«Այսօրուայ Մեր Գերագոյն Խնդիրը Արցախն Է», Կը Յայտնէ Հրանդ Մարգարեան

Հ․Յ․Դ․ Բիւրոյի ներկայացուցիչ Հրանդ Մարգարեան Թեհրան այցելութեան ժամանակ  հարցազրոյց մը ունեցաւ «Ալիք» օրաթերթին հետ եւ յատկապէս անդրադարձաւ Արցախի հիմնահարցին մասին։

«Ես գիտեմ, որ հիմա այն ինչ որ պէտք է ասեմ, որոշ ուժեր պէտք է փորձեն հեգնել, թէ ամէն անգամ, որ ներքին իրավիճակը անկայունանում է, ներքին օրակարգեր են առաջ գալիս, մենք փորձում ենք ուշադրութիւնը շեղել, իրենց կարծիքով` դէպի Արցախ: Բայց հարցը նրանում է, որ Արցախը, դեռ շարունակում է մնալ մեր գլխաւոր հարցը, մեր գերխնդիրը: Եթէ մենք կորցնենք Արցախը կամ Արցախի հարցում ունենանք կորուստներ, դա նշանակում է, որ վերջին 28 տարիների մեր անկախութեան այս ճիգն ու ջանքը ի զուր է լինելու կամ գրեթէ ի զուր է լինելու: Հարցը լուրջ է եւ սա բնական է, երբ Հայաստանում խնդիր կայ, մեր արտաքին քաղաքականութեան մէջ խնդիր կայ, Ատրպէյճանը աշխուժանում է, ստեղծուած առիթը օգտագործում իր ծրագրերը յաջողեցնելու համար: Դա մենք պէտք է թոյլ չտանք, պէտք է հասկանանք, որ այսօրուայ մեր գերագոյն խնդիրը Արցախն է, Արցախի անվտանգութեան ապահովումը, ինչը նշանակում է` մենք պէտք է կարողանանք զօրաշարժի ենթարկել մեր ողջ ներքին կարողականութիւնը` Հայաստանում, Արցախում եւ սփիւռքում, ինչպէս նաեւ յարաբերական աշխատանքների մէջ եւ բոլոր-բոլոր բնագաւառներում, որպէսզի Արցախի հարցում մենք նահանջ չարձանագրենք», շեշտեց Մարգարեան:

Յաւելեալ բացատրութիւններ տալով, ան եզրակացուց,- «Արցախից պէտք է ամուր ձայն լսուի, վճռական ձայն պէտք է լսուի, Արցախից ազգային միասնականութեան կոչ պէտք է հնչի, որովհետեւ սա է մեր հիմնական ներուժը, որի վրայ մենք կարող ենք յենուել եւ ոչ միայն ունեցած յաջողութիւնները ամրագրել եւ պահպանել, այլ նաեւ նոր ձեռքբերումներ ունենալ: Գլխաւոր մտահոգութիւնն այսօր` Արցախն է եւ այդ մտահոգութիւնը շինծու չէ, նոյնիսկ նրանք, որ այսօր հեգնում են, նրանք էլ ներքուստ համոզուած են, որ այդ մտահոգութիւնը իրական է»:

Be the first to comment

Leave a Reply

Your email address will not be published.


*