Ո՛չ Ստրկութեան, Ո՛չ Ազգայնամոլութեան Եւ …Ո՛չ Խեղկատակութեան

Dave Granlund / politicalcartoons.com

ՀԱՅՐԵՆԻՔ
Խմբագրական

Նոյնքան ահաւոր եւ աններելի էին Սպիտակ Տան վարձակալ Տոնըլտ Թրամփի յայտարարութիւններն ու արտայայտութիւնները՝ Օգոստոս 12-ին Չարլոցվիլի (Վըրճինիա) մէջ պատահած խռովութիւններուն մասին, որքան բուն իրադարձութիւնները:
Քանի մը օրերու, գէթ նոյնիսկ քանի մը ժամերու ընթացքին, նախագահ Թրամփ կատարեց հակասական եւ հակադրական յայտարարութիւններ, գլխապտոյտ յառաջացնելով կատարուած իրադարձութիւններուն հետ քայլ պահող տեղւոյն քաղաքացիին:
Չարլոցվիլի բնակիչին համար յստակ էր ամիսներէ ի վեր, թէ շրջանէն ներս որոշ ազգայնամոլ եւ յատկապէս սպիտակամորթ խմբակի մը մէջ, ընդվզումի ալիք եւ կիրք ստեղծուած էր, երբ տեղւոյն քաղաքապետութիւնը որոշած էր քանդել շարունակ ստրկութեան ի նպաստ պայքարած զօրավար Ռապըրթ Լիի (1807-1870) արձանը:
Նմանօրինակ որոշումներ առնուած էին նաեւ ստրկութեան մայրաքաղաք Նիւ Օրլինզի մէջ եւ քանի մը արձաններ «չէզոքացուած» եւ «չքացած» էին, մասամբ մոռցնել տալով Միսիսիսիփիի ափի այս քաղաքէն դէպի հիւսիս փոխադրող ստրուկները, որոնք դաժան պայմաններու տակ, երբեմն նոյնիսկ իրենց հոգին կ՛աւանդէին դեռ զիրենք փոխադրող նաւը որոշեալ վայրը խարիսխ չնետած:
Նկատի ունենալով տեղւոյն բնակչութեան եւ տիրող մտայնութեան պայմանները, Նիւ Օրլինզի արձանները քանդելու այս գործընթացը համեմատաբար աւելի խաղաղ պայմաններու տակ ընթացած էր:
Չարլոցվիլի մէջ ստեղծուած պատկերն ու գոյութիւն ունեցող կիրքը տարբեր էին: Ծայրայեղականներ ո՛չ թէ խաղաղ ցոյցի ժամանած էին, այլ եկած էին արեան գնով իրենք զիրենք պարտադրելու եւ յայտնելու թէ իրենք չեն կրնար փոխարինուիլ, մէկ խօսքով ստրուկը դառնալով իրենց անհիմն եւ անհեթեթ ստրկաբանութեան:
Այս ծայրայեղականները աւելի թեւեր ստացան, երբ նախագահ Թրամփ իր անտեղի, մակերեսային եւ նոյնիսկ թեթեւսոլիկ յայտարարութիւններու իր նախասիրած գործելաձեւով՝ դայլայլիչով (twitter), յաւելեալ բեւեռացում եւ պայթուցիկ կացութիւն ստեղծեց:
Մերթ քնննադատելով ցուցարար երկու կողմերը եւ մերթ հաստատելով, թէ ծայրայեղ աջակողմեաններուն մէջ, կարգ մը ցուցարարներ պարզապէս եկած էին ի յարգանս իրենց ազգային հերոս զօրավար Ռապըրթ Լիի, Միացեալ Նահանգներու նախագահը կատարած էր իր իւրայատուկ «Թրամփութիւն»ը եւ ինկած էր արդի լրատուամիջոցներու լարած ծուղակին մէջ, գլխապտոյտ յառաջացնելով, նոյնիսկ իր պաշտօնէութեան:
Դժուար է քայլ պահել նախագահ Թրամփի յայտարարութիւններուն կամ խեղկատակութիւններուն հետ: Վերոյիշեալ իր յայտարարութիւնը վերլուծելով եւ զուգահեռական մը ստեղծելով, արդեօք իննիսունականներուն կարելի պիտի ըլլա՞ր կլլեցնել Խորհրդային Միութեան տիրապետութեան տակ ստրկացած բնակիչին, թէ ժամանած էր ի յարգանս Լենինի կամ Սթալինի եւ ոչ թէ անոնց վիթխարի արձաններու փլուզման արարողութեան…:
Եթէ նախագահ Թրամփ բաւական մը կարդացած ըլլար զօրավար Ռապըրթ Լիի կեանքին մասին, հաւանաբար այս արիւնահեղութիւնն ու կիրքը արդէն իսկ «մարած» կրնար ըլլալ: Արդարեւ, նոյնիքն զօրավար Լին քաղաքացիական պատերազմի աւարտէն ետք, յայտարարած էր, թէ այդ նիւթին նուիրուած ո՛չ մէկ արձան կամ յուշակոթող պէտք է կառուցել, պարզապէս երկրէն ներս յաւելեալ բաժանում չյառաջացնելու համար:
Վերադառնալով Սպիտակ Տան, արդեօք ո՞վ պիտի պաշտօնազրկուի, կամ հրաժարի: Արդեօք ժամանակը չէ՞ հասած նոյնինք վարձակալին:

Be the first to comment

Leave a Reply

Your email address will not be published.


*