Նիւ Եորքի Միակ Ամէնօրեայ Վարժարանը Յիսուն Տարեկան

Աշխէն Գէորգեան      

 Նիւ Եորք

2017 տարին Նիւ Եորքի Սրբոց Նահատակաց Ամէնօրեայ Վարժարանի (Ս.Ն.Ա.Վ.) ընտանիքին համար նշանակալից տարի է- Ոսկեայ Յոբելենական Տարի:

Շարք մը հանդիսութիւններով դպրոցը իր ուսուցչական կազմով, տնօրէնութեան,Սրբոց Նահատակաց Ամէնօրեայ Վարժարանի բարեկամներու յանձնախումբին, շրջանաւարտներուն եւ հոգաբարձութեան միացեալ ջանքերով կ՛աշխատին արժանաւորապէս նշել այս անկիւնադարձային տարին:Այդ հանդիսութիւններու շարքէն երկուքը տեղի ունեցան Յունիս 3-ին եւ Յունիս 16-ին:

Երկու ձեռնարկներն ալ Նիւ Եորքահայութիւնը կը հրաւիրէր ականատես ըլլալու Մեսրոպ Մաշտոցի ջահը վառ պահող այս նախկրթարանին պանծալի Յիսնամեակին:

Յիսուն տարի առաջ 1967-ին – խումբ մը ազգայիններ եկեղեցւոյ հովիւին՝ Տ. Վարդան Քհնյ. Մկրեանին առաջնորդութեամբ խիզախութիւնը ունեցած էին սկսելու ԱՄԷՆՕՐԵԱՅ ՀԱՅ վարժարան մը՝  անտեսելով Հայ Դպրոց մը հիմնելու կապակցութեամբ բոլոր ժխտական կեցուածքներն ու դժուարութիւնները: Սրբոց Նահատակաց Ամէնօրեայ Վարժարանը եկաւ փաստելու թէ մանուկին առաջին եօթ-ութ տարիներուն համար որքան կարեւոր էր նման միջավայրը – մանաւանդ՝ ամերիկեան գերիշխող պայմաններուն մէջ:  

Սրբոց Նահատակաց Ամէնօրեայ Վարժարանէն ներս հայ մանուկին հոգիին մէջ կը սերմանուի գիտութեան հանդէպ սէր, ինքնաճանաչման եւ բարոյական արժէքներու գիտակցութիւն եւ ապագայի մարտահրաւէրները դիմագրաւելու ներուժ, ինքնավստահութիւն եւ այս բոլորը- հայ լեզուի, անգլերէն կրթական ծրագրի բարձր որակի ուսուցման զուգահեռ:2017, Յունիս 3-ի պարահանդէս-ճաշկերոյթը որքան որ համայնքի ընտանիքները ի մի բերելով զուարճանալու համար առիթ մըն էր, նոյնքան եւ աւելի կարեւոր ձեռնարկ մըն էր տարիներու ընթացքին վարժարանին հանդէպ առատաձեռն բարերարներուն երախտագիտութիւն յայտնելու նման հրապարակային առիթով:

Դրուատական խօսքերով Սրբոց Նահատակաց Ամէնօրեայ Վարժարանի  Բարեկամներու Յանձնախումբի Ատենապետ՝  Յովհաննէս Մալիքեան մէկ առ մէկ թուարկեց այն բոլոր բարերարները որոնց առատաձեռնութեան շնորհիւ վարժարանը կը գոյատեւէ: Անոնցմէ ոմանք արդէն յաւէտ մեկնած են այս աշխարհէն, սակայն անոնց յաջորդները տակաւին կը շարունակեն իրենց ընտանիքին աւանդը: Այս տարուայ դրամահաւաքի գրքոյկին բարերարներն էին իրենց առատաձեռնութեամբ վարժարանը քաջալերող՝ մայր եւ որդի Տիկին Մարի եւ Պերճ Յարութիւնեանները:  

