114 Նորագիրներ Միացան Հ.Յ.Դաշնակցութեան Շարքերը

 


ԵՐԵՒԱՆ.- Արցախի անկախութեան 26-ամեակին առիթով, 114 նորագիրներ համալրեցին Դաշնակցութեան շարքերը: Արդարեւ, Սեպտեմբեր 2-ին, «Եռաբլուր» զինուորական պանթէոնին մէջ տեղի ունեցան Արցախի Հանրապետութեան հռչակման 26-ամեակին նուիրուած Հ.Յ.Դաշնակցութեան կազմակերպած ոգեկոչման արարողութիւնը, որուն ընթացքին Դաշնակցութեան շարքերուն միացան 114 նորագիր երիտասարդներ:
Տեղի ունեցաւ հոգեհանգստեան արարողութիւնը` ի յիշատակ պանթէոնին մէջ ամփոփուած հայորդիներուն, որոնց կեանքին գնով այսօր ունինք անկախ ու ազատագրուած հայրենիք:
Հայկական երկու հանրապետութիւններու քայլերգներէն ետք, որոնք հնչեցին Հ.Մ.Ը.Մ.-Հ.Ա.Ս.Կ.-ի շեփորախումբին կողմէ, բացման խօսքով հանդէս եկաւ Հ.Յ.Դ. Բիւրոյի անդամ, Հայ Դատի եւ քաղաքական հարցերու գրասենեակի պատասխանատու Կիրօ Մանոյեան: Ան հաստատեց, որ Սեպտեմբեր 2, 1991-ին տրուած որոշումը իսկական անհրաժեշտութիւն էր, որովհետեւ մէկ կողմէ կը գոհացնէր Արցախի ժողովուրդին ձգտումը` Ատրպէյճանէն անկախ ապրելու, նաեւ այդ նպատակին իրականացումը կը դնէր օրուան քաղաքական իրավիճակի փաստերուն վրայ, միւս կողմէ այդ կամքի դրսեւորումը իրականութիւն կը դարձնէր Խորհրդային միութեան օրուան օրէնքներու տառին ու ոգիին համապատասխան», իր խօսքին մէջ հաստատեց Մանոյեան` նշելով, որ այս օրը, տօնական ըլլալով հանդերձ, պատմական է:
Մանոյեանին համաձայն, Սեպտեմբեր 2-ի որոշումը մարտավարական քայլ էր: «Ինչպէս Արցախի մէջ պիտի ըսէին` Արցախի Հանրապետութեան անկախութեան միջազգային ճանաչումը Հայաստանի հետ վերամիաւորման ամէնէն կարճ ճամբան է: Այս ճամբուն վրայ անհրաժեշտ կը նկատենք Հայաստանի եւ Արցախի հանրապետութիւններուն միջեւ ռազմաքաղաքական համագործակցութեան պայմանագիրի ստորագրութիւնը: Պայմանագիր, որ պատրաստուած է 2016-ի ապրիլեան քառօրեայ կռիւներէն ետք», շեշտեց Մանոյեան:
Ան դիտել տուաւ, որ Արցախի սահմանները ճշդելու ատեն պէտք է առաջնորդուիլ պատմական իրաւունքի եւ Արցախի ու Հայաստանի անվտանգութեան իրական աշխարհագրական տարածքային երաշխիքներու սկզբունքով: «Բանակցային գործընթացին մէջ պէտք է առաջնորդուիլ Արցախի ժողովուրդին 1991 թուականի անկախութեան եւ 2006 ու 2017 թուականներու Արցախի սահմանադրութեան ընդունման եւ փոփոխութիւններու համաժողովրդական հանրաքուէներով արդէն իսկ կայացած կամքի արտայայտութեամբ», նկատել տուաւ ան, ապա անգամ մը եւս յայտարարեց, որ Դաշնակցութիւնը կը շարունակէ Արցախի ճանաչման հարցի հետապնդումը:
Անդրադառնալով զիջումներուն մասին` Մանոյեան անգամ մը եւս լուսարձակի տակ առաւ Հ.Յ.Դ.-ին դիրքորոշումը: «Դաշնակցութիւնը դէմ է միակողմանի զիջումներուն, փոխադարձ զիջումները կրնան ըլլալ միայն համարժէք, միաժամանակեայ եւ փաթեթային լուծման շրջանակներուն մէջ, ՀՅԴ-ն կողմնակից է Հայաստանի կողմէ Արցախի անկախութեան ճանաչման անհրաժեշտութիւնը` բանակցային գործընթացի ձախողութեան կամ Ատրպէյճանի կողմէ զինուորական յարձակման պարագային», դիտել տուաւ ան:
Ապա Հ.Յ.Դ. Բիւրոյի քաղաքական ներկայացուցիչ Արմէն Ռուստամեանի կնքահայրութեամբ տեղի ունեցաւ 114 նորագիրներու մուտքը` Դաշնակցութեան շարքերը:
Այնուհետեւ ազգային, յեղափոխական երգերով ներկաները շարունակեցին տօնել Արցախի անկախութեան 26-ամեակը:

 

Be the first to comment

Leave a Reply

Your email address will not be published.


*