Բարի Գալուստ Նորընտիր Առաջնորդ Գերաշնորհ Տէր Անուշաւան Արք․Դանիէլեանին

Թղթակից

ՆԻՒ ԵՈՐՔ․- Կիրակի, Դեկտեմբեր 2-ին, յատուկ տօնախմբութեամբ նշուեցաւ , Ա․Մ․Ն․ արեւելեան շրջանի Առաջնորդ Գերաշնորհ Տէր Անուշաւան Արք․Դանիէլեանի ընտրութիւնը։
Սրբազանը պատարագեց եւ քարոզեց Սուրբ Լուսաւորիչ Մայր Եկեղեցւոյ մէջ։ Յընթացս Սուրբ Պատարագի, Հ. Սահակ ծայրագոյն վարդապետ Եմիշեան կարդաց Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա.ի սրբատառ կոնդակը, որով արքութեան տիտղոսը կը շնորհուէր թեմիս բարեջան առաջնորդ Անուշաւան եպս. Դանիէլեանին։ Կոնդակին մէջ, Վեհափառ Տէրը մասնաւորապէս գրած է.
“Մօտէն հետեւած ենք թեմէն ներս երկար տարիներու Ձեր գործունէութեան, որպէս Առաջնորդական Փոխանորդ եւ Միջ-եկեղեցական յարաբերութեան պատասխանատու, եւ Ձեր մէջ տեսած՝ մեր եկեղեցւոյ ու Ս. Աթոռին հաւատարիմ ու նուիրեալ միաբանը։
Արդ, առ ի գնահատութիւն անցնող տարիներու Ձեր նուիրեալ ծառայութեան եւ որպէս քաջալերանք Ձեր կեանքին առջեւ բացուող նորանոր ծառայութեանց, այսու Հայրապետական Կոնդակաւ Ձեզի կը շնորհենք ԱՐՔՈՒԹԵԱՆ պատիւ եւ տիտղոս։
Վստահ ենք որ Ձեզի տրուած այս տիտղոսը նոր մղում պիտի հանդիսանայ՝ վերանորոգ հաւատքով եւ ամբողջական նուիրումով կատարելու Ձեզի վստահուած առաքելութիւնը մեր Սուրբ Աթոռի ծառայութեան դաշտէն ներս“։
Հիւսիսային Ամերիկայի Արեւելեան եւ Գանատայի թեմի նախկին Առաջնորդ հոգելոյս Տ. Մեսրոպ արք. Աշճեանի վախճանման 15-րդ տարելիցին առթիւ հոգեհանգստեան պաշտօն կատարուեցաւ: Մեսրոպ արք. իր մահկանացուն կնքած էր Դեկտեմբեր 2, 2003-ին, Միացեալ Նահանգներ այցելութեան մը ընթացքին։ Ան թեմի առաջնորդական պաշտօնը վարած էր 1978-1998 թուականներուն, իսկ այնուհետեւ փոխադրուած էր Հայաստան, ուր ղեկավարած էր քրիստոնէութեան իբրեւ պետական կրօնք ընդունման 1700-ամեակի յանձնախումբը եւ բարեսիրական ու կրթական բազմաթիւ ծրագրեր կազմակերպած էր Հայաստանի ու Արցախի մեր ժողովուրդի ի նպաստ։
Ապա եկեղեցւոյ սրահին ներքեւ կատարուեցաւ մատաղի հիւրասիրութիւն։
Այնուհետեւ, Terrace on the Park-ի մէջ (Քուինզ, Նիւ Եորք) տեղի ունեցաւ ժողովրդային տօնախմբութիւն մը խանդավառ մթնոլորտի մէջ։ Աւելի քան 360 հոգինոց բազմութիւնը նշեց Անուշաւան Սրբազան Հօր թէ՛ ընտրութիւնը եւ թէ՛ արքեպիսկոպոսի աստիճանի շնորհումը։
Վաղարշակ Օհանեանի, Անահիտ Զաքարեանի եւ Շաքէ ՄըքՄահոնի երգեցողութեամբ հնչեցին ազգային քայլերգները, որմէ ետք, օրուան հանդիսավար Քարէն Ճէհանեան բարի գալուստ մաղթեց, նշելով թէ այսօր որ միայն կը նշուի Անուշաւան Սրբազանի Առաջնորդի պաշտօն ստանձնումը, այլ նաեւ անոր արքութեան տիտղոսով շնորհուիլը։ Ապա, Բարեջան Առաջնորդը կատարեց սեղանի օրհնութիւնը։ Կազմակերպիչ յանձնախումբի անունով, խօսք առաւ Սիւզան Չիֆչեան-Էիքսընը, որ շնորհակալութիւն յայտնեց ներկաներուն եւ յատկապէս նիւթական իրենց ներդրումը կատարող անհատներուն, որոնց առատաեռնութեամբ, կարելի եղաւ կազմակերպել այս ձեռնարկը։
Հ․Յ․Դ․-ի եւ յարակից մարմիններու խօսքը փոխանցեց Ա․Մ․Ն․ արեւելեան շրջանի Կեդրոնական Կոմիտէի անդամ Տոքթ․ Արա Չալեան (Ֆիլատելֆիա, Փենսիլվանիա)։ Ան իր խօսքին մէջ, նշեց, թէ Ա․Մ․Ն․ արեւելեան շրջանին մէջ իւրայատուկ դեր ունի եկեղեցին։ ՝՝Շրջանի զանազան գաղութներէն ներս, անբաժան են մեր ծուխերն ու անոնք ետին կանգնող հովիւները, որոնք Բարեջան Առաջնորդ Անուշաւան Դանիէլեանի հովանիին տակ կը գործեն, կը դաստիարակեն, կ՛աղօթեն, շարունակ խթանելով հայ ընտանիքը։ Վստահաբար, այդ միեւնոյն տենդը պիտի շարունակուի եւ ապագայ սերունդը կառչած պիտի մնայ իր ազգային լինելութեան, հաւատքին եւ բնականաբար ծուխին՛՛, յայտնեց Չալեան։
