Ներկայացուցիչներու Պալատի Անդամներ Կը Միանան Արցախի Եւ Հայաստանի Օժանդակութեան Կոչին


ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը տեղեկացնէ, թէ Միացեալ Նահանգներու Ներկայացուցիչներու տան 37 անդամներ միացած են Քոնկրէսի Հայկական հարցերով յանձնախումբի համանախագահ, Ներկայացուցիչներու Տան անդամ Ֆրանք Փալոնին` կոչ ուղղելով աջակցելու Արցախի եւ Հայաստանի համար 2019 ելեւմտական տարուան ընթացքին 70 միլիոն տոլարի օժանդակութեան թղթածրարին:
Նախապէս հաղորդուած էր, որ Միացեալ Նահանգներու Քոնկրէսի Հայկական հարցերով յանձնախումբը Ներկայացուցիչներու Տան արտաքին օժանդակութեան յատկացումներու յանձնախումբի նախագահ Հալ Ռաճըրզին եւ յանձնախումի անդամ Նիթա Լօուէին կոչ ուղղած է 2019-ի ելեւմտական տարուան ընթացքին աջակցելու Արցախի եւ Հայաստանի համար 70 միլիոն տոլարի օժանդակութեան թղթածրարին: Հայկական հարցերով յանձնախումբին առաջարկած գումարն ու քաղաքականութեան առաջնահերթութիւնները կը համապատասխանեն անցեալ ամիս Ամերիկայի Հայ դատի յանձնախումբին արտաքին օժանդակութեան մասին օրէնքի նախագիծի մշակումով զբաղող յանձնախումբին ներկայացուցած նամակով առաջարկուած օժանդակութեան ծաւալներուն:
Յանձնախումբը մասնաւորաբար խնդրած է 6 միլիոն տոլար տրամադրել Արցախին` ականազերծման եւ հաշմանդամներու օժանդակութեան համար, 4 միլիոն տոլար` խաղաղութեան աջակցութեան համար, ինչպէս նաեւ 30 միլիոն տոլար Հայաստանին` իբրեւ տնտեսական օժանդակութիւն, 10 միլիոն տոլար` իբրեւ զինուորական օժանդակութիւն, 20 միլիոն տոլար` իբրեւ Միջին Արեւելքէն գաղթականներու ընդունման համար օժանդակութիւն: Յանձնախումբը խնդրած է նաեւ զինուորական օժանդակութիւն չտրամադրել Ատրպէյճանին:*
«Մենք կ՛ուզենք անգամ մը եւս մեր երախտագիտութիւնը յայտնել քոնկրէսական Փալոնին, Հայկական հարցերով յանձնախումբի ղեկավարութեան մէջ անոր գործընկերներուն եւ բոլոր անոնց, որոնք միացած են Արցախի եւ Հայաստանի համար «Խաղաղութեան եւ բարգաւաճման» օժանդակութեան թղթածրարին աջակցելուն», յայտնեց Ամերիկայի Հայ Դատի յանձնախումբի գործադիր տնօրէն Արամ Համբարեան:

Be the first to comment

Leave a Reply

Your email address will not be published.


*