ՍՏԵՓԱՆԱԿԵՐՏԻ ՕՐՈՒԱՆ ՆՇՈՒՄ


Սեպտեմբերի 23-ին, Ստեփանակերտցիները նշեցին իրենց սիրելի քաղաքին 94-ամեակը: Առաւօտեան ժամերուն իսկ, քաղաքի զինանշանով եւ դրոշներով, գոյնզգոյն փուչիկներով զարդարուած ինքնաշարժները, ուրախ ու ծանդավառ երաժշտութեան ուղեկցութեամբ յայտնուեցան փողոցներէն ներս:
Ստեփանակերտի օրուայ կապակցութեամբ, քաղաքապետարանի անունով, ծաղիկներ եւ յուշանուէրներ բաժնուեցան անցորդներուն:
Շահումեանի անուան պուրակէն սկսան օրուան ձեռնարկները:
Մշակոյթի եւ երիտասարդութեան պալատին մէջ տեղի ունեցաւ «Հին ու նոր Ստեփանակերտ» խորագիրով ցուցահանդէսը: Ստեփան Շահումեանի յուշարձանի մօտ պաշտօնական արարողակարգ կատարուեցաւ:
Երեխաներու մասնակցութեամբ, Վերածնունդի հրապարակին վրայ կազմակերպուեցան մարզական տարբեր մրցումներ եւ նկարչութիւն կուպրի վրայ: Կազմակերպուեցաւ ձեռային աշխատանքներու ցուցահանդէս-վաճառք, իսկ քաղաքի զանազան թաղամասերու մէջ մայրաքաղաքի ստեղծագործական միութիւններու սաներու մասնակցութեամբ կատարուեցան համերգային ծրագիրներ։ Նաեւ կատարուեցան այցելութիւններ՝ Ստեփանակերտի «Մօր եւ մանկան» առողջութեան պահպանման կեդրոն՝ շնորհաւորելու նորածինները, ինչպէս նաեւ հարսանեաց հանդիսութիւններու սրահներ, ուր շնորհաւորուեցան նորապսակները:
Սեպտեմբեր 22ին, Ստեփանակերտի Ալեքսանտր Կրիպոյետովի անուան թիւ 3 միջնակարգ դպրոցին մէջ տեղի ունեցաւ «Իմ Ստեփանակերտ» խորագիրով գրական-գեղարուեստական ցերեկոյթ:
Տօնական միջոցառումներու աւարտին տեղի ունեցաւ համերգ Ստեփանակերտի Մշակոյթի եւ երիտասարդութեան պալատին մէջ:
Արցախի Հանրապետութեան մայրաքաղաք՝ Ստեփանակերտի բնակչութիւնը կը հաշուէ 54,500:
Ստեփանակերտը կրթութեան, մշակութային կարեւոր կեդրոնն է։ 1920-ական թուականներուն այստեղ բացուած է գիւղատնտեսական արուեստանոց, իսկ 1940-ական թուականներուն՝ երկամեայ ուսուցչական հիմնարկ, որ կարճ ժամանակ մը ետք փակուած է։ 1970-ական թուականներուն բացուած է մանկավարժական հիմնարկ՝ հայկական, ռուսական եւ ատրպէյճանական բաժանմունքներով։ Այստեղ մինչեւ 1993 կը գործէին Կիրովականի մանկավարժական եւ Երեւանի ճարտարագիտական համալսարանների մասնաճիւղերը, որոնց հիման վրայ կազմակերպուեցաւ Լեռնային Ղարաբաղի Հանրապետութեան պետական համալսարանը (այժմ՝ Արցախի Պետական Համալսարանը)։

Այստեղ կը գործէ նաեւ ոչ պետական բարձրագոյն 6 ուսումնական հաստատութիւն։ Կան նաեւ բժշկական, երաժշտական, գեղարվեստական ուսումնարաններ, ինչպէս նաեւ հանրակրթական պետական 16 դպրոց եւ 15 մանկապարտէզ։ 1924-ին բացուած է ներկայիս Ստեփանակերտի հանրապետական գրադարանը, գրադարաններ կը գործեն նաեւ քաղաքի տարբեր մասերուն մէջ։ Մայրաքաղաքի մշակութային օճախներու շարքին մէջ իր կարեւոր դերն ունի պատմութեան թանգարանը, ուր ցուցադրուած են Արցախ-Ղարաբաղ աշխարհի հնագոյն հայկական տնտեսական, մշակութային կեանքին, պատմութեան վերաբերող, մեծ հետաքրքրութիւն ներկայացնող բազմաթիւ ցուցանմուշներ։
Մշակութային կեանքին մէջ անգնահատելի դեր կը խաղայ Ստեփանակերտի Վ. Փափազեանի անուան պետական հայկական դրամատիկական թատրոնը (հիմնադրուած է 1932-ին)։ Աւելորդ չէ նշել, որ ադրբեջանական տիրապետութեան տարիներուն հայկական մարզի միակ պետական դրամատիկական թատրոնի խաղացանկէն գրեթէ լրիւ հանուած էին հայ ժողովուրդի պատմութեանը, կեանքի վերաբերող գործերու բեմադրութիւնները։ Այժմ Ստեփանակերտի հայկական դրամատիկական թատրոնը նոր վերելք կ՚ապրի, ամուր կապ ստեղծած է Երեւանի թատերական օճախներու հետ։ Քաղաքի ու ամբողջ երկրամասի կեանքին մէջ 1959 թուականին իւրայատուկ դեր կը խաղայ հայկական երգի ու պարի պետական համոյթը, որ մեծ յաջողութեամբ ելոյթներ կ՚ունենայ նաեւ Երեւանի եւ Հայաստանի այլ բնակավայրերու մէջ։
Այս 94-ամեակի տօնին առիթով Ստեփանակերտ ժամանած էր նաեւ Երեւանի քաղաքապետարանի պատուիրակութիւնը:

 

Be the first to comment

Leave a Reply

Your email address will not be published.


*