Hairenik Weekly Newspaper

«Մենք Գնում Ենք Յստակ, Ճշտուած, Սպիտակի Վրայ Սեւով Գրուած Նպատակների Իրականացման Համար…», Կը Յայտնէ Հ.Յ.Դ. Բիւրոյի Ներկայացուցիչ Հրանդ Մարգարեան

Ստորեւ, յապաւումով լոյս կ՛ընծայենք հարցազրոյց մը, կատարուած «Երկիր»ի կողմէ, Մայիս 1-ին, Հ.Յ.Դ. Բիւրոյի ներկայացուցիչ Հրանդ Մարգարեանի հետ:

Հ.- Մամուլը յամառօրէն գրում է, որ Հ.Յ.Դ.-ի եւ վարչապետ Կարէն Կարապետեանի յարաբերութիւնները լարուած են: Այսօր էլ թերթերից մէկը գրել էր, թէ իբր երէկ մի խնճոյքում Կարէն Կարապետեանի կատակների հիմնական թեման եղել են դաշնակցականները, թէ իբր դաշնակցական նախարարներին մտածում է կանանցով փոխարինել:

Պ. -Ներկայ չեմ եղել այդ թերթի մատնանշած խնճոյքին, չգիտեմ` ով ինչ է ասել, բայց կարծում եմ, որ այն մարդիկ, ովքեր նման լուրեր են տարածում, այլ նպատակներ են հետապնդում: Ես չեմ ուզում այդ խաղին կուլ գնալ: Այդուհանդերձ, կատակի ժամանակ կարելի է շատ բան ասել, բայց, միեւնոյն ժամանակ, կին նախարար ունենալը կատակելու բան չէ: 21-րդ դարում մարդկութիւնը ձգտում է, որ կանայք նոյնչափ ներկայացուածութիւն ունենան քաղաքականութեան մէջ, կառավարութիւնների մէջ, որչափ տղամարդիկ: Ի՞նչ վատ կը լինի եթէ անգամ վարչապետն էլ կին լինի: Գերմանիոյ Մերքելը կին է, վա՞տ վարչապետ է: Դրա մէջ ոչ մի անպատեհութիւն չկայ, զարմանալու բան չկայ, 21-րդ դարում պէտք է այդպէս մտածել:

Հ.-Այդուհանդերձ, լարուա՞ծ են Դաշնակցութեան եւ վարչապետի յարաբերութիւնները: Եւ, ի վերջոյ, ինչո՞ւ է ուշանում Հ.Հ.Կ.- Հ.Յ.Դ. համագործակցութեան յուշագրի ստորագրման արարողութիւնը:

Պ.-Իրականութեան մէջ նման բան չկայ: «Լարուածութիւն»ն այս դէպքում շատ կոպիտ բառ է: Բնականաբար, մարդիկ ենք, տեսակէտներ ունենք, քննարկումներ են լինում, բայց, վերջիվերջոյ, կայացւում են որոշումներ: Համաձայնագրի գրութիւնը պատրաստ է, չստորագրելու պատճառ, որպէս այդպիսին, չկայ…: Կարծում եմ, որ մօտ օրերս կը լինի ստորագրման արարողութիւնը:
Մենք ունենք բնականոն յարաբերութիւններ վարչապետի հետ, ունենք տեսակէտներ, երբեմն այդ տեսակէտները համընկնում են, երբեմն` տարբերւում իրարից, բայց որեւէ լարուածութիւն մեր յարաբերութիւններում չկայ:

Հ.-Կարէն Կարապետեանի համար ընդունելի՞ են ձեր երեք նախարարները:

Պ.-Նախ մեզ համար պէտք է ընդունելի լինեն մեր նախարարները: Այստեղ է հիմնական հարցը` երբ երկու ուժ համագործակցում են, պէտք է կարողանան մէկը միւսի տեսակէտն ընդունել: Իհարկէ, իրաւունք ունի մեր նախարարների մասին տեսակէտ ունենալու, բայց նաեւ մենք էլ կարող ենք նրա նախարարների մասին տեսակէտ ունենալ, եւ այդ տեսակէտները կարող են տարբերուող լինել: Բայց կարծում եմ, որ այս հանգրուանում նման հարց չկայ:

