Փաշինեան Այցելեց Մոսկուա

Հ. Հ. վարչապետի պաշտօնակատար Նիկոլ Փաշինեան, Դեկտեմբեր 27-ին, Մոսկուա ժամանեց եւ հանդիպեցաւ Ռուսաստանի նախագահ Վլատիմիր Փութինի հետ:

Հանդիպման ընթացքին երկու երկիրներու ղեկավարները քննարկեցին Հայաստանի եւ Ռուսիոյ միջեւ երկկողմ ու բազմակողմ ձեւաչափերով համագործակցութեան օրակարգին վերաբերող հարցեր:

«Կը կարծեմ, որ կայ յարաբերութիւններու զարգացման դրական շարժ, եւ անիկա պէտք է զարգացնել: Մենք պատրաստ ենք անոր, պիտի կատարենք մեզմէ կախեալ ամէն բան, որպէսզի յարաբերութիւններու դրական մակարդակը պահպանուի ո՛չ միայն տնտեսական, այլ նաեւ այլ ուղղութիւններով: Նկատի ունիմ համագործակցութիւնը անվտանգութեան ապահովման մարզին եւ  համագործակցութիւնը ՀԱՊԿ-ի շրջագիծին մէջ», յայտնեց  Փութին որ նաեւ շնորհաւորեց Փաշինեանը` խորհրդարանական ընտրութիւններուն յաղթելուն առիթով` մաղթելով յաջողութիւն:

Փաշինեան իր կարգին յայտնեց թէ.- «Մենք մտադիր ենք Ռուսիոյ հետ զարգացնել յարաբերութիւնները բոլոր ուղղութիւններով: Ես համոզուած եմ, որ նոր ձեւաւորուած խորհրդարանը պիտի շարունակէ զարգացնել միջխորհրդարանական յարաբերութիւնները: Մենք դրականօրէն տրամադրուած ենք նաեւ տնտեսական յարաբերութիւնները զարգացնելու ուղղութեամբ»:

 

Be the first to comment

Leave a Reply

Your email address will not be published.


*