ՆԱԽԱՊԱՅՄԱՆՆ Է ՊԱՅՄԱՆԸ․․․

 

ՀԱՅՐԵՆԻՔ

Խմբագրական

Տօնական օրերը, թէեւ կը նշուին երկար օրերու վրայ տարածուող արձակուրդով, սակայն միեւնոյն ժամանակ առիթ կ՛ընծայեն, որ քաղաքագէտներ եւ ղեկավարներ իրենց ամանորեան մաղթանքներով նաեւ պատգամ եւ խորհուրդ ուղղեն։

Նկատի ունենալով ստեղծուած քաղաքական պարապութիւնը, ղեկավարներու զանազան յայտարարութիւնները մոռցուած նիւթեր կը յիշեցնեն եւ վերստին բեմահարթակ կը փոխադրեն, փորձելով իրենց ճկունութիւնն ու ճարպիկութիւնը պարտադրել եւ իմաստալից խօսքերով ու հաստատումներով տպաւորութիւն ձգել, անշուշտ՝ պայման ու նախապայման ներմուծելով։

Այս բեմադրութիւնը անպակաս մնաց Կովկասեան բարձրաւանդակի տարածաշրջանէն ներս, սկսելով Թուրքիոյ արտաքին գործոց նախարար Մեւլութ Չաւուշօղլուէն, որ մէջբերելով եւ քիչ մըն ալ աղաւաղելով հայաստանեան կողմի մէկ հաստատումը, յայտնեց, թէ Թուրքիոյ հետ Հայաստանի նոր ղեկավարները կը յայտարարեն, թէ պատրաստ են առանց նախապայմաններու յարաբերութիւններ հաստատելու, սակայն Անգարա կը հաստատէ, թէ հաշուի առնելով մօտիկ բարեկամ Պաքուի դիրքորոշումը, նախապայմանը՝ Արցախի «բռնագրաւուած» տարածքներու հարցի լուծումն է։ Անշուշտ՝ Մեւլութ Չաւուշօղլուի համար ընդունելի է այդ նախապայմանը, որ կանաչ լոյսով կը դիմաւորուի Ատրպէյճանի կողմէ։

Անշուշտ, Անգարայի առաջադրած պայմանին միացած էր Պաքուն՝ յանձին արտաքին գործոց նախարար Էլմար Մամետեարովի, այն նախապայմանով, որ իր երկիրը կազմ ու պատրաստ է ապահովելու Արցախի հայութեան անվտանգութիւնն ու տրամադրելու բարձր մակարդակի ինքնակառավարման իրաւունքը:

Դեռ աւելի՛ն. փայլփլուն ոճով բացատրելով իր առաջարկը, ան շեշտեց, թէ Պաքու` Արցախի «հայկական ծագումով» քաղաքացիներուն բացարձակ անվտանգութիւնը պիտի ապահովէ, այնպէս՝ ինչպէս կ՚ընէ իր քաղաքացիներուն պարագային։

Մամետիարով, շարունակելով իր ամանորեան ձաբռտուքները, կը հասնի նաեւ նենգամիտ ստախօսութեան եւ սեթեւեթ հաստատումներու, յայտարարելով թէ հայերն ու ազերիները Արցախի մէջ ունեցած են սերտ կապեր, որոնք դժբախտաբար ընդհատուած ու խզուած են Հայաստանի նախկին ղեկավարութեան գործողութիւններուն պատճառով․․․:

Հոս արդէն Մամետիարով անցած կ՛ըլլայ դիւանագիտական բեմահարթակի կարմիր գիծը, սուտ ու կեղծիք տարածելով։ Բնականաբար, այս պայմանական եւ նախապայմանական յայտարարութիւններուն մէջ, հայկական եւ արցախեան կողմը ձեռնածալ պիտի չմնային։

Առաջին հերթին, Հայաստանի արտաքին գործոց նախարարութեան բանբեր Աննա Նաղդալեան ահազանգ հնչեցուց, թէ կարելի չէ Արցախի ժողովուրդին փոխարէն որոշել անոր կամքը եւ առ այդ Պաքու խորամանկօրէն փորձ կը կատարէ սեփական միակողմանի տեսակէտները, ըստ էութեան, իբրեւ նախապայման ներկայացնելու։

Շատ աւելի կտրուկ էր Արցախի նախագահի մամլոյ քարտուղար Դաւիթ Բաբայեանի պատասխանը։

Բաբայեանի համար, Պաքու, ըստ սովորութեան, չարամտօրէն ապակառուցողական դիրքորոշում կը շարունակէ կիրարկել։ Ան ընդգծեց, թէ Արցախի անվտանգութիւնն ու ինքնակառավարումը կը կերտուի միայն ու միայն Ստեփանակերտի հետ ուղիղ «էական» բանակցութիւններ կատարելով: Եւ անպայման այս է առաջարկուած նախապայմանին պայմանը։ Կամ պայմանին նախապայմանը։

Be the first to comment

Leave a Reply

Your email address will not be published.


*