Կրօնական Ժողովի անունով խօսք առաւ ատենապետ՝ Արժանապատիւ Տէև Ներսէս Քահանայ Մանուկեան, որ դրուատեց նորընտիր Առաջնորդ Անոիշաւանին անաչար գործունէութիւնն ու հետեւողական նուիրումը, իր հօտին, ազգին ու հաւատքին։ Ան տպաւորիչ կերպով ներկայացուց Անուշաւան Սրբազանի հեւքով լեցուն առօրեան։
Ազգային Վարչութեան անունով խօսք առաւ մեթր Ճէք Մարտոյեան, որ իր կարգին շնորհակալութիւն յայտնեց ներկաներուն եւ յատկապէս բարերարներուն։ Իր կարգին, Մարտոյեան շեշտեց երիտասարդութեան դերակատարութիւնն ու գործունէութիւնը, զանազան գաղութներէ ներս։
Իր պատգամին մէջ Գերշ․ Տ․ Անուշաւան Արք․ Դանիէլեան զանազան օրինակներով կարեւորեց ազգային պատկանելիութիւնը, հաւատքը, հայեցի դաստիարակութիւնն ու մշակոյթի պաշտպանումը։ Ան յայտնեց թէ պէտք է հպարտանալ եւ ոգեւորուիլ որ շրջանէն ներս կը շարունակուի մշակոյթը, նաեւ ինքնութեան ապառնացող վտանգի պայքարը, եւ ազգային արժանիքներու պահպանումը: Առաջնորդը ներկայացուց դէմ յանդիման գտնուող դժուարութիւնները։ Նոյնիսկ Առաջնորդարանի կապակցութեամբ շտապ վերաշինութեան մասին տեղեկութիւններ փոխանցելով։
՛՛Մենք որպէս ազգ եւ ժողովուրդ հպարտ ենք մեր ազգային պատկանելութեան, ստեղծած ենք երեք հազար տարուայ պատմութեան վիթխարի գանձեր, հիմնած ենք պետականութիւն եւ ունեցած ենք թագաւորութիւններ ու կայսրութիւն։ Թէեւ մենք թիւով փոքր ենք, բայց որակով եւ մակարդակով մեծ ենք։ Իսկ համաշխարհային չափանիշով կը գրաւենք քաղաքակիրթ ազգերու առաջին դիրքերը, ազգերու պատմութեան մէջ, տուած ենք մեծ հանճարներ, գիտնականներ եւ մշակոյթի հսկաներ, մենք շինարար եւ ստեղծագործ ժողովուրդ ենք: Մենք գոյատեւած ենք, որովհետեւ հաւատացած ենք ու հետեւած մեր Նահապետ Հայկի ուղիին։ Մեծ Եղեռնէն ետք, Սփիւռքի տարածքին որպէս գոյատեւումի պայքար ու վահան, հաւաքական աշխատանքով ծրագրեցինք ու կառուցինք եկեղեցիներ, դպրոցներ ու ակումբներ, որպէսզի կարենանք պահել մեր լեզուն պատմութիւնը, աւանդութիւնները, սովորութիւնները եւ ազգային արժէքնեհո։ Դեռ ալ նոյն ձեւով, կառչած մնալով այս հաւատքին, պիտի շարունակենք գործել։ Յառաջանանք յոյսով, Աստուծոյ հանդէպ եւ փոխադարձ հաւատքով հզօրացած, եւ ուխտենք ծառայել Անոր եկեղեցւոյ եւ առաքելութեան։ Չմոռնանք կիսել մեր վայելած բարիքները նուազ բախտաւորներու հետ, իսկ մեր աղօթքներով աղերսենք Ամենակալէն, որ մեր խնդրած բարիքները շնորհէ ողջ մարդկութեան՛՛, ըսաւ ան։
Փակման աղօթքով աւարտեցաւ այս յոյժ յիշատակելի հանդիսութիւնը։ Գեղարուեստական յայտագրով, ելոյթ ունեցաւ ջութակահար Սվետլանա Մկրտիչեանը, որ նուագեց Կոմիտասի ՛՛Ծիրանի Ծաը՛՛-ն ու Արամ Խաչատուրեանի ՛՛Սուրերու Պար՛՛-ը։
Սեդա Պալմանուկեան ընթերցեց իր յօրինած բանաստեղծութիւնը՝ ՛՛Ձօն՝ Անուշաւան Արք․ Դանիէլեանի՛՛-ն։ Անահիտ Զաքարեան մեներգեց ՛՛Նոր Ծաղիկ՛՛-ը, իսկ Վաղարշակ Օհանեան՝ Կոմիտասի ՛՛Հայաստան՝ Երկիր Դրախտավայր՛՛-ը։ Իսկ Զաքարեան-Օհանեան զոյգը միասնաբար ներկայացուցին Եղիշէ Արք․ Դուրեանի ՛՛Խաչը՝՝ եւ ՛՛Ետեւէն Եկուր՛՛ գործերը, որոնց երաժշտութիւնը մշակած է Շահան Պէրպէրեանը։ Յընթացս ընդունելութեան, երաժշտութիւնը ստանձնած էր Արսէն Կէտիկեանը։
՛՛Կիլիկիա՛՛-ով աւարտեցաւ օրուան հանդիսութիւնը։

Be the first to comment

Leave a Reply

Your email address will not be published.


*