ՓԱՐԻԶ.- Ֆրանսահայ Կազմակերպութիւնները Համակարգող Խորհուրդի Տարեկան Ընթրիք՝ Ներկայութեամբ Նախագահ Մաքրոնի


ՓԱՐԻԶ («Նոր Յառաջ», «Նուվել Տ՛արմենի»).- Երեքշաբթի, Յունուար 30-ի երեկոյեան, «Հօթէլ Տիւ Քոլեքսիոնէօր» շքեղ պանդոկի սրահին մէջ տեղի ունեցաւ Ֆրանսահայ կազմակերպութիւնները համակարգող խորհուրդի տարեկան ընթրիքը:
Հինգ հարիւրէ աւելի հրաւիրեալներ ներկայ էին այս հանդիսութեան, որ կը վայելէր Ֆրանսայի նախագահ Էմանուէլ Մաքրոնի հովանաւորութիւնը:
Ներկաներու շարքին էին նաեւ Փարիզի քաղաքապետուհի Անն Հիտալկօն, շրջանի խորհուրդի նախագահուհի Վալերի Փեքրեսը, նաեւ Հօ-տը-Սէն շրջանի Նահանգային խորհուրդի նախագահ Փաթրիք Տէվէճեանը, Լիոնի քաղաքապետ Ժորժ Քէփէնէկեանը, նոյնպէս քաղաքական աշխարհէն՝ Լիւք Գարվունասը, Ռընէ Ռուքէն, Վալերի Պուայէն, հայ երեսփոխաններ Տանիէլ Ղազարեանը, Ժագ Մարիլոսեանը, Հայաստանի դեսպան Վիգէն Չիտեչեանը, Հայաստանի մէջ Ֆրանսայի դեսպան Ճոնաթան Լաքոթը, Ֆրանսայի մէջ Արցախի Հանրապետութեան մնայուն ներկայացուցիչ Յովհաննէս Գէորգեանը, աշխարհէն՝ Ֆրանսայի Հայոց թեմի նախկին եւ այժմու ներկայի առաջնորդներ Նորվան արք. Զաքարեանը եւ Վահան եպիսկ. Յովհաննէսեանը: Յատուկ հրաւէրով ներկայ էր, նաեւ Թուրքիոյ խորհրդարանի հայազգի երեսփոխան Կարօ Փայլանը, որ Փարիզի քաղաքապետուհի Անն Հիտալկոյէն ստացաւ «Կրան Մերվէյ» մետալը, որ հիմնադրուած է 1948-ին եւ կը շնորհուի սեփական մասնագիտութեամբ երկարատեւ եւ արդիւնաւէտ աշխատանքի համար: Այս պատուոյ մետալի թեկնածուները կ՝որոշեն քաղաքային եւ շրջանային խորհուրդի պատգամաւորները:

Ձախէն աջ՝ Կարօ Փայլան, Արա Թորանեան, Էմանուէլ Մաքրոն եւ Մուրատ Փափազեան

«Ձեր կեանքը մշտական վտանգի մէջ է: Շնորհակալկութիւն այն բանին համար, որ դուք կ՝ընէք: Դուք ժողովրդավարութեան հերոս էք, հերոս, որ կը պաշտպանէ մարդու իրաւունքները: Ամէն անգամ, երբ մեր կարիքը ունենաք, հայերը ձեր կողքին պիտի ըլլան, Փարիզը ձեր կողքին պիտի ըլլայ»,- յայտնեց Հիտալկօ, պատուոյ մետալը յանձնելու ժամանակ:
Ներկայ էին նաեւ արուեստի աշխարհէն աստղեր, որոնց կարգին Քոսթա Կավրաս, Անտրէ Մանուկեան, Լեւոն Սայեան, Ալէն Թերզեան, Մաթիէօ Մատէնեան:
Արուեստագէտ Անտրէ Մանուկեան օրուան հանդիսավարն էր: Ան այս պաշտօնը կատարեց յատուկ ոճով եւ երգիծանքով: «Մեծ մօրս կը պարտիմ լեռներու նկատմամբ անսահման սէրս։ Ա՛ն, երկար քայլարշաւի ախոյեան էր։ Ամասիայէն Տէր-Զօր 1.000 քմ. քալած է իր քոյրերուն հետ, որոնց երեսները շաղախած է ցեխով, որպէսզի չառեւանգեն… Բայց այս պատմութիւնները ծանօթ են բոլորիդ, որովհետեւ անոնք՝ այս սրահին մէջ ներկայ իւրաքանչիւր հայու պատմութիւններն են», ըսաւ Մանուկեան:
Նաեւ, ձեռամբ Ֆրանսահայ կազմակերպութիւնները համակարգող խորհուրդի համանախագահ Արա Թորանեանի՝ «Խիզախութեան շքանշան»-ը յանձնուեցաւ փաստաբան եւ պատմաբան Սերժ Քլարսֆելտին եւ իր կնոջ՝ Պէաթային, որոնք շարունակ պայքարած են նացիներու կողմէ կատարուած ոճիրներուն եւ դատապարտման համար: «Միշտ եղած ենք հայ ժողովուրդի կողքին։ Կը պայքարինք, որպէսզի Իսրայէլ իր կարելին ընէ ճանչնալու համար Հայոց ցեղասպանութիւնը։ Նաեւ կը յուսանք Ֆրանսայի մէջ հաստատումը օրէնքի մը, որ պատժելի կը դարձնէ Հայոց ցեղասպանութեան ժխտումը, այնպէս՝ ինչպէս պաշտպանուած է հրեայ համայնքը», յայտնեց Սերժ Քլարսֆելտ:
Ֆրանսահայ կազմակերպութիւնները համակարգող խորհուրդի համանախագահներ՝ Արա Թորանեան եւ Մուրատ Փափազեան Ֆրանսայի Հանրապետութեան նախագահէն պահանջեցին նաեւ դատապարտել Թուրքիան, որ կը սպառնայ փոքրամասնութիւններուն, ներառեալ՝ հայութեան: Անոնք նաեւ կոչ ըրին այցելելու Արցախ:
Նախագահ Մաքրոնի խօսքը տեւեց աւելի քան երեսուն վայրկեան: Ան յատկապէս շեշտեց, թէ յանձնառու պիտի ըլլայ «Հայոց ցեղասպանութեան ոգեկոչման օր»-ի մը արձանագրութեան, ինչ որ իր ընտրապայքարի խոստումներէն էր: «Արդարութեան եւ ճանաչման ի նպաստ պայքարը՝ մե՛ր պայքարն է: Զայն կը մղենք յիշողութեան ճամբով՝ պետական օրացոյցին մէջ Ցեղասպանութեան ոգեկոչման օր մը արձանագրելով», ըսաւ ան։ Հանրապետութեան նախագահը նաեւ յայտնեց Հայոց ցեղասպանութեան ժխտումի պատժելիութեան անհրաժեշտութիւնը, աւելցնելով՝ էական է, որ յառաջիկայ ամիսներուն երկրին պատկան մարմինները կրկինզբաղին այդ հարցով:
Նախագահ Մաքրոն խոստացաւ նաեւ օգտակար ըլլալ Փարիզի մէջ Յիշողութեան եւ մշակոյթի հայկական տան մը հաստատման ծրագրի իրագործման, որ Փարիզի քաղաքապետուհին՝ Անն Հիտալկօ նշած էր իր խօսքին մէջ, եւ որ տարիներէ ի վեր Ֆրանսահայ կազմակերպութիւնները համակարգող խորհուրդի պատասխանատուները կը ջանան ձեռք ձգել։
