ՓԱՅԼՈՒՆ ՅԱՋՈՂՈՒԹԵԱՄԲ ԱՒԱՐՏԵՑԱՆ ՀԱՄԱ-Հ.Մ.Ը.Մ.-ԱԿԱՆ 10-ՐԴ ՄԱՐԶԱԽԱՂԵՐԸ

 


Շաբաթ, Յուլիս 28-ի յետմիջօրէին, Երեւանի «Միքա» մարզական համալիրին վրայ կատարուած կողովագնդակի եւ ոտնագնդակի աւարտական մրցումներով իրենց աւարտին հասան համաՀ.Մ.Ը.Մ.-ական 10-րդ մարզախաղերը։ Նախքան աւարտական մրցումները, տեղի ունեցան երրորդ եւ չորրորդ դիրքերու ճշդումի մրցումները։
Ախոյեաններու յստակացումէն ետք, մարզական համալիրի պասքեթպոլի դաշտին վրայ տեղի ունեցաւ փակման հանդիսաւոր արարողութիւն՝ մարազախաղերու մասնակից պատուիրակութիւններու տողանցքով, մրցանակաբաշխութեամբ եւ իւրաքանչիւր մարզաձեւի լաւագոյն մարզիկի ընտրութեամբ։

Իշխան Եղիայեան

Հանդիսութեան Հ.Մ.Ը.Մ.-ի Կեդրոնական Վարչութեան անունով Իշխան Եղիայեան շնորհակալութիւն յայտնեց մարզախաղերու յաջողութեան մեծապէս նպաստած հայրենի իշխանութիւններուն, հիւրընկալ շրջանի՝ Հ.Մ.Ը.Մ.-Հ.Ա.Ս.Կ.-ի վարչութեան, մարզախաղերու նախագահ Սարգիս եւ Ալիս Տէր Պետրոսեաններուն եւ բոլոր բարերարներուն եւ բարեկամներուն։ Ան ըսաւ, որ համա-Հ.Մ.Ը.Մ.-ական 10-րդ մարզախաղերու իրագործումով Հ.Մ.Ը.Մ. 100-ամեակ կ’ուղղուի աւելի քան երբեք խանդավառ ու հաստատ կամքով, միշտ հաւատարիմ մնալով իր նշանաբանին՝ «Բարձրացիր-բարձրացուր»-ին։
Խօսք առաւ նաեւ Հ.Մ.Ը.Մ.-Հ.Ա.Ս.Կ.-ի վարչութեան ատենապետ Դաւիթ Յակոբեան եւ ողջունեց աշխարհի 21 երկիրներէն հայրենիք համախմբուած Հ.Մ.Ը.Մ.-ական մարզիկներն ու մարզիկուհիները՝ յուսալով որ անոնք իրենց երկիրները կը վերադառնան միութենական անմոռանալի յուշերով եւ ազգային բարձր տրամադրութիւններով։ Այս առիթով, Յակոբեան գնահատեց Հ.Մ.Ը.Մ.-Հ.Ա.Ս.Կ.-ի 80 հոգինոց կամաւորներու խումբը, որ անցնող 10 օրերուն կազմակերպչական մեղուաջան աշխատանք կատարեց՝ մարզախաղերու յաջողութեան իրականացման համար։

Յուլիս 25-ի երեկոյեան, համա-ՀՄԸՄ-ական 10-րդ մարզախաղերուն մասնակիցները յեղափոխական երգերու երեկոյով մը նշեցին Խանասորի արշաւանքին 120-ամեակը եւ Լիզպոնի գործողութեան 34-ամեակը:
Երեկոյին բացումը կատարեց եւ ներկաները ողջունեց Հ.Մ.Ը.Մ.-Հ.Ա.Ս.Կ.-ի վարչութեան փոխատենապետ Ժիրայր Պէօճէքեան: Ան ըսաւ, որ Խանասորի արշաւանքը մեր ժողովուրդին տուաւ նախաձեռնութեան ոգիի, մարտունակութեան եւ հայութեան թշնամիները պատժելու լաւագոյն օրինակը: Խանասորը ներշնչումի աղբիւր հանդիսացաւ սերունդներուն: Խանասորի օրինակով Լիզպոնի անձնազոհ հինգ տղաքը եւս տուին նախաձեռնութեան, մարտունակութեան եւ Հայ դատի դէմ բարձրացած լռութեան պատը քանդելու օրինակը: Պէօճէքեան նշեց, որ Լիզպոնը իր կարգին ներշնչումի օրինակ ծառայեց արցախեան ազատամարտի հերոսներուն, որոնք կռուի դաշտ մեկնեցան Խանասորի եւ Լիզպոնի հերոսներուն հետեւողութեամբ:

