Հ.Յ.Դ. Պատանեկան Միութիւններու Բանակումը Հասաւ Իր Աւարտին


Հ.Յ.Դ. Պատանեկան միութիւններու «Խանասորից Շուշի, Յաղթանակից Յաղթանակ» բանակումին վերջին երեք օրեհո անցաՆ Արցախի մէջ;
Շաբաթ, Օգոստոս 5-ին 230 պարման-պարմանուհիներ երկար ճանապարհորդութենէ ետք հասան Արցախի մայրաքաղաք Ստեփանակերտ:
Յաջորդ օրն իսկ, անոնք առիթը ունեցան այցելելու Գանձասարի վանք, ապա ուղղուեցան դէպի Խանասորի արշաւանքի մտայղացումը կատարած Նիկոլ Դումանի տուն-թանգարանը եւ Խանասորայ Վարդանի բնակարանը:
Նոյն վայրին մէջ անոնց տրուեցաւ դասախօսութիւն մը՝ «Արցախի հիմնահարցը» խորագիրով, որ ներկայացուեցաւ Հ.Յ.Դ. Արցախի Կեդրոնական կոմիտէի անդամ Արմէն Սարգսեանի կողմէ:
Յետմիջօրէին պատանիները խմբովին բարձրացան Արցախի խորհրդանիշ «Պապիկն Ու Մամիկը» արձանի բլրակը, ինչպէս նաեւ շրջագայեցան Ստեփանակերտի հրապարակը: Ապա բանակողները մեկնեցան Շուշի եւ այցելեցին Կանաչ ու Ղազանչեցոց եկեղեցիները:
Սուրբ Ղազանչեցոց եկեղեցին եղաւ բանակումի վերջին կանգառը, ուր տեղի ունեցաւ փակման հանդիսութիւնը:
Կարգ մը պարման-պարմանուհիներ իրենց տպաւորութիւնները փոխանցեցին բանակումին մասին, ապա ընդհանուր պատասխանատու Սագօ Արապօղլեան իր սրտի խօսքը ուղղեց՝ ըսելով. «Նախ բոլորին վարձքը կատար՝ պատասխանատուներ եւ պատանիներ: Ութ օրերու ընթացքին դուք փաստեցիք, որ իսկական դաշնակցական պատանիներ էք եւ դուք ունեցաք նոր ընկերներ, նոր ծանօթութիւններ եւ բարեկամութիւններ, որոնց շնորհիւ կարելի է անվարան հաստատել, որ համահայկական բանակումը հասաւ իր նպատակին: Մեր յոյսն է, որ ապագային ձեզ տեսնենք մէկական ղեկավարներ եւ դուք ըլլաք բանակումի կազմակերպիչներ:
Հ.Յ.Դ. Արցախի Կեդրոնական կոմիտէի ներկայացուցիչ Դաւիթ Իշխանեան, ողջունելով բոլորը՝ ըսաւ. «Բանակումի խորագիրը՝ «Խանասորից Շուշի», իր մէջ կ՛ամփոփէ այն գաղափարը, որ մեր պայքարի ուղին 120 տարի առաջ Խանասորով սկսեցաւ, Սարդարապատով եւ Լիզպոնով շարունակուեցաւ եւ հասաւ մինչեւ յաղթական Շուշի: 25 տարի առաջ Շուշիի մեր եղբայրներն ու հարազատները կրցան կերտել դարերով սպասուած յաղթանակը, իսկ այդ յաղթանակը իր մէջ կը պարփակէր մեծ պատգամ: Այդ յաղթանակը ո՛չ միայն Շուշիի ազատագրումն է, այլեւ մեր ազատագրական պայքարի այն կարեւորագոյն փուլն է, որ սկիզբը դարձաւ նոր յաղթանակներու: Այս ութ օրերուն ընթացքին կը կարծեմ, որ դուք նոյնպէս նոր սկիզբ մը դրիք ո՛չ միայն բանակումը իր աւարտին հասցնելու, այլ ապագային ձեր մէջ նոր յաղթանակներ կերտելու: Մեր շրջանի պատասխանատու կազմին անունով մեր շնորհաւորանքն ու շնորհակալութիւնը կը յայտնենք ձեր բոլորին եւ կը հաստատենք, որ դաշնակցական հայ պատանին այդ յաղթանակներուն ոգիով կը դաստիարակուի եւ կը կերտէ իր ապագան»:
Ապա բեմ հրաւիրուեցաւ Հ.Յ.Դ. Բիւրոյի Երիտասարդական գրասենեակի պատասխանատու Սարգիս Մկրտչեան, որ խրախուսեց ներկաները՝ ըսելով. «Այսօր, գտնուելով ազատագրուած Արցախի այս սուրբ հողին վրայ՝ Շուշի քաղաքի Ս. Ղազանչեցոց եկեղեցւոյ շրջափակին մէջ, փակումը կը կատարենք Հ.Յ.Դ. Պատանեկան միութիւններու 3րդ համահայկական բանակումին: Ճիշդ կ՛ըլլայ, որ իւրաքանչիւրս իր մէջ եւ միասնաբար հաշուեքննութիւն մը կատարենք, թէ ի՛նչ ըրինք այս ութ օրերուն ընթացքին եւ այդ օրերը մեզի ի՛նչ տուին: Եթէ ամփոփենք, պիտի եզրակացնենք, որ մենք ճշդուած ծրագիրին համաձայն այցելեցինք Հայաստանի տեսարժան վայրերը, լսեցինք դասախօսութիւններ, խմբային աշխատանքներ կատարեցինք, ծանօթութիւններ ձեռք ձգեցինք եւ ամէնէն կարեւորը, անցնող օրերուն Քանաքեռաւանի մէջ վրաններու տակ, իսկ Շուշիի ռազմական ուսումնարանին մէջ, մշակեցինք ընկերութիւններ, որոնք պիտի գոյատեւեն մինչեւ մեր կեանքի վերջը: Բանակումի ընթացքին դուք կոփեցիք ձեր կամքը, ամրապնդեցիք ձեր վճռակամութիւնը: Դուք միասնաբար կրցաք դիմագրաւել բոլոր դիւրին եւ դժուար պայմանները, որոնք ձեզի առյաւէտ կը յուշեն անմոռանալի օրեր: Հայ Յեղափոխական Դաշնակցութեան համար որեւէ բան ինքնանպատակ չէ, ինչպէս որ հայաստանագնացութիւնը ինքնանպատակ չէ: Մենք այս բանակումները կը կազմակերպենք, որովհետեւ համոզուած ենք, որ այս տեսակի աշխատանքներու ընդմէջէն նոր սերունդը ազգային ոգիով եւ հայրենասիրութեամբ կը դաստիարակուի, ինչպէս նաեւ կ՛ամրապնդէ իր կամքը: Մենք այսօր կը գտնուինք այս սուրբ հողին վրայ, որուն պարտական ենք բազմահազար քոյրերու եւ եղբայրներու զոհողութեան շնորհիւ, եւ պարտաւոր ենք շարունակել անոնց ճամբան, որպէսզի իրականանան Դաշնակցութեան եւ հայ ազգին նպատակները՝ հայահաւաքով եւ հողահաւաքով: Ցտեսութիւն մինչ նոր հայաստանագնացութիւն կամ երիտասարդական բանակում»:
Հանդիսութիւնը իր աւարտին հասաւ Արցախի «Մենք ենք մեր սարերը» ազգագրական երգի-պարի համոյթի ելոյթով:
Բանակումը վերջ գտաւ «Մշակ բանուոր» քայլերգով:

Be the first to comment

Leave a Reply

Your email address will not be published.


*