Հ.Օ.Միութիւնը Մ․Ա․Կ․-էն Ներս Տարած Գործունէութեան Նոր Համադրողներ Կը Նշանակէ

Ձախէն աջ՝ Քրիստինա Մեհրանպոտ եւ Մարալ Թիւթիւնճեան

Հայ Օգնութեան Միութիւնը, յատուկ հաղորդագրութեամբ մը կը տեղեկացնէ, թէ նշանակած է Քրիստինա Մեհրանպոտ որպէս համադրիչ Հ․Օ․Մ․-ի Միացեալ Ազգերու Կազմակերպութենէն ներս տարուող աշխատանքներուն, եւ Մարալ Թիւթիւնճեանը՝ որպէս օգնական համադրիչ։ Մեհրանպոտ եւ Թիւթիւնճեան, Նիւ Եորքի Մ․Ա․Կ․-ի կեդրոնատեղիէն ներս, պիտի ներկայացնեն Հ․Օ․Մ․-ը տարբեր ժողովներու ընթացքին ինչպէս նաեւ ՄԱԿի մօտ այլազան գործակալութիւններու, եւ ոչ-կառավարական կազմակերպութիւններու ընթացիկ ծրագիրներու իրականացման աշխատանքներուն ընթացքին։
Գալիֆորնիոյ Պըրքլի համլսարանէն շրջանաւարտ, Մեհրանպոտ ստացած է իր Պսակաւոր արուեստից տիտղոսը հանրային առողջապահութեան մարզէն ներս, մասնագիտանալով նաեւ սպաներէն լեզուին ու գրականութեան. ներկայիս, ան կը շարունակէ իր ուսումը Քոլոմպիա համալսարանի հանրային առողջապահութեան Մէյլմէն դպրոցէն ներս՝ հանրային առողջապահութեան համաճարակագիտութեան ճիւղին մէջ Մագիստրոսի տիտղոսին արժանանալու միտումով։ Թիւթիւնճեան, շրջանաւարտ է Մոնթքլէր նահանգային համալսարանէն որպէս հոգեբանութեան ճիւղի Պսակաւոր, միանգամայն մասնագիտացած է Քաղաքային յանձնառութեան ճամբով ղեկավարութեան զարգացման մարզէն ներս։ Միասնաբար, զոյգ համադրիչները կը տիրապետեն հայերէն, անգլերէն, սպաներէն, արաբերէն, պարսկերէն եւ թրքերէն լեզուներուն։
“Բարի գալուստ կը մաղթենք Հ․Օ․Մ․-ի անձնակազմին միացող Քրիստինային ու Մարալին։ Անոնց նշանակումը աւելի եւս կ՚ամրացնէ մեր նուիրումը հանդէպ այն սկզբունքներուն զորս կը բաժնենք Միացեալ Ազգերու կազմակերպութեան հետ։ Որպէս մին աշխարհի 5,083 կազմակերպութիւններէն որոնք ճանաչում ստացած են ՄԱԿէն, խանդավառ ենք այն համոզումով, որ մեր նոր համադրիչները իրենց որակաւոր դաստիարակութեամբ ու փորձառութեամբ պիտի արժեւորեն մեր գործունեայ ներկայութիւնը համաշխարհային այս կազմակերպութենէն ներս”, ըսաւ Հ․Օ․Մ․-ի Կեդրոնական գրասենեակի Վարիչ-տնօրէն՝ Վերժինի Թուլումեանը։
Մեհրանպոտ եւ Թիւթիւնճեան պիտի ջանան ռազմավարական գործակցութիւններ զարգացնել Հ․Օ․Մ․-ի համար Մ․Ա․Կ․-էն ներս՝ ամրացնելով Հ․Օ․Մ․-ի նուիրումը հանդէպ տիեզերական արժէքներու – ինչպիսին են մարդկային իրաւունքներու, կիներու եւ մանուկներու ընկերային, առողջական ու դաստիարակչական ու տնտեսական կարիքներու գոհացման ու պահպանման աշխարհով մէկ ապահովումը՝ պայքարելով նոյն ատեն կենսոլորտին սպառնացող բոլո՛ր վտանգներուն դէմ։
“Պատիւ կը զգամ, որ առիթը կը տրուի ինծի որպէս համադրիչ Հ․Օ․Մ․-ի աշխատանքներուն Մ․Ա․Կ․-էն ներս։ Անհամբեր եմ ծառայելու կազմակերպութեան մը՝ որ ամբողջական, աշխարհածի՛ր նուիրումով կը ծառայէ Հայաստանի ու հայութեան իր մարդկային իրաւունքներու, ընկերային արդարութեան, սեռերու հաւասարութեան, տնտեսական ու մշակութային զարգացման ի խնդիր հաստատուած ծրագիրներով ու հաստատութիւններով։ Եւ ահա՛, պատրաստ եմ Հ․Օ․Մ․-ը ներկայացնելու Միացեալ Ազգերու Կազմակերպութենէն ներս”, ըսաւ Մէհրանպոտ։

 

Be the first to comment

Leave a Reply

Your email address will not be published.


*