Հ.Յ.Դ. Լիբանանի Կեդրոնական Կոմիտէն Յայտարարեց Իր Թեկնածուները


ՊԷՅՐՈՒԹ («Ազդակ»).- Մարտ 22-ին, Հ.Յ.Դ. Լիբանանի Կեդրոնական կոմիտէին հրաւէրով տեղի ունեցաւ մամլոյ ասուլիս մը, որուն ընթացքին յայտարարուեցան, յառաջիկայ Մայիս 6-ին տեղի ունենալիք  երեսփոխանական ընտրութիւններուն Հ.Յ.Դ.-ի թեկնածուները,  «Միասնաբար` Ամբողջ Լիբանանի Համար» կարգախօսին լոյսին տակ:

Հ.Յ.Դ. Լիբանանի Կեդրոնական կոմիտէն յայտարարեց Մեթնի եւ Պէյրութի Ա. ընտրաշրջանի իր թեկնածուները` աւելցնելով, որ Զահլէի թեկնածուին պարագան տակաւին քննարկելի է:

Թեկնածուներու յայտարարութեան կողքին ներկայացուեցաւ նաեւ Հայ յեղափոխական դաշնակցութեան նախընտրական ծրագիրը` ներկայութեամբ ներկայ եւ նախկին նախարարներու, երեսփոխաններու, Կեդրոնական կոմիտէի անդամներուն եւ մեծ թիւով կուսակցականներու:

Լիբանանի եւ Հ.Յ.Դ.-ի քայլերգներուն յոտնկայս ունկնդրութենէն ետք, զբօսաշրջութեան նախարար Աւետիս Կիտանեան յայտնեց, որ Հ.Յ.Դ.-ի համար սովորութիւն եւ աւանդութիւն եղած է երեսփոխանական ընտրութիւններու թեկնածուներուն անունները յայտարարել կատարեալ համեստութեամբ, առանց հսկայ սրահներու եւ բազմութիւններու ներկայութեան, որովհետեւ Հ.Յ.Դ.-ն իր ուժը ցոյց կու տայ ընտրութիւններուն օրը:

Նախարար Կիտանեան երեսփոխան Բագրատունին բեմ հրաւիրեց` ներկայացնելու համար Հ.Յ.Դ.-ի ընտրական ծրագիրն ու թեկնածուները: Ան նշեց, որ ՀՅԴ Լիբանանի Կեդրոնական կոմիտէն այսպիսով մեկնարկը կը կատարէ իր տեղեկատուական քարոզարշաւին` աւելցնելով, որ Հ.Յ.Դ. ընտրամեքենային աշխատանքը յատկապէս գումակային առումով մնայուն աշխատանքի մէջ է ամբողջ տարուան ընթացքին:

Երեսփոխան Բագրատունի, ողջունեց ներկաները: «Քաղաքական կեանքին մէջ մեր գործունէութիւնը պտոյտ մը չէ եղած, այլ` ժողովուրդի մը պատմութիւնը, որ պայքարած է, հալածուած եւ աւելի քան մէկուկէս միլիոն նահատակ զոհաբերած ամբողջ մարդկութեան բագինին: Մենք այն կուսակցութիւնն ենք, որ իր հիմնուած օրէն զօրակցած է լիբանանեան պետութեան եւ պետական հաստատութիւններուն, ինչպէս նաեւ հանրապետութեան իրերայաջորդ նախագահներուն, այն ժամանակէն, երբ Լիբանան Արեւելքի Զուիցերիան էր», ըսաւ ան նշելով, թէ ընտրութիւններու կազմակերպումին առումով փոփոխութիւնը եւ բարգաւաճումը պահանջուած են քաղաքական եւ թեքնիք մակարդակներուն վրայ:

«Կոչ կ՛ուղղենք լիբանանահայութեան եւ մեր ուղիին վստահող իւրաքանչիւր քաղաքացիի 6 մայիսին խիտ շարքերով ուղղուելու քուէատուփ եւ քուէարկելու ի նպաստ ՀՅԴ-ի` փաստելու համար, որ կը գործենք միասնաբար` ամբողջ Լիբանանի համար: Յառաջիկայ 6 մայիսը մեր հաւատարմութեան եւ պատկանելիութեան ուխտը վերանորոգելու թուականն է: Միասնաբար` ամբողջ Լիբանանի համար: Միասնաբար` ազատութիւններու Լիբանանին, ուրիշը ընդունելու Լիբանանին, հաւասարութեան եւ արդարութեան Լիբանանին, երիտասարդութեան եւ աշխատանքի առիթներու Լիբանանին, երիտասարդ ներուժի եւ երիտասարդ ղեկավարներու Լիբանանին, արդիականութեան Լիբանանին, հաւասարակշռուած բարգաւաճման Լիբանանին, դալար Լիբանանին, գիտութեան եւ մշակոյթի Լիբանանին, իր կիներով եւ տղամարդոցմով հզօր Լիբանանին, քաղաքացիութեան Լիբանանին համար: Այո՛, միասնաբար կը կերտենք ապագայ Լիբանանը: Միասնաբար` ամբողջ Լիբանանի համար», յայտնեց Բագրատունի, որ իր խօսքին աւարտին, երեսփոխան Բագրատունի յայտարարեց թեկնածուները. Յակոբ Բագրատունի` Մեթն, Յակոբ Թերզեան, Ալեքսանտր Մաթոսեան եւ Սերժ Չուխատարեան` Պէյրութի Ա. ընտրաշրջան:

 

 

 

 

Be the first to comment

Leave a Reply

Your email address will not be published.


*