ՏԻԹՐՈՅԹԻ ՀԱՅ ԳԱՂՈՒԹԸ ՄԵԾ ՇՈՒՔՈՎ ԿԸ ՏՕՆԷ ՀԱՅԱՍՏԱՆԻ Ա. ՀԱՆՐԱՊԵՏՈՒԹԵԱՆ 100-ԱՄԵԱԿԸ

Յունիս 9¬ին, Տիթրոյթի հայ գաղութը համախմբուեցաւ միասնաբար տօնելու Հայաստանի Ա. Հանրապետութեան 100-ամեակը եւ տօնելու հայոց հարուստ պատմութիւնը եւ մշակոյթը։ Այս փառատօնին ներկայ էին մօտ 2,000 հանդիսատեսներ, ժամանած Տիթրոյթի բոլոր անկիւններէն։
Փառատօնը տեղի ունեցաւ Լիվոնիա քաղաքի Կըրինմիտ պատմական զբօսավային մէջ։ Ներկաները առիթը ունեցան վայելելու հայկական երաժշտութիւն, պար, ինչպէս նաեւ համեղ եւ աւանդական ուտելիքներ եւ հայկական բնաբանով արուեստի գործեր։ Այս փառատօնին մաս կը կազմէր նաեւ հայկական գորգերու մասնագէտ՝ Հրաչ Կոզիպոյուքեան, որ հետը բերած էր հին գորգեր եւ ձեռագործներ ցուցադրելու ներկաներուն եւ բացատրութիւն կու տար հետաքրքրուողներուն։
Այս փառատօնին մասնակցող երգիչներն էին Շան Պլէքմէն, Օննիկ Տինքճեան, Սոֆի Մխէյեան, Շանթ Մասոյեան եւ Գառնիկ Սարգիսեան։ Համազգային «Արաքս» պարախումբը՝ առաջնորդութեամբ պարուսոյց Նայիրի Կարապետեանի, ելոյթ ունեցաւ «Ճէյրան Պալա», «Գետաշէն», «Տօնական», «Զանգեզուրի», «Շիրակի Շարան», «Տաւիղ» եւ այլ պարերով։ Պարեցին նաեւ Հայաստանի երգը Սոֆի Մխէյեանին հետ, եւ «Հայոց Մարտիկներ»ը՝ Գառնիկ Սարգիսեանի ընկերակցութեամբ։
Յայտագիրը սկսաւ կէսօրէ ետք ժամը 2։00ին, բայց պաշտօնական բացումը տեղի ունեցաւ ժամը 6։00ին, Հ.Մ.Ը.Մ.¬ի Սկաուտներու Ամերիկեան եւ Հայկական դրօշակներու ներկայացումով եւ զոյգ քայլերգներու երգեցողութեամբ։
Օրուան բանախօսն էր Հայ Յեղափոխական Դաշնակցութեան Բիւրոյի անդամ Խաչիկ Մուրատեան, որ իր իր խօսքով խրախուսեց բացմութիւնը եւ կոչ ուղղեց ներկայ երիտասարդութեան՝ քաջալերելով իրենց ոգեւորութիւնն ու մասնակցութիւնը այս պատմական բնոյթ ունեցող ձեռնարկին։ Յայտագրի վերաջաւորութեան տեղի ունեցաւ վիճակահանութիւն, օրուան մրցանակն էր Ford Escape ինքնաշարժ կամ $5,000։ Վիճակահանութեան յանձնախումբի պատասխանատուութիւնը ստանձնած էին՝ Սօսի Փալանճեան եւ Քէրըն Չոփճեան։ Օրուան մրցանակը շահեցաւ գաղութէս Պետրոս Պօղոսեան։
Ձեռնարկին յաջողութիւնը մեծապէս ոգեւորեց Տիթրոյթի հայ գաղութը։ Ոչ անձրեւը եւ ոչ ալ հովը կրցաւ կեցնել հայը միասնաբար տօնելու այս պատմական օրը։ Յատուկ շնորհակալութիւն այս փառատօնին կազմակերպիչ յանձնախումբին, կամաւոր աշխատողներուն, մասնակցող միութիւններուն եւ կազմակերպութիւններուն եւ նուիրատուներուն։

Be the first to comment

Leave a Reply

Your email address will not be published.


*