Պէօճէքեան իր խօսքին մէջ յիշեց նաեւ արցախեան քառօրեայ պատերազմի հերոսներն ու նահատակները, որոնք արժանի են իւրաքանչիւր Հ.Մ.Ը.Մ.-ականի յարգանքին եւ գնահատանքին: Ան շեշտեց, որ Հ.Մ.Ը.Մ.-ը սոսկ մարմնակրթական միութիւն չէ, ան ազգային-հայրենասիրական դաստիարակութիւն ջամբող կազմակերպութիւն է, որուն բովէն ելած են Վարդան Բախշեանի եւ Վիգէն Զաքարեանի նման նուիրեալներ:
Բացման խօսքէն ետք, ներկայ հազար մարզիկ-մարզիկուհիները ազգային-յեղափոխական երգերով ոգեկոչեցին մեր հին ու նոր բոլոր նահատակներուն յիշատակը: Երգիչներ Սուրէն Աճէմեան եւ Գէորգ Հաճեան ներկաներուն խանդավառութիւնը գագաթնակէտին հասցուցին Խանասորի արշաւանքին եւ Լիզպոնի գործողութեան նուիրուած բազմաթիւ երգերու կատարումով: Այս առիթով հնչեց նաեւ նահատակ Վարդան Բախշեանի նուիրուած նոր երգ մը:
Համա-Հ.Մ.Ը.Մ.-ական մարզախաղերը ունեցան նաեւ իրենց դաստիարակչական յայտագիրները: Մարզախաղերու մասնակիցներէն խումբ մը մասնակցեցաւ «Հ.Մ.Ը.Մ.-ը եւ երիտասարդութիւնը» նիւթով զրոյց-քննարկումին, զոր վարեցին Ֆրանսայէն Անտրէ Տատայեան եւ Լիբանանէն Փաթիլ Եսայեան: Անոնք զրոյցի մասնակիցներուն ներկայացուցին շարք մը հարցադրումներ, որոնց պատասխաններուն շուրջ մասնակիցները կատարեցին միտքերու եւ առաջարկներու օգտակար փոխանակումներ:
Համա-Հ.Մ.Ը.Մ.-ական մարզախաղերու մասնակիցներէն այլ խումբ մը մասնակցեցաւ «Վերադարձ Հայաստան» («Ռիփեթ Արմինիա») կազմակերպութիւնը ծանօթացնող դաստիարակչական հանդիպումին, որուն ընթացքին աշխարհի չորս ծագերէն եկած մարզիկ-մարզիկուհիներ տեղեկացան, թէ ինչպէ՛ս կարելի է կամաւոր ծառայութիւններ կատարել Հայաստանի զանազան շրջաններու տարբեր բնագաւառներուն մէջ:
Յառաջիկայ օրերուն, մարզախաղերու մասնակիցներէն այլ խումբեր պիտի հետեւին դաստիարակչական երկու այլ ծրագիրներու եւս, որոնք պիտի ծանօթացնեն «Դէպի Հայք» հիմնադրամը եւ Արցախի մէջ զարգացման ծրագիրները: Դաստիարակչական յայտագիրներու ծիրին մէջ, մարզախաղերուն մասնակիցները այցելած էին հայկական բանակի Նուպարաշէնի զօրամաս եւ ծանօթացած էին հայ զինուորներու առօրեային եւ զէն ու զրահին:
Նշենք թէ Հինգշաբթի, Յուլիս 27-ի կէսօրին, համա-Հ.Մ.Ը.Մ.-ական մարզախաղերու առիթով Երեւան գտնուող Հ.Մ.Ը.Մ.-ի պատասխանատուներու պատուիրակութիւն մը այցելեց Սփիւռքի նախարարութիւն եւ ընդունուեցաւ նախարար Հրանոյշ Յակոբեանի կողմէ։ Պատուիրակութեան մաս կազմեցին Հ.Մ.Ը.Մ.-ի Կեդրոնական Վարչութեան անդամներ՝ Գառնիկ Մկրտիչեան, Վաչէ Նաճարեան, Իշխան Եղիայեան, Օշին Փիրումեան, Բագրատ Եսայեան, Անդրանիկ Պահարեան, Վիգէն Քորթեան, Արմանտօ Թորգոմեան, «Մարզիկ» պաշտօնաթերթի խմբագիր Վիգէն Աւագեան եւ 10-րդ մարզախաղերու կազմակերպիչ մարմնի ատենապետ Մանուէլ Մարսէլեան։
Հ.Մ.Ը.Մ.-ի պատուիրակութիւնը ողջունելով, նախարար Յակոբեան շեշտեց նման մարզախաղերու Հայաստանի մէջ կազմակերպման կարեւորութիւնը։ Ան ըսաւ, որ նման նախաձեռնութիւնները կը նպաստեն նոր սերունդի հայրենաճանաչութեան, մարզական մրցակցութեան ոգիի զարգացման եւ ցանցային կապերու հաստատման։ Բազմահարիւր պատանիներ ու երիտասարդներ ծանօթութիւններ կը հաստատեն իրարու հետ, նաեւ՝ հայրենի իրենց հասակակիցներուն հետ, ինչ որ դրական եւ օգտակար քայլ է։
Նախարար Յակոբեան իր գոհունակութիւնը յայտնեց տարուէ տարի մարզախաղերու մասնակիցներու եւ շրջաններու թիւերուն աճին համար եւ նկատել տուաւ, որ Սփիւռքի նախարարութիւնը միշտ եղած է ու պիտի մնայ Հ.Մ.Ը.Մ.-ի կողքին, մանաւանդ որ յառաջիկայ տարի միութիւնը կը պատրաստուի ձեռնարկներու շարքով մը հայրենիքի մէջ տօնելու իր հիմնադրութեան 100-ամեակը։
Իր կարգին, Հ.Մ.Ը.Մ.-ի Կեդրոնական Վարչութեան ատենապետ Գառնիկ Մկրտիչեան Սփիւռքի նախարարութեան ճամբով շնորհակալութիւն յայտնեց հայրենի պետութեան, որ ճիգ չխնայեց միութեան 10-րդ մարզախաղերու յաջողութեան համար։ Ան նկատել տուաւ, որ Հ.Մ.Ը.Մ.-ի եւ Սփիւռքի նախարարութեան միջեւ ստորագրուած գործակցութեան յուշագիրը, որ չորս տարուան կեանք ունի, թեւակոխած է գործնականացման փուլ եւ կը խոստանայ յառաջիկային աւելի արդիւնաւորուիլ ու զարգանալ։
Մկրտիչեան նաեւ յայտնեց, որ համաՀ.Մ.Ը.Մ.-ական մարզախաղերուն նպատակը միայն մարզական չէ, մարզականը միջոց է, գլխաւոր նպատակը հայապահպանումն է, հայ երիտասարդները Հայաստան բերելը, փոխադարձ կապեր մշակելը եւ Հայաստան-Սփիւռք գործակցութեան զարգացումն է։
Այցելութեան աւարտին, առ ի գնահատանք «համաՀ.Մ.Ը.Մ.-ական 10-րդ մարզախաղերու բարձր մակարդակով կազմակերպման», նախարար Յակոբեան Սփիւռքի նախարարութեան պատուոյ գիրերով պարգեւատրեց Հ.Մ.Ը.Մ.-ի Կեդրոնական Վարչութիւնը եւ Հ.Մ.Ը.Մ.-ՀԱՍԿ-ի վարչութիւնը։ Նոյն առիթով, Հ.Մ.Ը.Մ.-ի Կեդրոնական Վարչութիւնը մարզախաղերու յուշանուէրը յանձնեց նախարար Հրանոյշ Յակոբեանին։
Հ.Մ.Ը.Մ.-ի պատուիրակութիւնը այցելեց նաեւ Հայաստանի մարմնամարզի եւ երիտասարդական հարցերու նախարար, Հ.Մ.Ը.Մ.-ՀԱՍԿ-ի երկար տարիներու անդամ Հրաչեայ Ռոստոմեանին։
Նախարար Ռոստոմեան Հ.Մ.Ը.Մ.-ի ներկայացուցիչներուն յայտնեց, որ տաս տարիէ ի վեր համա-Հ.Մ.Ը.Մ.-ական մարզախաղերը արդէն իրենց կարեւոր տեղը ունին Հայաստանի մարզական կեանքին մէջ։ Ան նշեց, որ պետական որոշումով, նախարարութիւնը բոլոր ձեւի դիւրութիւններ կ’ընծայէ մարզախաղերու հեզասահ ընթացքին ապահովման համար։
Հ.Մ.Ը.Մ.-ի անունով նախարար Ռոստոմեանին շնորհակալութեան խօսք յայտնեց Կեդրոնական Վարչութեան ատենապետ Գառնիկ Մկրտիչեան։ Ան նշեց, որ Ռոստոմեանի գլխաւորած նախարարութիւնը եւ Հայաստանի մարզական ֆետերասիոնները, ինչպէս անցեալին, այս մարզախաղերուն եւս եղան Հ.Մ.Ը.Մ.-ի կողքին՝ կարելի դարձնելով այսքան մեծաթիւ մասնակցութեամբ մարզախաղերու կանոնաւոր կազմակերպումը։ Նախարարութիւնը սիրով տրամադրեց մարզադաշտեր, իրաւարարներ եւ մարզական պատասխանատուներ, որոնք կատարեցին շնորհակալ գործ։
Այցելութեան աւարտին, Հ.Մ.Ը.Մ.-ի Կեդրոնական Վարչութիւնը հայրենի նախարարը պատուեց մարզախաղերու ոսկէ մետալով։

Փակման հանդիսութեան առաջին անգամ ըլլալով հնչեց Հ.Մ.Ը.Մ.-ի 100-ամեակի քայլերգը (խօսք՝ Ներսեհ Լիպարեանի, երաժշտութիւն՝ Վահրամ Էմմիեանի, կատարողութիւն՝ Գառնիկ Սարգիսեանի)։
ՀամաՀ.Մ.Ը.Մ.-ական 10-րդ մարզախաղերու ախոյեաններուն յստակացումը դիւրին չեղաւ։ Տաս օրուան մրցակցութենէ ետք, աւարտական սպասուած մրցումները եղան հետաքրքրական եւ անակնկալներով լեցուն։
Արդարեւ, Հ.Մ.Ը.Մ. Լիբանան տիրացաւ ֆութպոլի ախոյեանութեան տիտղոսին, իսկ Արեւմտեան Մ.Նահանգներ՝ ֆութպոլի կրտսերներու տիտղոսին։
Կողովագնդակի պարագային, մեծագոյն անակնկալը եղաւ Հ.Մ.Ը.Մ.-Հ.Ա.Ս.Կ.-ի աղջկանց խումբին առաջնութեան տիրացումը, այլապէս երէց տղոց, կրտսեր տղոց եւ աղջկանց տիտղոսներուն տիրացան Հ.Մ.Ը.Մ.-ի Արեւմտեան Միացեալ Նահանգներու խումբերը։
Փինկ-փոնկի տղոց ու աղջկանց ախոյեան հանդիսացան Հ.Մ.Ը.Մ. Լիբանանէն Աւօ Մունջօղլեան եւ Լարա Քէչէպաշեան։ Ճատրակի մրցումներուն առաջին եւ երկրորդ հանդիսացան Հ.Մ.Ը.Մ.-Հ.Ա.Ս.Կ.-էն Հրաչեայ Վարդանեան եւ Ռազմիկ Առաքելեան։ Լիբանանէն Հրայր Պրունսուզեան տիրացաւ պրոնզ մետալի։
Թենիսի մրցումներուն, առաջին երեք դիրքերը գրաւեցին Հ.Մ.Ը.Մ.-ի Արեւմտեան Մ. Նահանգներու, Կիպրոսի եւ Հ.Ա.Ս.Կ.-ի մարզիկները։
Լողի տղոց մրցումներուն, Թեհրանի Հ.Մ.Ա.Կ.-ը տիրացաւ 20 մետալի, Արեւմտեան Մ. Նահանգներ՝ 9 մետալի, Լիբանան՝ 7 մետալի եւ Հ.Մ.Ը.Մ.-Հ.Ա.Ս.Կ.՝ 6 մետալի։ Լիբանանէն Սեւակ Տէմիրճեան խլեց 4 ոսկի եւ 3 արծաթ մետալ։ Աղջկանց մրցումներուն, Արեւմտեան Մ. Նահանգներ տիրացաւ 8 մետալի, Կիպրոս 7, Սուրիա եւ ՀՄԱԿ՝ 6 մետալի, Լիբանան եւ Հ.Ա.Ս.Կ.՝ 4 մետալի։ Կիպրոսէն Մարի Սոմաքեան-Ճիորճիու խլեց 7 ոսկի մետալ, իսկ Սուրիայէն Միրնա Պզտիկեան՝ 4 ոսկի եւ 2 արծաթ մետալ։
Փակման հանդիսութեան յայտարարուեցան իւրաքանչիւր մարզաձեւի լաւագոյն մարզիկին եւ մարզիկուհիին անունները, որոնք ստացան վաստակաշատ Հ.Մ.Ը.Մ.-ականներու անունով հետեւեալ բաժակները.-
– Կողովագնդակի երէց տղոց լաւագոյն մարզիկ («Վարդգէս Ալահայտոյեան բաժակ»)- Արամ Թարզիպաշեան, Արեւմտեան Մ. Ն.։
– Կողովագնդակի կրտսեր տղոց լաւագոյն մարզիկ («Դանիէլ Դանիէլեան բաժակ»)- Ալէքս Իսկէնտէրեան, Արեւմտեան Մ.Ն.։
– Կողովագնդակի երէց աղջկանց լաւագոյն մարզիկ («Վահրամ Դանիէլեան բաժակ»)- Սոֆիա Տէմիրճեան, Հ.Մ.Ը.Մ.-Հ.Ա.Ս.Կ.։
– Կողովագնդակի կրտսեր աղջկանց լաւագոյն մարզիկ («Սիամանթօ Կարապետեան բաժակ»)- Ալին Օվաննէսեան, Արեւմտեան Մ.Ն.։
– Ոտնագնդակի լաւագոյն մարզիկ («Վիգէն Զաքարեան բաժակ»)- Տիրան Պէպէքեան, Արեւմտեան Մ.Ն.։
– Վոլիպոլի աղջկանց լաւագոյն մարզիկ («Յովհաննէս Պայթարեան բաժակ»)- Անի Ստեփանեան, Հ.Մ.Ը.Մ.-Հ.Ա.Ս.Կ.։
– Թենիսի լաւագոյն մարզիկ («Վարդան Բախշեան բաժակ»)- Էտմոն Այնէճեան, Կիպրոս։
– Փինկ-փոնկի լաւագոյն մարզիկ («Յովհաննէս Հինդլեան բաժակ»)- Լարա Քէչէպաշեան, Լիբանան։
– Աթլէթիզմի տղոց լաւագոյն մարզիկ («Բիւզանդ Թորիկեան բաժակ»)- Սերժ Չոլաքեան, Լիբանան։
– Աթլէթիզմի աղջկանց լաւագոյն մարզիկ («Վահան Չերազ բաժակ»)- Լոռի Թաշճեան, Լիբանան։
– Լողի տղոց լաւագոյն մարզիկ («Շաւարշ Քրիսեան բաժակ»)- Սեւան Ղարապէյքի, ՀՄԱԿ։
– Լողի աղջկանց լաւագոյն մարզիկ («Տիգրան Ոսկունի բաժակ»)- Մարի Սամաքեան-Ճիորճիու, Կիպրոս։
– Ճատրակի տղոց լաւագոյն մարզիկ («Գրիգոր Յակոբեան բաժակ»)- Հրաչեայ Վարդանեան, Հ.Մ.Ը.Մ.-Հ.Ա.Ս.Կ.։
– Ֆութսալի տղոց լաւագոյն մարզիկ («Նշան Թիւսիւզեան բաժակ»)- Աւօ Տոնպուրեան, Լիբանան։
– Ֆութսալի աղջկանց լաւագոյն մարզիկ («Արմէն Տէիրմէնճեան բաժակ»)- Պայծառ Ասատրեան, Հ.Մ.Ը.Մ.-Հ.Ա.Ս.Կ.։
– Համա-Հ.Մ.Ը.Մ.-ական 10-րդ մարզախաղերու տիպար մարզիկ («Միհրան Շիմշիրեան բաժակ»)- Քուինթ Քեմնից, Արեւմտեան Մ.Ն.։
Լաւագոյն մարզիկներու մրցանակաբաշխութենէն ետք, փակման հանդիսութեան կատարուեցաւ իւրաքանչիւր մարզաձեւի լաւագոյն երեք խումբերու եւ մարզախաղերու տիպար պատուիրակութեան պարգեւատրում։ Արդիւնքները պարզեցին հետեւեալ պատկերը.-
ՓԻՆԿ-ՓՈՆԿ
1. Լիբանան
2. Թեհրանի Հ.Մ.Ա.Կ.
3. Արեւմտեան Մ.Ն.

ԹԵՆԻՍ
1. Արեւմտեան Մ.Ն.
2. Կիպրոս
3. Հ.Մ.Ը.Մ.-Հ.Ա.Ս.Կ.

ԱԹԼԷԹ
1. Լիբանան
2. Արեւմտեան Մ.Ն.
3. Թեհրանի Հ.Մ.Ա.Կ.

ԼՈՂ
1. Թեհրանի Հ.Մ.Ա.Կ.
2. Արեւմտեան Մ.Ն.
3. Կիպրոս

ՃԱՏՐԱԿ
1. Հ.Մ.Ը.Մ.-Հ.Ա.Ս.Կ.
2. Լիբանան
3. Երուսաղէմ

ՖՈՒԹՍԱԼ
1. Հ.Մ.Ը.Մ.-Հ.Ա.Ս.Կ.
2. Լիբանան
3. Հարաւային Ամերիկա

ՎՈԼԻՊՈԼ
1. Հ.Մ.Ը.Մ.-Հ.Ա.Ս.Կ.
2. Արեւմտեան Մ.Ն.

ՈՏՆԱԳՆԴԱԿ
1. Արեւմտեան Մ.Ն.
2. Լիբանան
3. Հ.Մ.Ը.Մ.-Հ.Ա.Ս.Կ.

ԿՈՂՈՎԱԳՆԴԱԿ
1. Արեւմտեան Մ.Ն.
2. Հ.Մ.Ը.Մ.-Հ.Ա.Ս.Կ.
3. Թեհրանի Հ.Մ.Ա.Կ.

Կ’արժէ նշել, որ համաՀ.Մ.Ը.Մ.-ական 10-րդ մարզախաղերու «Տիպար պատուիրակութեան բաժակին արժանացաւ Հ.Մ.Ը.Մ.-ի Գանատայի շրջանը։

ՎԵՐՋԻՆ ՕՐՈՒԱՆ
ԱՐԴԻՒՆՔՆԵՐԸ
Մարզախաղերու վերջին օրը արձանագրուեցան հետեւեալ արդիւնքները.-
Ոտնագնդակ
3-րդ 4-րդ դիրքի մրցում ՝ Երուսաղէմ-Ֆրանսա 3-1
Աւարտական՝ Լիբանան-Արեւմտեան Մ.Ն. 2-0

Ոտնագնդակ կրտսերներ
3-րդ 4-րդ դիրքի մրցում ՝ Լիբանան-Քուէյթ 1-0
Աւարտական՝ Արեւմտեան Մ.Ն. -Հ.Մ.Ը.Մ.-Հ.Ա.Ս.Կ. 1-0

Կողովագնդակ տղաք
3-րդ 4-րդ դիրքի մրցում ՝ Արեւելեան Մ.Ն.-Աւստրալիա 76-55
Աւարտական՝ Արեւմտեան Մ.Ն. (Բ.)-Արեւմտեան Մ.Ն. (Ա.) 90-86

Կողովագնդակ կրտսեր տղաք
3-րդ 4-րդ դիրքի մրցում ՝ Լիբանան-Արեւելեան Մ.Ն. 48-44
Աւարտական՝ Արեւմտեան Մ.Ն. (Բ.)-Արեւմտեան Մ.Ն. 64-44

Կողովագնդակ աղջիկներ
3-րդ 4-րդ դիրքի մրցում ՝ Արեւմտեան Մ.Ն (Ա.). -Աւստրալիա (Բ.) 67-16
Աւարտական՝ Հ.Մ.Ը.Մ.-Հ.Ա.Ս.Կ.-Արեւմտեան Մ.Ն. (Բ.) 74-71

Կողովագնդակ կրտսեր աղջիկներ
3-րդ 4-րդ դիրքի մրցում ՝ Արեւմտեան Մ.Ն. (Բ.)-Հ.Մ.Ը.Մ.-Հ.Ա.Ս.Կ. 44-41
Աւարտական՝ Արեւմտեան Մ.Ն. (Ա.)-Թեհրանի Հ.Մ.Ա.Կ. 59-57

 

Be the first to comment

Leave a Reply

Your email address will not be published.


*