«Եթէ Հ. Յ. Դաշնակցութիւնը Քիչ Քուէ Հաւաքէ, Ատիկա Դաշնակցութեան Խնդիրը Պիտի Չըլլայ , Այլ՝ Հայաստանի Ազգային Ժողովին Խնդիրը», Կը Յայտնէ Սպարտակ Սէյրանեան

Հ.Յ.Դ. համամասնական ցուցակով առաջադրուած թեկնածու Սպարտակ Սէյրանեան, «Երկիր»-ի հետ զրոյցի ընթացքին նշեց, որ Հայաստանի մէջ ընտրութիւններու նախօրեակին յաճախ կը խօսուի այն մասին, որ ընտրարշաւը պէտք է ընթանայ բնական մթնոլորտի մէջ, ինչ որ բոլորին համար ձեռնտու է, բայց եւ այնպէս նկատելի է, որ այս մասին ամէնէն աւելի խօսողները իրե՛նք են, որ կը խախտեն քաղաքակիրթ քարոզարշաւի տրամաբանութիւնը:  Սէյրանեան մտահոգութիւն յայտնեց այն մասին, որ նման արարքները հասարակութիւնը բաժան-բաժան կ՛ընեն, լարուածութիւն եւ ներքին թշնամութիւն կը սերմանեն` աւելցնելով, որ ընտրութիւնները երկու կարեւոր խնդիր կը հետապնդեն` ո՛ր քաղաքական ուժը իշխանութիւն պիտի ունենայ, իսկ երկրորդ` ընտրութիւններէն ետք մեր հասարակութիւնը աւելի ուժե՞ղ, թէ՞ աւելի տկար պիտի ըլլայ. «Ցաւօք, այս քարոզարշաւի ամբողջ տրամաբանութիւնը լաւատեսութեան հիմքեր չի տար, որ ընտրութիւններէն ետք մենք պիտի ունենանք ընտրական հոլովոյթէն աւելի ուժեղ դուրս եկող հասարակութիւն», շեշտեց Սէյրանեան:

Ան  աւելցուց, որ քարոզարշաւի ընթացքին բառեր արտասանելու, արտայայտութիւններ եւ կեցուածքներ ունենալու ատեն պէտք է լաւապէս մտածել, որ անհրաժեշտ սահմանները յարգուին, որպէսզի կարելի ըլլայ աւելի ուշ միմիանց երեսին նայիլ եւ ձեռք սեղմել: «Կարելի չէ անցնիլ սահմաններ` ըլլայ ազգային խնդիրներու կամ  Արցախին վերաբերող: Կարելի չէ մէկ-երկու քուէի համար անցնիլ սահմաններ, որոնք յետոյ շատ դժուար է վերականգնել», տեղեկացուց ան:

«Որովհետեւ, եթէ դուն վստահ ես, որ քու գաղափարդ ճիշդ է, դուն դիմացինիդ չես հայհոյեր, չես վարկաբեկեր, քու պաստառդ չես փակցներ դիմացինին պաստառին վրայ: Ասիկա ոչ թէ քաղաքական նախնականութիւն է, այլ կը նշանակէ, որ մարդիկ նպատակադրած են ամէն գնով յաջողութեան հասնիլ, իսկ այդ ամէն գնովին մէջ կը մտնէ նաեւ հասարակութիւնը պառակտելը», աւելցուց Սէյրանեան:

Ըստ անոր, ասիկա քաղաքական մակարդակ չէ, չափահաս մարդու մակարդակ չէ: Այդ մակարդակը մանկական ալ չէ: «Եւ եթէ մանկամիտ մտածելակերպով կ՛ուզենք Ազգային ժողով ղեկավարել, վա՛յ այն երկրին, որուն Ազգային ժողովը մանկամիտ մտածելակերպով մարդոցմով պիտի ձեւաւորուի», նշեց ան:

Պատասխանելով այն հարցումին, թէ Դաշնակցութիւնը, առհասարակ, այս ընտրութիւններուն յաղթելու կարելիութիւններ ունի՞` Սէյրանեան ըսած է, որ ոչ մէկ քաղաքական ուժ իր յաջողութեան հաւանականութիւնը պէտք է գնահատէ. «Այսօր հասարակութիւնը լուրջ առիթ ունի ձեւաւորելու լուրջ խորհրդարան մը` իր դիմագրաւած խնդիրները լուծելու համար: Եւ եթէ Դաշնակցութիւնը քիչ քուէ հաւաքէ, ատիկա Դաշնակցութեան խնդիրը պիտի չըլլայ, այլ պիտի ըլլայ Հայաստանի Հանրապետութեան Ազգային ժողովին խնդիրը»:

Be the first to comment

Leave a Reply

Your email address will not be published.


*