Հ.-Հ.Հ.Կ.-Հ.Յ.Դ. նոր ստորագրուելիք յուշագիրն անժամկէ՞տ է, թէ՞ մինչեւ 2018 թուականն է:

Պ.-Այս հանգրուանում մեր նոր համաձայնագիրը, ինչպէս նախորդը, բնականաբար, անժամկէտ է լինելու: Սակայն նոյն համաձայնագրում նաեւ գրուած է, թէ որ դէպքում այն կարող է չեղեալ յայտարարուել: Համաձայնագիրը չեղեալ յայտարարելու ձեւը նախատեսել ենք, բայց համագործակցութեան համար ժամկէտ չենք նախանշել:

Հ.-Շա՞տ է տարբերուելու նոր համաձայնագիրը գործողից:

Պ.-Չի տարբերուելու: Այս նոր համաձայնագիրը գործողի լրացուած տարբերակն է: Կառավարութիւնն ինչպէս պէտք է աշխատի. այս մասով է, որ նոր լրացումներ կան:

Հ.-Հ.Յ.Դաշնակցութիւնը համագործակցութեան շուրջ համաձայնութիւնը ո՞ւմ հետ է ձեռք բերել, ո՞ւմ հետ է բանակցում ` նախագահ Սարգսեանի՞, վարչապետ Կարապետեանի՞…

Պ.-Ծրագրային խօսակցութիւնները եղել են երկուսի հետ: Համաձայնութիւնը ձեռք է բերուել Հ.Հ. նախագահ, Հ.Հ.Կ. ղեկավար Սերժ Սարգսեանի հետ:

Հ.-Հ.Յ.Դաշնակցութիւնը պահպանելո՞ւ է իր երեք նախարարութիւնները:

Պ.-Մի´ շտապէք, բայց կարծում եմ` այո:

Հ.-Նոյն նախարարներո՞վ:

Պ.-Մի´ շտապէք, բայց կարծում եմ` այո:

Հ.-Իսկ հնարաւո՞ր է` անգամ ընդլայնէք ձեր տեղն ու դիրքն իշխանութեան մէջ:

Պ.-Մենք փոքր երկիր ենք, ունենք ազգային խնդիրներ, եւ այստեղ ազգային ուժերի առաւելագոյն լարումը կարեւոր է: Դրա անհրաժեշտութիւնը տեսել է այն ուժը, որը մեծամասնութիւն ունի այսօր խորհրդարանում: Նրանք դիմել են մեզ, եւ մենք տեսել ենք, որ մեր երկրի եւ մեր ժողովրդի համար այն դերակատարութիւնը, որ կարող ենք ունենալ` կառավարութիւնում լինելով, իմաստաւորուած է: Մենք գնում ենք` դերակատարութիւն ունենալու: Մենք չենք տրւում որեւէ ուժի, մենք գնում ենք յստակ, ճշտուած, սպիտակի վրայ սեւով գրուած նպատակների իրականացման համար համագործակցութեան եւ յոյս, հաւատ ունենք, որ դա մեզ կը յաջողուի: Իսկ եթէ չյաջողուի, մեզ համար վերադարձի կամուրջը միշտ կայ ու կայ:

Հ.-Ե´ւ քաղաքագիտական շրջանակներում, ե´ւ մամուլում յաճախ կարելի է հանդիպել հետեւեալ մտքին, որ Հ.Հ.Կ.-ն Հ.Յ.Դ.-ի հետ համագործակցութեան գնում է Սփիւռքում Դաշնակցութեան ունեցած տեղի եւ դիրքի պատճառով: Հայաստանի Դաշնակցութեան կարիքն ունի՞ Հանրապետական կուսակցութիւնը:

