները: Բնականաբար, իւրաքանչիւր երկրի պատուիրակութիւն կը փորձէ բանաձեւերը տանիլ հոն, ուր կը նպաստէ իր երկրի քաղաքականութեան: Հայանպաստ բանաձեւեր ստանալու համար շատ կարեւոր է ապահովել յատկապէս Եւրոպական խորհրդարանի անդամներուն աջակցութիւնը: «Եուրոնեսթ»-ի  հիմնադրման առաջին իսկ օրէն աշխուժ ներկայութիւն ըլլալով` Հայ դատի գրասենեակը յատկանշուած է օժանդակութիւն եւ աջակցութիւն բերելով այս գործին: Պատուիրակութեան նոր նշանակուած նախագահ պարոն Հայրապետեանը շնորհաւորելէ ետք, անոր հետ հանդիպման ընթացքին համաձայնեցանք, որ պէտք է պահել Հայաստանի Հանրապետութեան Ազգային ժողով-Հայ Դատի գրասենեակ արդիւնաւէտ փոխադարձ գործակցութեան բարձր մակարդակը, որ կը բխի միայն մեր ժողովուրդի եւ պետութեան շահերէն»:

Be the first to comment

Leave a Reply

Your email address will not be published.


*