ՄԱՍԱՉՈՒՍԷՑ․- ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ 100-ԱՄԵԱԿԻ ՆՇՈՒՄ

Լուսանկարներ՝ Քնար Պետեան

ԿԱՐՊԻՍ ԳՈՃԱՆԵԱՆ

Շաբաթ, Հոկտեմբեր 13¬ին, Ուաթըրթաունի Հայ Մշակութային եւ Կրթական կեդրոնէն ներս, տեղի ունեցաւ 100¬ամեակի առիթով, փառաւոր երգահանդէս, հայրենիքէն հրաւիրուած, տաղանդաւոր երգիչ՝ Սեւակ Ամրոյեանի կատարողութեամբ։
Սրահը լեցուն էր հանդիսատեսներով, որոնք եկած էին վերապրելու եւ ըմբոշխնելու հայրենաշունչ երգերը, Մայիս 28 մեր նորագոյն պատմութեան ամենէն փառապանծ յաղթանակի առիթով նախաձեռնուած։
Բեմահարթակը զարդարուած էր, Հայաստանի եւ Արցախի հոգեզմայլ դրօշակներով։
Սրահը մուտք գործեցին, արիներն ու արենուշները, ապա ելոյթի բացումը կատարեց Անի Զարգարեան, մեներգելով ամերիկեան եւ հայկական քայլերգները, յետոյ Հ.Մ.Ը.Մ.¬ի Սկաուտները երգեցին «Յառաջ Նահատակ»ը, սրահը ողողելով անհուն երջանկութեան զգացումներով։
Բեմավարներ՝ Մեղրի Տէր Վարդանեան եւ Սարօ Սագայեան բացման խօսքերէն ետք, բեմ հրաւիրեցին արուեստագէտ երգիչ՝ Սեւակ Ամրոյեան։
Համերգը սկսաւ աշուղական եւ ժողովրդական հոգեզմայլ երգերով, Սեւակի կատարողութիւնը սրտառուչ էր եւ առինքնող։
Մերթ ընդ մերթ համերգի միջոցներուն, ելոյթ կþունենար Մեղրի, ասմունքելով անկախութեան առիթով գրուած քերթուածներէն, Անդրանիկ Ծառուկեանէն, Համօ Սահեանէն, ինչպէս նաեւ բարձր գնահատելով Արամ Մանուկեանի հիմնական դերը անկախութեան ձեռք բերումին մէջ։
Մեղրի ձեռնհասօրէն վարեց հանդիսութիւնը, համերգին տալով պատշաճ յաջողութիւն։
Սեւակ Ամրոյեան շարունակեց յաղթերգը այս անգամ մատուցելով Սայեաթ Նովայի «Քամանչա»ն առանց նուագակցութեան, որ բացայայտեց իր ձայնով առանձնայատուկ կարողութիւնները։
Սեւակ, իր խոստովանութեամբ, յայտարարեց որ ընդհանրապէս Կոմիտասէն շատ քիչ երգած է, սակայն երբ երգեց Կոմիտասի «Կռունկ»ը, փաստեց որ նուաճած էր երգարուեստի այդ բարձունքը եւս։
Անկախութեան առիթով կազմակերպուած ելոյթը անկասկած պիտի ներգրաւէր յայտագրին մէջ ազգային եւ հայրենասիրական երգեր։ Ներկաները խանդավառուած իրենց հոգեհարազատ երգերէն եւ ոգեւորուած ազգայնաշուչջ մթնոլորտէն, իրենց մասնակցութիւնը բերին միասնաբար երգելով երգիչին հետ։ Խանդավառութիւնը հասաւ իր գագաթնակէտին երբ ներկաները շուրջպար բռնեցին ի ցնծութիւն այդ օրուան ներշնչած պատգամին։
Հայաստանի Հանրապետութեան 100¬ամեակին նուիրուած հանդիսութիւնը, ոգեկոչումն էր Սարդարապատի յաղթանակին եւ հայ ժողովուրդի վերականգնումին։
Մասնայատուկ պատրաստուած եռագոյն վզնոցները կը զարդարէին ներկաներու ուսերը, յաւելեալ փայլք տալով ձեռնարկին։
Հանդիսավարներ՝ Մեղրի եւ Սարօ իրենց յայտարարութիւններով կը խանդավարէին ներկաները որոնք իրենց ծափողջոյններով կը գնահատէին Սեւակը։
Խանդավառ մթնոլորտէն ներշնչուած, երիտասարդ ներկաները բեմ բարձրացան եւ Ամրոյեանի հետ միասին, ուս ուսի տալով երգեցին «Ախպերս եւ Ես» մարտաշունչ երգը։
Հանդիսութիւնը իր աւարտին հասաւ հոգեպարար մթնոլորտի մէջ, ներկաներու որոտընդոստ ծափահարութիւններու տարափին տակ։

Be the first to comment

Leave a Reply

Your email address will not be published.


*