Հ.Հ. Նախագահ Արմէն Սարգսեան Այցելեց Ուաշինկթըն

 

ՈՒԱՇԻՆԿԹԸՆ.- Եռօրեայ այցելութեամբ Միացեալ Նահանգներ գտնուող Հայաստանի Հանրապետութեան նախագահ Արմէն Սարգսեան, Յունիս 26-ին, մասնակցեցաւ Ծերակոյտի Տըրքսեն մասնաշէնքին մէջ տեղի ունեցած Հայաստանի առաջին հանրապետութեան 100-ամեակին նուիրուած ընդունելութեան: Միացեալ Նահանգներու մէջ Հ.Հ. դեսպանութեան, Հ.Յ.Դ. Արեւելեան Ամերիկայի կեդրոնական կոմիտէի ու Ուաշինկթընի Հայ Դատի գրասենեակին համատեղ ջանքերով կազմակերպուեցաւ հանդիսաւոր արարողութիւն:
Հանդիսութեան ընթացքին Հ.Հ. նախագահը հանդէս եկաւ ելոյթով մը, որուն ընթացքին մասնաւորապէս անդրադարձաւ Հայաստանի առաջին հանրապետութեան դերին ու նշանակութեան, կարեւոր համարեց Հայաստանի եւ Միացեալ Նահանգներու միջեւ ձեւաւորուած բարեկամական յարաբերութիւններն ու անոնց խորացման անհրաժեշտութիւնը:
«Մեր այսօրուան ուղերձը յստակ է: Մենք պէտք է յաղթենք: Մենք ոչ միայն կրնանք նոր Հայաստան կառուցել, այլեւ, որմով բոլորս հպարտ պիտի ըլլանք ու աշխարհի վրայ մեզ հպարտ պիտի զգանք, որ հայ ենք», նշեց նախագահը:

Նաեւ խօսք առին Ա․Մ․Ն․ Արեւելեան շրջանի Առաջնորդական փոխանորդ Անուշաւան Դանիէլեան, Խաչիկ Մուրատեան (Հ.Յ.Դ. Բիւրօ), Հայկ Օշական (Ա.Մ.Ն.-ի Արեւելեան շրջանի Հ.Յ.Դ.  Կեդրոնական Կոմիտէ) եւ Արամ Համբարեան (Հայ Դատի Ուաշինկթընի կեդրոնական գրասենեակ):

Ընդունելութեան մասնակցեցան ամերիկահայ համայնքի  տարբեր շրջաններէ ժամանած քանի մը հարիւր անդամներ, Քոնկրէսի ու Ծերակոյտի անդամներ եւ վարչակազմի բարձրաստիճան պաշտօնեաներ:

Նախագահ Սարգսեան հանդիպում ունեցաւ Համաշխարհային դրամատան եւ Միջազգային դրամական ֆոնտի հայ աշխատակիցներու ակումբի անդամներէն խումբի մը հետ: Ան նաեւ այցելեց Միացեալ Նահանգներու 26-րդ նախագահ Թէոտոր Ռուզվելթի կղզիի յուշահամալիր եւ ծաղկեպսակ զետեղեց յայտնի պետական գործիչին յիշատակին, որ իր պաշտօնավարման տարիներուն հանդէս եկած էր Օսմանեան կայսրութեան մէջ հայերու ու քրիստոնեայ փոքրամասնութիւններու իրաւունքներու պաշտպանութեամբ: Թէոտոր Ռուզվելթ նաեւ յայտնի էր Ցեղասպանութենէն տուժածներու իրաւունքներու պաշտպանութեան հարցին մէջ իր համարձակ դիրքորոշումով:

Յունիս 28-ին, տեղի ունեցաւ Ա․Մ․Ն․-ի մօտ Հայաստանի Ա․ Հանրապետութեան դեսպան Արմէն Գարոյի կիսանդրիին բացման հանդիսութիւնը։

Նախապէս, Հայաստանի նախագահը նախաճաշեց Քոնկրէսի Հայկական հարցերով յանձնախումբի ղեկավար կազմին հետ: Ան կարեւոր նկատեց, թէ երկկողմանի տնտեսական գործակցութեան խթանման վերաբերող իրաւապայմանագրային դաշտի ընդլայնումը, ինչպէս նաեւ ընդգծեց Հայաստանի շահագրգռուածութիւնը` Հազարամեակի մարտահրաւէր ծրագիրին հետ աշխատելու վերաբերեալ:

 

 

Be the first to comment

Leave a Reply

Your email address will not be published.


*