Նոր Տարին

Նոր Տարին ինչպիսի ձեւով ալ ուզենք բնութագրել, ըլլայ օրացոյցի մեքենական փոփոխութիւն մը, կամ նորոգման առիթ մը՝ իւրաքանչիւր անհատի կամ հաւաքականութեան գործելակերպին մէջ, ըստ էութեան կը ներկայանայ որպէս սկիզբ շարունակական ընթացքի մը։

Հաւատացեալ մարդու համար այդ ընթացքը սկիզբ կ՛առնէ Աստուծմէ եւ իր յաւերժական շարունակութիւնը կ՛ունենայ Աստուծոյ մէջ, որ աղբիւրն է կեանքի, նախախնամութեան եւ նորոգման։

Նորոգութիւնը կեանքի հիմնական օրէնքներէն մին է։ Նորոգման չքացումը ճահճացում եւ մահ կը նշանակէ, մինչ նորոգութիւնը՝ կենսաւորում  եւ յառաջդիմութիւն։ Այս համոզումով երբ արագ ակնարկ մը նետենք վերջին դարու մեր պատմութեան վրայ, պիտի տեսնենք որ  ցեղասպանութենէն եւ Հայաստանի առաջին հանրապետութեան ստեղծումէն ետք մեր ժողովուրդը մշտանորոգ հաւատքով երազեց, 1988 թուականէն եւ ալ աւելի՝ 1991էն սկսեալ մշտանորոգ Յոյսով քալեց, եւ ահա այս տարի հասած է պահը որ մշտանորոգ սիրով ապրի հայրենիքի մէջ եւ ի սփիւռս աշխարհի։

Նոր տարիով կեանքի նոր հատորի նոր էջը կը սկսի։ Սկսինք զայն իմաստաւորել մեր անձնական թէ հաւաքական երազներու իրագործումով։

 

Անուշաւան Արքեպիսկոպոս
Առաջնորդ

Նիւ Եորք

Յունուար 1, 2019

Be the first to comment

Leave a Reply

Your email address will not be published.


*