ՏԵՍԱԿՑՈՒԹԻՒՆ ՔՈՆԿՐԷՍԱԿԱՆՆԵՐՈՒ ՀԵՏ

 


ԵՐԵՒԱՆ.- Սեպտեմբեր 23-ին, Հ.Հ.նախագահ Սերժ Սարգսեան ընդունեց ամերիկացի քոնկրէսականներու պատուիրակութիւն մը, որուն մաս կը կազմէին Քոնկրէսի հայկական հարցերով յանձնախումբի համանախագահներ Ֆրանք Փալոն, Տէյվիտ Վալատաօ եւ Ճէքի Սփայըր, քոնկրէսականներ Աննա Էշու, Ճէյմս Սենսենպրենըր եւ Թալսի Կապարտ:
Սարգսեան ընդգծեց, որ անկախութեան յաջորդող 26 տարիներուն ընթացքին Հայաստան զգալի ձեռքբերումներու հասած է տարբեր բնագաւառներու մէջ, ինչ որ կարելի եղած է նաեւ Միացեալ Նահանգներու աջակցութեան շնորհիւ: Նախագահ Սարգսեան երախտագիտութիւն յայտնած է բարեկամ Միացեալ Նահանգներուն` Հայաստանի անկախ պետականութեան ամրապնդման ու զարգացման վերաբերող այդ օժանդակութեան, ինչպէս նաեւ այն կարեւոր դերակատարութեան համար, զոր Միացեալ Նահանգներ` իբրեւ ԵԱՀԿ-ի Մինսքի խմբակի համանախագահող երկիր, ունի Արցախի տագնապի լուծման հոլովոյթին մէջ:
Նշելով, որ Քոնկրէսի երկկուսակցական պատուիրակութեան Հայաստան այցելութիւնը կը վկայէ այն մասին, որ Միացեալ Նահանգներ-Հայաստան յարաբերութիւններու զարգացման եւ խորացման առումով Հայաստան աջակիցներ եւ բարեկամներ ունի թէ՛ հանրապետականներու եւ թէ՛ դեմոկրատականներու շարքերուն մէջ, նախագահ Սերժ Սարգսեան խորհրդանշական նկատած է այն, որ քոնկրէսականները Հայաստան կ՛այցելեն երկու երկիրներուն միջեւ դիւանագիտական յարաբերութիւններու հաստատման յոբելենական` 25-րդ տարուան ընթացքին:
Քոնկրէսականները իրենց կարգին նշեցին, որ ուրախ են անկախութեան տօնին օրը Հայաստան գտնուելնուն եւ տօնը հայ ժողովուրդին հետ միասին նշելու կարելիութեան համար: Հանդիպման ներկայ քոնկրէսականներէն անոնք, որոնք առիթ ունեցած են անկախութեան առաջին տարիներուն Հայաստան գտնուելու, հաստատած են, որ երկրին մէջ զգալի փոփոխութիւններ արձանագրուած են, եւ դրական ընթացքը ակնառու է: Անոնք իրենց պատրաստակամութիւնը յայտնեցին` ջանքեր ի գործ դնելու հայ-ամերիկեան յարաբերութիւններու հետագայ ընդլայնման եւ խորացման ուղղութեամբ: Անոնք նաեւ իրենց տպաւորութիւնները կիսած են հանրապետութեան նախագահին հետ Արցախ կատարած իրենց այցելութենէն` նշելով, որ տպաւորուած են Արցախի ժողովրդավարական յառաջընթացով:
Սերժ Սարգսեան շնորհակալութիւն յայտնեց քոնկրէսականներուն եւ յատկապէս հայկական հարցերով յանձնախումբի ներկայացուցիչներուն` այն հսկայական աշխատանքին համար, զոր տարիներէ ի վեր անոնք կը կատարեն Հայոց ցեղասպանութեան ճանաչման եւ դատապարտման ուղղութեամբ:

Be the first to comment

Leave a Reply

Your email address will not be published.


*