Արցախի Մէջ Բողոքի Ցոյցեր

ՍՏԵՓԱՆԱԿԵՐՏ.- Յունիս 2-էն ի վեր, Ազատամարտիկներու փողոցին վրայ բողոքի ցոյցեր տեղի կ՛ունենան, Արցախի ազգային անվտանգութեան ծառայութեան աշխատակիցներու մասնակցութեամբ տեղի ունեցած ընդհարումնեերուն իբրեւ հակազդեցութիւն:

Նախաձեռնող խումբի անդամները ներկայացուցած են նախօրէին նախագահ Բակօ Սահակեանի հետ տեղի ունեցած հանդիպման ընթացքին քննարկուած հարցերուն շուրջ մանրամասնութիւնները:

Մասնաւորապէս՝ շարժման նախաձեռնող խումբի անդամ Դաւիթ Սիմոնեան նշեց, որ նախագահ Սահակեան խոստացած է կատարել փոփոխութիւններ: «Հանդիպման ընթացքին բարձրացուած է ուժային կառոյցներու մէջ փոփոխութիւն կատարելու մասին հարցը, որ սակայն միանշանակ չէ ընդունուած նախագահին կողմէ: Բակօ Սահակեան մեզի խոստացած է, որ իր կողմէ պիտի նախաձեռնուին համակարգային բարեփոխումներ, որոնք, իր պատկերացումով, կապուած են ո՛չ թէ անձերու փոփոխութեան, այլ՝ ընդհանուր քաղաքականութեան եւ ամենօրեայ աշխատանքի տեսքով: Նախագահին կողմէ առաջարկ եղած է նաեւ ստեղծելու հանրային խորհուրդ, ուր ընդգրուած պիտի ըլլան նաեւ մեր նախաձեռնութեան խումբ մը մասնակիցներ, որպէսզի հանրային օրակարգի խնդիրներուն հրատապ լուծումներ տրուին»,- նշեց Սիմոնեան եւ դիմելով հաւաքուած ցուցարարներուն, ըսած է, թէ այժմ իրենք պէտք է որոշեն, թէ որքան կը բաւարարեն այս պայմանները:

Բողոքի մասնակիցներուն մօտ յառաջացած դժգոհութենէն, սակայն, պարզ դարձած է, որ իրենց չի բաւարարեր բանակցութիւններուն արդիւնքները եւ իրենց ներկայացուցած պահանջները կը շարունակեն մնալ ուժի մէջ:

Ազգային ժողովի ընդիմադիր պատգամաւոր Հայկ Խանումեան, որ նշեց, որ ցուցարարներուն կողմէ դրուող պահանջները ընդունելի են լայն շրջանակներու համար, եւ պէտք է հարցերը գտնեն արագ, ճիշդ լուծում՝ յետագայ խնդիրներէն խուսափելու համար:

Այս առիթով դատախազութեան կողմէ հրապարակուած հաղորդագրութեան մէջ կը նշուի, որ Յունիս 1-ին, մօտաւորապէս երեկոյեան ժամը 7:15-ին, Ստեփանակերտ քաղաքի Բաղրամեան-2բ հասցէին դիմաց վիճաբանութիւն տեղի ունեցած է` մէկ կողմէ, Դաւիթ Յարութիւնեանի եւ Ալպերթ Աւետիսեանի, միւս կողմէ, Մհեր Մուսայէլեանի (ԱԱԾ աշխատող), Մխիթար Մուսայէլեանի, Սերկէյ Մուսայէլեանի, Գուրգէն Հայրապետեանի եւ Վարդան Ղարամեանի (ԱԱԾ աշխատող) միջեւ: Վիճաբանութեան ընթացքին կողմերը հարուածած են զիրար` պատճառելով մարմնական վնասուածքներ:

Արցախի Հանրապետութեան Ազգային ժողովին մէջ ստեղծուած է հանրային հնչեղութիւն ստացած հարցերու ուսումնասիրման քննիչ յանձնախումբ:

Արցախի պաշտպանութեան նախարարութիւնը եւս այս առնչութեամբ յայտարարութիւն հրապարակած է եւ նշած. «Նկատի ունենալով սահմանագիծէն ոչ այնքան հեռու գտնուող վայրի մէջ տեղի ունեցող որեւէ իրադարձութիւն, որ կրնայ թէկուզ փոքր տոկոսով սպառնալ ժողովուրդին անվտանգութեան եւ անդրադարձ ունենալ սահմանային իրադրութեան վրայ, Արցախի Հանրապետութեան պաշտպանութեան նախարարութիւնը խորին մտահոգութիւն կը յայտնէ այդ եւ անոր յաջորդած դէպքերուն զարգացման վերաբերեալ»: Նախարարութիւնը աւելցուցած է, որ, թէեւ իւրաքանչիւր քաղաքացի սահմանադրական իրաւունքը ունի դատապարտելու բռնութեան որեւէ դրսեւորում, բայց եւ այնպէս Արցախի Հանրապետութեան պաշտպանութեան նախարարութիւնը կը յորդորէ զերծ մնալ արդէն իսկ արտաքին սպառնալիքներու տակ գտնուող մեր երկրի ներքաղաքական իրավիճակը արհեստականօրէն սրելու վտանգաւոր քայլերէ եւ հարցի հանգուցալուծումը դիտարկել բացառապէս իրաւական հարթութեան վրայ:

 

Be the first to comment

Leave a Reply

Your email address will not be published.


*