Անցնող քսան տարիներու ընթացքին Սրբոց Նահատակաց Ամէնօրեայ Վարժարանի բարեկամներու յանձնախումբը երախտագիտութեամբ կը յիշէ քսան առատաձեռն նուիրատուներուն եւ աւելի քան եօթանասուն անդամներուն անունները որոնք ծառայած են որպէս անդամ այս նուիրահաւաքի յանձնախումբին:  Յունիս երեքի յիսնամեակի պարահանդէսը միասնաբար նշելու եկած էին աւելի քան 270 ազգայիններ՝  որոնց կարգին ներկայ էին նաեւ բարերարներ Էտուըրտ եւ Գարմէն Կիւլպէնկեան, Նուպար եւ Էնն Մահտէսեան, Վերճինեա Տատուրեան, Վահան եւ Լիսա Թանալ, Նշան եւ Քրիսթին Չորպաճեան եւ շատ ուրիշներ: Յիսնամեայ տօնակատարութեան առթիւ Վարժարանի երկարամեայ Տնօրէնուհի եւ վաստակաշատ մանկավարժ Զարմինէ Պօղոսեան իր ելոյթով հպարտութեամբ ներկայացուց իր աշակերտուհըներէն,Սրբոց Նահատակաց Ամէնօրեայ Վարժարանի շրջանաւարտ, Տիկ. Սեդա Դաւիթեան Մկրեանը, որ վկայեալ է նահանգային մանկավարժական մասնագիտութեամբ:   Դպրոցը իր քսանամեակը տօնած էր Մեր Արմատներուն Պտուղները նշանաբանով, իսկ երեսնամեակը՝ ԱՒԱՆԴԸ ԿԸ ՇԱՐՈՒՆԱԿՈՒԻ ՄԵՐ ԱՇԱԿԵՐՏՆԵՐՈՎ- լոզունքով: Ահաւասիկ, յանձինս Տիկին Սեդային- Աւանդը կը շարունակուի  Սրբոց Նահատակաց Ամէնօրեայ Վարժարանի արմատներէն սնունդ առած թեկնածուով: Այդ ոգիով խանդավառ Տիկին Սեդան եւ շրջանաւարտ արուեստագիտուհի Քրիսթինա Վանտեանին գծագրութեամբ պատրաստած էին հրաշալի պաստառ մը ուր նկարուած էր ոսկեայ բունով ծառ մը, որուն ճիւղերուն վրայ կարմիր ներկով ներկայ բոլոր աշակերտութիւնը իրենց մատիկերով դրոշմած էին բերքը Ս.Ն.Ա.Վ.-ի ոսկեայ տարիներուն:

Ուրբաթ՝ Յունիս 16-ին 35-րդ շրջանաւարտական հանդէսը տեղի ունեցաւ: Տօնական տրամադրութեամբ սրահը լեցուն էր պատուական հիւրերով, շրջանաւարտներով եւ իրենց հարազատներով: Շրջանաւարտները իրենց խօսքին մէջ նշեցին վարժարանին յիսուն տարիներու  ներդրումը հայ համայնքէն ներս: Սրբոց Նահատակաց Ամէնօրեայ Վարժարանը հպարտութեամբ կը յայտարարէ թէ իր բարձր մակարդակի կրթական ծրագիրը գնահատուած է Նիւ Եորք նահանգի կրթական նախարարութեան քննութիւններու արդիւնքներէն հիմնուելով  Տիկ. Զարմինէ Պօղոսեանի օրերուն,Սրբոց Նահատակաց Ամէնօրեայ Վարժարանը ճանչցուած է որպէս թիւ մէկ նախակրթարանը Քուինզ շրջանի եւ վեցերորդը՝ Նիւ Եորք Քաղաքի հինգ շրջաններու բոլոր դպրոցներուն հետ բաղդատած:  2017-ի աւարտական հանդէսով Սրբոց Նահատակաց Ամէնօրեայ Վարժարանը իր 35-դ հունձքը ներկայացուց համայնքին: Հայկ Առաքելեան, Լուսինէ Գալստեան եւ Արմէն Փանոսեան շրջանաւարտները ղեկավարութեամբ ուսուցչուհիներ Հուրի Ղուկասեանին եւ Հրիփսիմէ Ն. Փօլատեանի երկլեզու գեղեցիկ ելոյթով ներկայացուցին Սրբոց Նահատակաց Ամէնօրեայ Վարժարանի  անցեալն ու ներկան:

