Hairenik Weekly Newspaper

Թեհրան.- Վաստակաւոր Ճարտարապետ Վարուժան Առաքելեան Մեծարուեցաւ

ԹԵՀՐԱՆ («Ալիք»).- Փետրուար 16-ին, «Արարատ» կեդրոնի «Կոմիտաս» սրահին մէջ, տեղի ունեցաւ մեծարանքի եւ գնահատանքի երեկոյ նուիրուած ազգային-հասարակական գործիչ եւ վաստակաւոր ճարտարապետ Վարուժան Առաքելեանին:

Այս յոբելեարին համար ժամանած էին մեծարելու ոչ միայն իր միութենական ու գաղափարական ընկերները, այլեւ հանրածանօթ մասնագէտներ: Ծրագրի ընթացքին, ներկայացուեցաւ վաւերագրական մը, որուն մէջ կը ներկայացուէր վաստակաւոր ճարտարապետ Վարուժան Առաքելեան անձը: Նշենք թէ, անոր ժրաջան աշխատանքի արդիւնք, կարելի եղած է ոչնչացումէն փրկել Ատրպատական նահանգին մէջ գտնուող պատմական Ծործորի վանքը:

Բազմաթիւ հրաւիրեալներ խօսք առին, որոնց կարգին Հայ Մարմնակրթական «Արարատ» կազմակերպութեան Կեդրոնական վարչութեան նախագահ ճարտարագէտ Գէորգ Վարդան, Իրանի պատմական եկեղեցիների պահպանման կեդրոնի տնօրէն՝ Շեռլի Աւետեան, Հայաստանի ճարտարապետական ազգային հիմնադրամի տնօրէն Աշոտ Գրիգորեան, Հայաստանի «Էրեբունի» թանգարանի տնօրէն եւ «ԻԿՈՄՈՍ»-ի Հայաստանի կոմիտէի նախագահ Գագիկ Գուրջեան, «Ալիք» օրաթերթի արտօնատէր Ալպերթ Աճեմեան, Իրանի պատմական եկեղեցիների պահպանման կեդրոնի խորհրդատու Թաղիզադէն, Իրանի խորհրդարանէն ներս, Թեհրանի եւ հիւսիսային իրանահայութեան պատգամաւոր Կարէն Խանլարեան, Իրանում Հայաստանի Հանրապետութեան արտակարգ եւ լիազօր դեսպան Արտաշէս Թումանեան, նաեւ կազմակերպիչ յանձնախմբի անունով՝ Հենրիկ Խալոյեան եւ Հայաստանի Հանրապետութեան կառավարութեան առընթեր քաղաքաշինութեան պետական կոմիտէի Ալեքսանդր Թամանեանի անուան ճարտարապետութեան ազգային թանգարանի կողմէն Արմէն Մինասեան:

Գեղարուեստական բաժինով, ելոյթներով հանդէս եկան մաէսթրօ Ռազմիկ Օհանեանի ղեկավարութեամբ «Օհանեան» լարային նուագախումբը, նաեւ յոբելեարի 10-ամեայ թոռնիկ՝ Վարդան Առաքելեանը, որ հանդէս եկաւ դաշնամուրային կատարումով: Իրանի Հայ ճարտարապետներու եւ ճարտարագէտներու միութեան գնահատագիրը յոբելեարին յանձնուեցաւ միութեան նախագահ Վարուժան Եդգարեանի կողմէ:

Ծրագրի աւարտին ընթերցուեցաւ Թեհրանի թեմի Առաջնորդ Տ. Սեպուհ արք. Սարգսեանի եւ Ատրպատականի հայոց թեմի Առաջնորդ Տ. Գրիգոր եպս. Չիֆթճեանի յղած ուղերձները: