Ազգային Ընդհանուր Ժողով` Մեծի Տանն Կիլիկիոյ Կաթողիկոսութեան Վեհարանի Դահլիճին Մէջ


ՊԷՅՐՈՒԹ.- Երեքշաբթի, Դեկտեմբեր 5-ին, նախագահութեամբ Արամ Ա. կաթողիկոսին, Մեծի Տանն Կիլիկիոյ կաթողիկոսութեան վեհարանի դահլիճին մէջ ընթացք առաւ Ազգային ընդհանուր ժողովը, որ տեւեց մինչեւ Դեկտեմբեր 8:
Քառօրեայ ժողովին մասնակցեցան թեմակալ առաջնորդներ, շուրջ հարիւր պատգամաւորներ եւ յատուկ հրաւիրեալներ: Արամ Ա. կաթողիկոսի պատգամէն ետք Ազգային ընդհանուր ժողովը շարունակեց իր աշխատանքները: Կրօնական եւ Քաղաքական ժողովներու տեղեկագիրները ներկայացուեցան եւ քննարկուեցան:
Բացման նիստին իր հայրապետական պատգամը ուղղեց վեհափառ հայրապետը, որ առաջին հերթին դիտել տուաւ, թէ սոյն ժողովը կենդանի վկայութիւն մըն է հայ եկեղեցւոյ հարազատ դիմագիծին, որ կը յատկանշուի հայկական եկեղեցիին ժողովուրդին եկեղեցին ըլլալու հանգամանքով:
Անդրադառնալով ներկայ իրավիճակին մասին` վեհափառ հայրապետը ընդգծեց. «Իմաստութիւնը եւ քաջութիւնը պէտք է ունենանք մեզ շրջապատող մարտահրաւէրները դիմագրաւելու` մեր հաւաքական կեանքը վերանորոգելու ու վերակազմակերպելու նպատակասլաց յանձնառութեամբ: Հետեւաբար, անհրաժեշտ է ըլլալ զգօն եւ համապատասխան մօտեցումներ ճշդել այնպիսի մտածելակերպերու, գործելակերպերու ու կենցաղակերպերու նկատմամբ, որոնք կրնան մեր ինքնութեան արմատները կրծել ու մեր արժէքները խաթարել: Միաժամանակ, անհրաժեշտ է ըլլալ իրատես ու հեռատես, հինը նորով ընդելուզելու ու հարստացնելու, աւանդականը` արդիականով, անցեալը` ներկայով եւ տեղականը` համահայկականով, որպէսզի մեր նոր սերունդները կապենք մեր կեանքին ու կարենանք քայլ պահել ներկայ աշխարհի զարգացումներուն հետ»:
Պատգամին աւարտին, Արամ Ա. վեհափառ հայրապետը խօսեցաւ Ս. աթոռին առաքելութեան ամէնէն կարեւոր մարզերէն մէկուն մասին, որն է պահանջատիրութիւնը: Վեհափառ հայրապետը ընդգծեց, որ Հայ դատի աշխատանքները ճանաչումէն պահանջատիրութեան փուլ անցած են, եւ ասով կը յատկանշուի Սիսի դարաւոր կաթողիկոսարանի վերադարձի պահանջով կաթողիկոսութեան բացած դատը Թուրքիոյ դէմ: Վեհափառ հայրապետը յայտնեց, որ այս քայլը առաջին վճռական քայլն է: Ան ժողովին ուշադրութեան յանձնեց, որ հետեւողական ու տքնաջան աշխատանքներէ ետք, դատը ներկայիս կը գտնուի իրաւաքաղաքական ճնշումներու տակ. «հակառակ այս կացութեան, մեր Ս. Աթոռը պէտք է շարունակէ իրաւական գործընթացը», եզրափակեց Արամ Ա. կաթողիկոսը: Իսկ սփիւռքի վերանորոգման մասին խօսելով` Արամ Ա. կաթողիկոսը առաջնահերթութիւն նկատեց թեմերուն վերակազմակերպումն ու վերանորոգումը, մանաւանդ Հայաստանի Ա. Հանրապետութեան 100-ամեակի սեմին, որուն առիթով Անթիլիասի մայրավանքին մէջ համահայկական համագումար պիտի գումարուի եւ կոթող պիտի բարձրացուի մայրավանքին շրջափակին մէջ` ի յիշատակ անկախութեան ճակատամարտերուն նահատակուած եւ անկախութեան համար զոհուած հերոսներուն:
Եզրափակելով իր խօսքը` Արամ Ա. կաթողիկոս ըսաւ.-«Մեր պատգամին եւ ընդհանուր ուղենիշ Մեծի Տանն Կիլիկիոյ կաթողիկոսութեան առաքելութեան, կարեւորութեամբ կ՛ուզենք վերյիշեցնել, թէ` կաթողիկոսարանին կողմէ կատարուող որե՛ւէ աշխատանք եւ իրագործուող որե՛ւէ ծրագիր մէկ հասցէ ունի` մեր ժողովուրդը, եւ մէկ նպատակ` ժողովուրդին ծառայութիւնը:

Be the first to comment

Leave a Reply

Your email address will not be published.


*