 Երեք շրջանաւարտներ՝ որոնք աղաւնիի թեւեր առած պիտի երթային նոր հորիզոններ, նոր ուսումնական կեդրոններ ապագայ կերտելու: Ինչպէս Եկեղեցւոյ հովիւ՝ Արժ. Տ. Աբարահամ Քհնյ. Մալխասեանը ընդգծեց, անոնք պիտի դառնան վարժարանին լաւ լուրերը տարածող աղունիկները, մասնագիտանալէ ետք ընդմիշտ վերադառնալու իրենց սնունդ տուող Սրբոց Նահատակաց Ամէնօրեայ Վարժարանին:Վարժարանի Տնօրէնուհի Տիկ. Սեդան, իր գնահատանքն ու շնորհակալութիւնը յայտնեց ամբողջ տարի մը իր թիկունքին կանգնած Սրբոց Նահատակաց Ամէնօրեայ Վարժարանի ջահը փոխանցող, վաստակաշատ տնօրէնուհի եւ դաստիարակ՝ Տիկ. Պօղոսեանին: Տիկ. Պօղոսեան իր երախտագիտական խօսքերով շնորհակալութիւն յայտնեց Սրբոց Նահատակաց Ամէնօրեայ Վարժարանի ընտանիքին, որոնց շնորհիւ ան արժանացաւ Քուինզ Շրջանի քաղաքապետ՝ Քլէր Շուլմանին յատուկ գնահատագրին, որով Նոյեմբեր 16, 1997–ը կը յայտարարէր Զարմինէ Պօղոսեանի Օր իր մանկավարժական բացառիկ նուիրումին եւ ծառայութեան տասնամեակին առթիւ:

Իսկ Հոկտեմբեր 24, 2014-ին Տիկին Պօղոսեանին շնորհուած էր  Ն.Ս.Օ. Տ.Տ. Գարեգին Բ.Վեհափառ Հօր Հայրապետական Կոնդակ եւ Ս. Մեսրոպ-Ս. Սահակ շքանշանը գնահատելու համար իր մանկավարժական բազմամեայ ծառայութիւնը որ սկսած էր Հալէպի Կրթասիրաց Վարժարանէն: Ան համեստօրէն շեշտեց թէ շատ բան սորված է իր աշակերտներէն, աշխատակիցներէն, ծնողներէն եւ դպրոցը սիրով եւ նուիրումով շրջապատող անձնաւորութիւններէն: Իր երախտագիտութիւնը յայտնեց բոլոր անոնց, որոնք բաժին ունեցած են այդ պատուաբեր գնահատականներով հարստացնելու իր կեանքն ու նուիրումը հայեցի դաստիարակութեան մարզին մէջ: Ան գոհ սրտով կը հեռանայ վարժարանէն վստահ ըլլալով որ ԱՒԱՆԴԸ ՊԻՏԻ՛ շարունակուի Սրբոց Նահատակաց Ամէնօրեայ Վարժարանի շրջանաւարտներով:

Շրջանաւարտական հանդէսին իրենց մասնակցութիւնը բերին 2005-ի շրջանա-ւարտ՝ շնորհալի Գայեանէ Ժամկոչեան, շրջանաւարտներուն ուղղուած իր իմաստալից ելոյթով: Իսկ իր գեղեցիկ ձայնով ներկաներուն հիացմունքին արժանացաւ 2010-ի շրջանաւարտ Տէպըրա Ակոբեան: Բեմի պաստառը Նիւ Եորքի տեսարանին զուգահեռ Արարատով փայլող արուստի գործին հեղինակն էր Քրիսթինա Վանտեան-2010-ի շրջանաւարտ: Հանդէսը աւարտին հասաւ 5 եւ 6 կարգի աշակերտներուն փունջ մը գեղեցիկ երգերու ելոյթով, Տիկ.Անահիտ Պօղոսեանի ղեկավարութեամբ եւ Տիկ. Նուարդ Տատուրեանի նուագակցութեամբ:

Հանդէսի պաշտօնական աւարտին շքեղ հիւրասիրութիւնը կը սպասէր բոլորին: Այս առթիւ գնակատական խօսքերով բեմ հրաւիրուեցաւ նաեւ հոգաբարձութեան երկարամ-եայ ատենադպրուհի Տիկ. Ռոզ Յարութիւնեանը, եւ առ ի գնահատանք ստացաւ գեղեցիկ յուշանուէր մը ձեռամբ համա-ատենապետներ՝ Արփի Ճանտանի եւ Յովհաննէս Մալիքեանի:

Բոլորին ի սրտէ մաղթանքն էր Նիւ Եորքի միակ ամէնօրեայ այս նախակրթարանը հասցնել երկրորդականի եւ դիմաւորել ԱԴԱՄԱՆԴԵԱՅ եւ ինչու չէ նաեւ ԴԱՐԱԴԱՐՁԻ տօնախմբութիւնը ի պարծանս հայ լեզուի  եւ մշակոյթի գոյատեւման:

Be the first to comment

Leave a Reply

Your email address will not be published.


*