Հ.Հ. Կառավարութեան Անդամներու Երդման Արարողութիւն

ԵՐԵՒԱՆ.- Հայաստանի կառավարութեան անդամները նորանկախ Հայաստանի պատմութեան մէջ առաջին անգամ Հայաստանի Հանրապետութեան նախագահական նստավայրին մէջ իրենց պարտականութիւնները բարեխղճօրէն կատարելու երդում տուին:
Առաջին երդում տուողը եղաւ վարչապետ Նիկոլ Փաշինեան, ապա կառավարութեան բոլոր անդամները:
Երդման բովանդակութիւնը հետեւեալն էր. «Յանուն համազգային նպատակներու իրականացման եւ հայրենիքի հզօրացման` կ՛երդնում բարեխղճօրէն կատարել ժողովուրդին առջեւ ունեցած պարտաւորութիւններս, պահպանել Հայաստանի Հանրապետութեան սահմանադրութիւնը եւ օրէնքները, նպաստել Հայաստանի հանրապետութեան գերիշխանութեան եւ շահերու պահպանման, հաւատարիմ մնալ կառավարութեան անդամի բարձր կոչումին»:
Միւս կողմէ, վարչապետ Նիկոլ Փաշինեան յայտարարեց, որ Հայաստանի մարզպետներու կազմը ամբողջութեամբ պիտի փոխուի: Փաշինեան այս յայտարարութիւնը կատարեց Հայաստանի նախագահական նստավայրին մէջ կառավարութեան անդամներու երդմնակալութեան արարողութենէն ետք լրագրողներուն հետ զրոյցի ընթացքին: «Կը կարծեմ, որ մարզպետներու կազմը ամբողջութեամբ պիտի փոխուի», նշեց Փաշինեան: Անդրադառնալով Յատուկ քննչական ծառայութեան եւ քննչական կոմիտէի ղեկավարներու փոփոխութեան կարելիութեան` Նիկոլ Փաշինեան ընդգծեց, որ այդ հարցին մէջ օրէնսդրական խնդիրներ կան: «Մենք այդ հարցերը օրէնքի ծիրին մէջ պիտի դիտարկենք», յայտնեց Փաշինեան, որ նաեւ անդրադարձաւ դատական համակարգի խնդիրներուն մասին եւ ներկայացուց անոնց լուծման ուղիները: Փաշինեան ընդգծեց, որ Հայաստանի իշխանութեան ոեւէ ներկայացուցիչ հրահանգ չի տար դատարաններուն այս կամ այն որոշումը կայացնելու հարցին մէջ:
«Ատիկա ինծի համար կարմիր գիծ է, եւ չեմ կրնար թոյլ տալ, որ մեր իշխանութեան որեւէ ներկայացուցիչ հատէ այդ կարմիր գիծը, որովհետեւ անկախ դատական համակարգ ունենալու համար պէտք է ապահովել երկու բան` առաջինը կարելիութիւն տալ դատաւորներուն իրենց լիազօրութիւններու ծիրին մէջ կայացնել որոշումներ եւ երկրորդ` փակենք անոնց կողմէ կաշառքով հարցեր լուծելու բոլոր ճամբաները: Ես կ՛ուզեմ յստակօրէն արձանագրել, որ Հայաստանի մէջ ոեւէ մէկը իրաւունք չունի դատական համակարգի գործերուն միջամտել, նոյնիսկ դատական համակարգի ներսի մարդիկը եւ դատաւորները, եթէ իրենք իրենց վրայ վերցուցած են պատասխանատուութիւն ստանձնելու այդ պաշտօնը, ուրեմն պէտք է վերցնեն պատասխանատուութիւն կայացնելու վճիռներ:… Պէտք է խուսափիլ այն վիճակէն, երբ կալանավայրերուն մէջ լեփ-լեցուն է եւ ուր կալանաւորները հերթով կը քնանան: Ասոնք ուղղակի խոշտանգման երեւոյթներ են, կ՛ուզեմ յստակ ուշադրութիւն դարձնել այս խնդիրին վրայ: Ես կը պաշտպանեմ արդարադատութեան նախարարին դիրքորոշումը. ատիկա է` կալանաւորներու թիւը պէտք չէ գերազանցէ կալանավայրերուն մէջ քնանալու տեղերը», եզրակացուց Փաշինեան:

Be the first to comment

Leave a Reply

Your email address will not be published.


*