ԱՐՑԱԽԵԱՆ ՈՐՈՏՈՒՄ

ՀԱՅՐԵՆԻՔ

Խմբագրական

 

Ամերիկայի Հայ Դատի յանձնախումբը համացանցային արշաւով մը կ՛ողջունէ Արցախն ու անոր հերոս ժողովուրդը:
Պարզապէս «Որոտում» կը կոչուի Արցախի ի նպաստ քարոզչութիւն կատարող եւ այս սուրբ հողին բարգաւաճման համար դրամահաւաք կատարելու նպատակ ունեցող արշաւը, որուն կարելի է միանալ դիմատետրով, դայլայլիչով, ճռուողիչով, եւ այլ ամէն տեսակի արդի համացանցային ծրագրերով:
Գերարդիական այս օրերուն, գործածուած միջոցները շատ են, սակայն նպատակները միեւնոյնն են՝ ապահովել կարիքաւորներու օժանդակութեան սպասարկութիւն, վերջ տալ ականներու պայթումին իբրեւ հետեւանք պատահած արկածներուն եւ հաստատել Ատրպէյճանի յարձակողապաշտ քայլերը բացայայտող համակարգ մը:
Ամերիկայի Հայ Դատի վարժողական ծրագիրներու մասնակիցներուն կողմէ, պատրաստուած այս «որոտում»ին կարելի չէ անտարբեր մնալ:
Անկախութեան 25-ամեակը արդէն իսկ բոլորած Արցախը իր հերոսներու արիւնով ներկուած յոյսի ճանապարհն է եւ խորհրդանիշ՝ հայորդիի ամուր վճռակամութեան ու ամէն գնով իր ազգային իրաւունքը պաշտպանելու գիտակից յանձնառութեան:
Այս «որոտում»ը պարզ շարունակութիւնն է պատերազմի դաշտին վրայ նուաճուած յաղթանակը հաստատ հիմերու վրայ ամրացնելու, ծաղկեցնելու եւ պահպանելու:
Այս «որոտում»ը շարունակութիւնն է հողին ամուր կապուածութեամբ, եւ բնականաբար ո՛չ մէկ զիջում կատարելու յանձնառութեամբ, պահապան բանակը աւելի հզօրացնելու զօրակցութեամբ, տնտեսութիւնը հարստացնելու գործունէութեան մասնակցութեամբ, կառչած մնալու Արցախին, որ ամիսներ առաջ հանրաքուէով որդեգրեց նոր սահմանադրութիւն մը` գործադիր, օրէնսդիր եւ դատական անկախ մարմիններով:
Բնականաբար ատրպէյճանական քարոզչական մեքենան ձեռնունայն պիտի չմնայ այս «որոտում»ին դիմաց, մանաւանդ որ Հայ Դատի վարժողական ծրագիրներու մասնակիցներուն կողմէ, պատրաստուած այս ծ

րագիրը լոյս ընծայած է նամակներու պատճէններ, որոնք արձանագրուողներուն անունով պիտի առաքուին նաեւ քոնկրէսականներուն, որոնք մօտէն եւ բծախնդրօրէն պէտք է տեղեկանան թէ քսանականներուն, Կովկասեան բարձրաւանդակի խորհրդայնացման օրերուն, պարտադրաբար եւ հակառակ իր բնակչութեան կամքին, քաղաքական սին եւ սնոտին հաշիւներու արդիւնք՝ Արցախը ներառուեցաւ կամ աւելի ճիշտը նուիրուեցաւ Ատրպէյճանին եւ այսպէս եօթանասուն դաժան տարիներ, շարունակ Արցախի հայ բնակչութիւնը տարբեր կայծակներ եւ որոտումներու արձակեց, շանթահար ընելով բռնատէր ազերին եւ անդադար պահանջեց իր սուրբ հողին կցումը՝ Հայաստանին:
Հուսկ, ողջո՜յն Արցախեան որոտումին:
…Տարբեր որոտում, որ արտացոլացումն է Արցախի ժողովուրդի պատգամին:
Իսկ ամերիկահայ երիտասարդութիւնը այս ծրագրով կը վերահաստատէ իր հաւատարմութիւնը եւ կը յայտարարէ թէ պիտի մնայ ամրօրէն կառչած հաւատքով ու կամքով վերատիրացած Արցախի ժողովուրդին ինքնորոշման իրաւունքին:

 

Be the first to comment

Leave a Reply

Your email address will not be published.


*