Միլզի Հրաժեշտի Անփառունակ Գազէլը

ՀԱՅՐԵՆԻՔ

Խմբագրական

Երբ քաղաքական գործիչի մը պաշտօնը հասած է աւարտին, հրաժեշտի այցելութիւններն ու խօսքերը առ հասարակ կ՛ըլլան զուսպ եւ քիչ մըն ալ զգացական։
Թէ՛ պաշտօնը եւ թէ՛ անձը մեծ դեր կրնան ունենալ այդ հրաժեշտի ելոյթներուն մէջ։ Այս գծով, երկրի մը ծառայող դիւանագէտները բնականաբար յատուկ դասընթացքներու հետեւած պէտք է ըլլան։ Իւրայատուկ է Միացեալ Նահանգներու պարագան, որ ո՛չ միայն այս ուսումնական բնագաւառէն ներս աշխարհահռչակ հիմնարկներ ունի, այլեւ կը գործակցի բազմաթիւ այլ երկիրներու հետ, իր հիմնարկներուն դռները լայն բանալով եւ բարձր մակարդակի յատուկ դասընթացքները աւանդելով այլ երկիրներու արտաքին քաղաքականութեամբ զբաղող դիւանագէտներու։
Այս բոլոր մատնանշումները նկատի ունենալով, ինչպէ՞ս կարելի է բացատրել Հայաստանի մէջ Միացեալ Նահանգներու դեսպան Ռիչըրտ Միլզի արտայայտութիւնները։
Մօտիկ ապագայի իր հրաժեշտը նշելու համար, յատուկ եւ երկար հարցազրոյց մը կատարուած էր Միլզի հետ, որ, յատկապէս Արցախի հիմնահարցի գծով, անտեղի եւ կիսատ-պռատ տեղեկութիւններով յուսախաբութեան մեծ ալիք մը յառաջացուցած էր։
Արցախի հանրապետութիւնը «գրաւուած տարածք» պիտակաւորելու աշխատանքը նախապէս ալ կատարուած է։ Միլզի դեսպանի պաշտօնը ստանձնած օրերուն էր, որ նմանօրինակ ձաբռտուք մը կատարած էր Մինսքի խմբակի ամերիկացի համանախագահ Ճէյմս Ուորլիք, որ Մատրիտեան սկզբունքները յիշեցնելով հայկական կողմէն տարածքներ ու զիջումներ պահանջած էր, անշուշտ ո՛չ մէկ զիջման անդրադառնալով Ատրպէյճանի պարագային:
Այսպէս, երկար ժամանակ, Յուլիս 2014-էն ի վեր Հայաստանի մէջ Միացեալ Նահանգներու պաշտօնը ստանձնած եւ բնականաբար, նախքան այլ երկիրներէ ներս ծառայելը, Ճորճթաունի եւ Օսթինի քաղաքական ուսումնասիրութիւններու ամպիոնէն ներս լաւապէս թրծուած եւ ի վերջոյ Կովկասեան բարձրաւանդակի պատմութեան մօտէն ծանօթացած Միլզը, առանց նկատի ունենալու իր արտայայտութեան կամ աւելի ճիշդ՝ ահաւոր սխալին հետեւանքը, Արցախի հանրապետութիւնը որակած էր «գրաւուած տարածք»։
Բարեբախտաբար, Միլզ կատարած է այս կաֆը իր պաշտօնի աւարտին։ Սակայն, միեւնոյն ժամանակ այդ բարեբախտութեան կողքին, գոյութիւն ունի դժբախտութիւն մը։ Արդարեւ, ան աւելի քան չորս տարուան իր կեցութեան պահած է նման համոզում մը, զոր ամենայն յանդգնութեամբ արտայայտած է այդ հարցազրոյցին ընթացքին։
Շատ աւելի հեշտ պիտի ըլլար, որ Միլզ հետեւէր նախագահ Օպամայի օրերուն Միացեալ Ազգերու Կազմակերպութեան մօտ Միացեալ Նահանգներու նախկին դեսպան Սամանթա Փաուըրի օրինակին, որ իր պաշտօնավարութեան վերջին օրերուն ալ, ելոյթի մը ընթացքին, իր խօսքին մէջ ըսած էր, թէ 1915-ին հայերուն դէմ պատահածը ցեղասպանութիւն էր։
Իր պաշտօնը ստանձնած ժամանակ, հաւանաբար ան՝ զայրոյթն ու ցասումը իր մէջ պահելով, պարտադրուած էր հրահանգներու ենթարկուելու։
Հրաժեշտի օրերուն, Փաուըրի համար ծածկելիք հարց չկար այլեւս։ Օրինակելի արարք մը, որ հակառակն է Միլզի հրաժեշտի անփառունակ գազէլին։
Վերջապէս, այլ հարցում մըն ալ․- Արդե՞օք Միլզ տեսակցա՞ծ ու խորհրդակցա՞ծ է նախկին պաշտօնակից՝ Ճոն Էվընզի հետ։

Be the first to comment

Leave a Reply

Your email address will not be published.


*