Hairenik Weekly Newspaper

Տեսակցութիւն՝ Վարչապետ Փաշինեան – Հ.Յ.Դ. Լիբանանի Կ. Կ.

Շուրջ մէկ ժամ տեւողութեամբ հանդիպման քննարկուեցան Թաւշեայ յեղափոխութեան արձանագրած դրական անդրադարձները եւ այդ ուղղութեամբ ժողովրդային ակնկալութիւնները, ինչպէս նաեւ՝ Սփիւռքի, յատկապէս Լիբանանի հայութեան մօտ ստեղծուած մթնոլորտն ու այն պաշտպանելու վճռականութիւնը:

Իբրեւ Հ․Յ․ Դաշնակցութեան մեծ ընտանիքի անդամ, Լիբանանի Հ․Յ․Դ․ կազմակերպութեան պատուիրակութիւնը վարչապետ Փաշինեանին փոխանցեց Թաւշեայ յեղափոխութեան յաջողութեան անհրաժեշտութիւնը եւ այդ առումով Դաշնակցութեան պատրաստակամութիւնը՝ նպաստելու անոր ամրապնդմանը: Շեշտուեց նաեւ, որ անխուսափելի խոչընդոտների եւ դժուարութիւնների յաղթահարման համար անհրաժեշտ է պահպանել ժողովրդային միասնութիւնը եւ գործակցային ոգին՝ կանխելու յաջողութեանը խանգարող ցանկացած կասկածելի փորձ:

Հ․Յ․Դ․ պատուիրակութիւնը Հայաստանի վարչապետին նաեւ փոխանցեց Լիբանանի հայութեան անցեալէն փաստուած պատրաստակամութիւնն ու վճռականութիւնը՝ գործնական արձագանգելու Արցախի ու Հայաստանի հզօրացման ջանքերուն:

Վարչապետ Փաշինեան իր ուրախութիւնը յայտնեց կայացած հանդիպման կապակցութեամբ՝ նշելով, որ իր համար Լիբանանի հայութիւնն ու երիտասարդութիւնը յատուկ նշանակութիւն ունին, մանաւանդ՝ յեղափոխութեան ընթացքին անոնց ունեցած զօրակցութեան քայլերու կապակցութեամբ:

Փաշինեանը նշեց նաեւ, որ անհրաժեշտ է երկխօսութեան ու գործակցութեան շարունակութիւնը եւ քաղաքական առողջ ուժերու միասնութեան ճիգի արդիւնաւորումը՝ ի սպաս յեղափոխութեան յաջողութեան: