Հայրենասիրութիւն, Ազգայնամոլութիւն․․․Եւ Եսասիրութիւն

ՀԱՅՐԵՆԻՔ
Խմբագրական

2018-ի 11-րդ ամսուան, 11-րդ օրուան 11-րդ ժամուն լոյսերու քաղաքին՝ Փարիզի մէջ նշուածը Համաշխարհային Ա. պատերազմի աւարտն էր։ Այդ զուգադիպութիւնը դիտաւորեալ էր, պարզապէս ճշդապահ ըլլալու համար։ Այդ հռչակաւոր զինադադարը ստորագրուած էր հարիւր տարի առաջ, Նոյեմբեր 11, 1918-ի ժամը 11։00-ին, Փարիզէն բաւական հիւսիս, Պելճիքայի ուղղութեամբ գտնուող Փիքարտիի շրջանի Քոմփիէյն անտառին մօտ, դաշնակից ուժերու ընդհանուր հրամանտար ֆրանսացի Ֆերտինան Ֆոշի շոգեկառքին մէջ։
Ֆրանսայի նախագահ Մաքրոնի հովանաւորութեամբ եւ ղեկավարութեամբ պատշաճօրէն նշուեցաւ այս հարիւրամեակը։ Հաւանաբար, կարելի է հարցադրումի տակ առնել պատշաճութեան մակարդակը, մանաւանդ երբ նկատի ունենանք, թէ հարիւր տարի ետք որքա՜ն փոխուած են բնութիւնը, սահմանները, աշխարհաքաղաքականութիւնն ու ղեկավարները։
Ծանր հրետանին ներկայ չէր ամբողջութեամբ։ Հիւրընկալ Մաքրոնի հրաւէրին ընդառաջած էին Սպիտակ Տան վարձակալ Թրամփը, Քրեմլի ալֆան եւ օմեկան՝ Ռուսաստանի ղեկավար Փութինը, Գերմանիոյ վարչապետ Մերքէլը։ Անակնկալ էր բացակայութիւնը Մանշի միւս կողմի երկրի՝ Բրիտանիոյ վարչապետ Թերեզա Մէյի, որ նախընտրած էր իր երկրին մէջ կազմակերպուած հարիւրամեայ այս զինադադարի նուիրուած մէկ ձեռնարկին մասնակցիլ, արդեօք «պատմական» բնոյթ ունեցող այլ Պրեքսի՞թ մը իրագործելով։
Հարիւր տարի առաջ, Սպիտակ Տան բնակիչը Վուտրօ Ուիլսընն էր, որ, երբ զինադադարի ստոորագրութենէն շաբաթներ ետք, Յունուար 1919-ին այցելած էր Փարիզ, բիւրաւոր տեղացիներ ժամանած էին դիմաւորելու մեծ ժողովրդականութիւն վայելող Նոր Աշխարհի ներկայացուցիչը։ Մինչդեռ հարիւր տար ետք, երբ աշխարհի եւ բնականաբար Ֆրանսայի բնակչութեան թիւը շօշափելի տոկոսով բազմիցս կրկնապատկուած է,
անտարբեր էին տեղացիք եւ նոյնիսկ Սպիտակ Տան մերօրեայ բնակիչին դէմ ցոյցեր կը կազմակերպէին։
Այսպէս դարը փոխուած էր, որուն հետ նաեւ մարդը, մարդկայինն ու յատկապէս մակարդակը։ Անակնկալ չէր Թրամփի հանդէպ կատարուածը, մանաւանդ որ ներկայ օրերու վիճակագրական աշխարհին մէջ, անիկա կը վայելէ երեսուն առ հարիւրէն պակաս ժողովրդականութիւն մը, յատկապէս Եւրոպայի մէջ։
Անականկալ ալ չէր նաեւ նոյնինքն Թրամփին կատարածը, երբ ան աննպաստ օդին պատճառով ջնջեց զոհուած զինուորներուն գերեզմանատուն այցելութիւնը:
Հարիիւր տարի առաջուան Աւստրոհունգարական կայսրութիւնը գոյութիւն չունի, սակայն վեր առնելով Ֆրանսայի նախագահին խօսքերը, շեշտուեցաւ, թէ ազգայնամոլութիւնը կը շարունակուի մեծ թափով, դաւաճանելով հայրենասիրութեան, շարունակ արգելք հանդիսանալով խաղաղութեան հաստատման եւ դուռ բանալով եսասիրութեան եւ անհատապաշտութեան։

Be the first to comment

Leave a Reply

Your email address will not be published.


*