Պ.-Սփիւռքում Դաշնակցութեան գործօնի մասին դիտարկումը ճիշտ է, բայց դա իրականութեան միայն մի մասն է: Իսկապէս, Դաշնակցութեան` սփիւռքեան համահայկական ուժ լինելու իրողութիւնը շատ է կարեւորում նախ Դաշնակցութիւնը: Սա կասկածից վեր է: Շատ բնական է, որ որեւէ ուժ, որ Դաշնակցութեան հետ համագործակցում է, նաեւ հաշուարկում է Դաշնակցութեան` համահայկական գործօն լինելու իրողութիւնը: Սա բնական է: Բայց սա չի նշանակում, որ նսեմանում է այն դերակատարութիւնը, որ մենք կարող ենք Հայաստանում ունենալ եւ ունենք Հայաստանում: Նոյն այդ մարդիկ ընդունում են, որ Դաշնակցութիւնը Հայաստանում ամենակազմակերպուած ուժն է, ամենակարգապահն է, ամենագաղափարականը: Դաշնակցութիւնը մէկ ամբողջութիւն է, չի կարելի մէկը միւսից առանձնացնել:

Հ.-Այդուհանդերձ, ձեր դէմքը կորցնելու մտավախութիւն չունէ՞ք` դարձեալ համագործակցութեան յուշագիր ստորագրելով Հանրապետականների հետ:

Պ.-Ամենամեծ անպատեհութիւնն այն է, որ մենք չկարողանանք էական ներդրում ապահովել կառավարութեան գործի մէջ, հարցերը նոյն կերպ մնան չլուծուած, ինչ մինչ մեզի կը պատկանէր: Այո, մեր ամենամեծ վախն այն է, որ մենք կարող ենք մեր դէմքը կորցնել, որովհետեւ եթէ չկարողանանք ինքնուրոյնութիւն դրսեւորել, չկարողանանք յստակ դերակատարութիւն ունենալ, կայ, իհարկէ, այդ մտավախութիւնը: Մենք գնում ենք այս համագործակցութեանը եւ հաւատում, որ ունենք որոշակի առաքելութիւն` մեր գաղափարախօսութեանը, մեր յայտարարուած ծրագրերին համահունչ դերակատարութիւն ունենալ կառավարութեան մէջ: Այս հարցում վճռական ենք եւ հաւատով ենք: Նաեւ գիտակցում ենք, որ կարճ ժամանակուայ փորձը տալիս է այդ որպէս այդպիսին մասնակցութիւն ունենալու հնարաւորութիւնը: Սակայն երբեք եւ երբեք չի կարող այս համագործակցութիւնը մեկնաբանուել այնպէս, որ մենք տրուել ենք ինչ-որ դասաւորուածութեան, յարմարուել ենք կացութեանը: Դա բացառուած է Դաշնակցութեան պարագայում: Եւ մենք ունենք համապատասխան կուսակցական կամքը, որ անհրաժեշտութեան դէպքում հետքայլ անենք: Եւ կարծում եմ, որ մեր համագործակցութիւնից մեր երկիրը կը շահի, մեր հետքայլից մեր երկիրը չի շահի, բայց նաեւ գիտակցում ենք, որ մեր երկրին կարող ենք օգտակար լինել, կարելի է այս երկրին ծառայել, կարելի է այս երկրի զարգացման գործին մասնակից դառնալ` թէ՛ իբրեւ ընդդիմութիւն, թէ՛ իբրեւ իշխանութիւն: Այդպէս չէ, որ եթէ մենք իշխանութեան մէջ չլինենք, չենք կարող այս երկրին օգտակար լինել: Հաւատում եմ, որ կարող ենք, բայցեւ հաւատում եմ, որ կարող ենք շատ աւելի ազդեցիկ ներկայութիւն եւ մասնակցութիւն ունենալ գործի մէջ: Նպատակը չի փոխւում: Նպատակն այս երկիրն է եւ այս ժողովուրդը, որովհետեւ պէտք է կարողանանք ժողովրդի հոգսը թեթեւացնել եւ մեր ազգային նպատակների մէջ ոչ մի նահանջ չարձանագրել:

Հ.-Ձեր նախարարները, այս կառավարութիւնը ձեր մատնանշած ուղիո՞վ են գնում:

Պ.-Մի բան կարող եմ ասել` այդ ուղիով պէտք է գնան, յամենայն դէպս, այդ ուղուց շեղուած չեն: