Նիւ Եորք.-  Հանդիպում՝ Շարլ Ազնաւուրի Հետ

 

Լուսանկարներ՝ Քրիստինէ Սարգսեան

Նիւ Եորք («Հայրենիք»).- Երկուշաբթի, Օգոստոս 28-ին, «Քարնէյկի» հիմնարկի կազմակերպութեամբ տեղի ունեցաւ հանդիպում մը՝ 93-ամեայ հանրահռչակ երգիչ Շարլ Ազնաւուրի հետ: Ներկայ էին դեսպաններ, հիւպատոսներ, արուեստագէտներ եւ լրագրողներ: Յիսունէ աւելի հրաւիրեալներու կողքին, նաեւ ներկայ էին Ա.Մ.Ն. Արեւելեան շրջանի Էջմիածնական թեմի Առաջնորդ՝ Խաժակ Պարսամեան եւ Մեծի Տանն Կիլիկիոյ թեմի Առաջնորդ՝ Օշական Չօլոյեան: Նաեւ ներկայ էր Մ.Ա.Կ.-ի մօտ Հայաստանի ներկայացուցիչ Զօհրապ Մնացականեան:

Օրուան հանդիսավարն էր Ռէյչըլ Նազարեանը, որ յայտնեց թէ, քանի մը օրերու ընթացքին կարելի եղաւ կազմակերպել այս հաւաքը, նկատի ունենալով որ Լոս Անճելըսէն Փարիզ վերադարձին, Ազնաւուր կարճ այցելութեամբ մը, Նիւ Եորք կը գտնուէր: Ան յայտնեց, թէ Ազնաւուր ժամանած էր Լոս Անճելըս, մասնակցելու Հոլիվուտի Փառքի Ծառուղիին վրայ՝ « Շարլ Ազնաւուր»ի աստղի բացման հանդիսութեան։ Բացման արարողութեան ներկայ եղան  ծերակուտականներ եւ եօթներորդ արուեստի բնագաւառէն ներս հանրածանօթ դէմքեր:
Նազարեան բեմ հրաւիրեց «Քարնէյկի» հիմնարկի տնօրէն Վարդան Գրիգորեանը, որ անդրադարձաւ Ազնաւուր տիպարին մասին, եւ յատկապէս Հայաստանի մէջ կատարած իր բարեգործական աշխատանքներուն մասին:

Ցուցադրուեցաւ վաւերագրական մը այս աշխատանքներուն մասին, նաեւ յաւելեալ մանրամասնութիւններ փոխանցուեցան, Հայաստանի մէջ կառուցուելիք արուեստի եւ մշակոյթի «Ազնաւուր» կեդրոնին մասին:

Տեղի ունեցաւ հիւրասիրութիւն: Աւարտին, նաեւ իր սրտի խօսքը փոխանցեց Ազանաւուր, որ նշեց թէ ամենայն հպարտութեամբ եւ նուիրումով պիտի շարունակէ ծառայել իր արմատներուն՝ հայութեան:

Be the first to comment

Leave a Reply

Your email address will not be published.


*