Ինչ կը վերաբերի Ֆրանսա-Հայաստան յարաբերութիւններուն՝ Հանրապետութեան նախագահը կարեւոր համարեց Հայաստանի մէջ ֆրանսախօսութեան զարգացումը ու տարածումը, եւ այդ գծով ալ, Ֆրանսախօսութեան վեհաժողովը որ տեղի պիտի ունենայ Հայաստանի մէջ՝ կազմակերպչական ու մշակութային մեծ մարտահրաւէր մըն է։ Ան հրաւիրեց բոլոր Ֆրանսահայերը մասնակցելու եւ յաջողցնելու այս մեծ ծրագիրը։ Ըստ անոր՝ «Շառլ Ազնաւուր» կեդրոնը մօտ ապագային կրնայ վերածուիլ ֆրանսական մշակոյթի ճառագայթումի տան։
Ֆրանսայի նախագահը հրաւիրեց տնտեսապէս աւելի մեծ ներդրում ունենալու Հայաստանի մէջ, նկատել տալով, որ տնտեսական գործակցութիւնը քաղաքական գործակցութեան բարձունքի մակարդակին չէ։ Այս հանգամանքը նկատի առնելով, երկու նախագահները որոշած են ֆրանսախօսութեան վեհաժողովին զուգահեռ կազմակերպել ֆրանսախօս գործարարներու համաժողով մը։
Նաեւ յաճախ յիշուեցաւ «Թումօ» կեդրոնը եւ անոր մատուցած ծառայութիւնները երիտասարդութեան, ինչպէս Փարիզի քաղաքապետուհին ալ իր խօսքին մէջ բազմիցս արտայայտեց Երեւանի «Թումօ» կեդրոնին իր վրայ գործած դրական տպաւորութիւնը եւ ըսաւ, որ անկէ ներշնչուելով Փարիզի քաղաքապետարանը եւս պիտի հիմնէ «Թումօ» կեդրոն մը։ Վալերի Փեքրես եւ նախագահ Մաքրոն ալ թուային ու նորարարական արհեստագիտութիւնները առաջնահերթ նկատեցին ու այդ ուղղութեամբ օժանդակելու տրամադրութիւն յայտնեցին։ Փեքրես շրջանի համալսարաններէն մէկուն՝ Երեւանի Ֆրանսական համալսարանին հետ գործակցութեան ծրագրի մասին արտայայտուեցաւ։
«Ինչ կը վերաբերի Թուրքիոյ՝ նախագահ Էրտողանի հետ կանոնաւոր եւ պահանջկոտ երկխօսութեան ընտրութիւնը կատարած եմ, երբեմն լրասփիւռներէն հեռու։ Ձեր ըսածներէն ոչ մէկը կը թերագնահատեմ։ Էրտողանին ըսած եմ, ինչ որ կը մտածեմ։ Եւ ձեռք ձգեցինք արդիւնքներ՝ լրագրողներու ազատ արձակումով։ Շատեր կը կասկածին Թուրքիոյ հետ երկխօսութեան հիմնաւոր հանգամանքէն։ Բայց, կը կարծեմ, որ ատիկա Ֆրանսայի պատգամը պիտի դատապարտէր դատարկութեան ուղղուած պատուէր մը ըլլալու: Ահաբեկչութեան դէմ պայքարին եւ գաղթի տագնապին մէջ պէտք ունինք դաշնակիցներու, ներառեալ անոնց՝ որոնց արժէքները չենք բաժներ», ըսաւ Մաքրոն:
Արցախի հարցով՝ միջնորդի կեցուածքը ջատագովելով, Մաքրոն ըսաւ.- «Ձեզ դարձեալ յուսախաբ պիտի ընեմ, բայց ձեզի պիտի չընկերակցիմ դէպի Արցախ, քանի որ ատիկա ընելով պիտի կորսնցնեմ այն ինչ որ Ֆրանսայի ամենէն օգտակար ներդրումն է այս հակամարտութեան մէջ՝ միջնորդի դերը եւ երկու կողմերը լսելու հանգամանքը։ Կը յուսամ ձեզի հետ գալ երբ այս ամբողջին լուծում մը գտած կ՚ըլլանք», եզրակացուց ան:

Be the first to comment

Leave a Reply

Your email address will not be published.


*