ՏԵՍԱԿՑՈՒԹԻՒՆ ՊԱՂԵՍՏԻՆԻ ՆԱԽԱԳԱՀ ԱՊՊԱՍԻ ՀԵՏ

ՊԷՅՐՈՒԹ.- Հ.Յ.Դ. Բիւրոյի անդամ Բենիամին Պչաքճեան եւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, երեսուն վայրկեան տեւողութեամբ հանդիպում մը ունեցան Պաղեստինեան իշխանութեան նախագահ Մահմուտ Ապպասի հետ, որ քանի մը օրով պաշտօնական այցելութիւն մը կատարած էր Լիբանան եւ տեսակցած՝ պետական անձնաւորութիւններու հետ:
Հանդիպումին ներկայ էին, նաեւ Ապպասի ընկերակցող պատուիրակութեան անդամները: , որոնք ընկերակցած:
Սիրալիր մթնոլորտի մէջ կատարուած, այս հադիպման ընթացքին, նախագահ Ապպաս անդրադարձաւ հայ եւ պաղեստինցի ժողովուրդներու պայքարի նոյնութեան, ինչպէս նաեւ պաղեստինեան դատին նկատմամբ հայ ժողովուրդին ու յատկապէս Հ.Յ. Դաշնակցութեան ցուցաբերած զօրակցութեան:
Խօսակցութեան ընթացքին արծարծուեցան շրջանային եւ միջազգային զանազան հարցեր:
Յատուկ քննարկումի նիւթ դարձաւ Երուսաղէմի հայութեան եւ հայապատկան կալուածներուն հետ առնչուող հարցերը, որոնց գծով նախագահ Ապպաս յիշեցուց, որ նախկին ղեկավար Եասէր Արաֆաթ հայութեան հետ կապուած խնդիրներուն նկատմամբ անզիջող կեցուածք ցուցաբերած է:
Հանդիպումի աւարտին, պաղեստինեան պատկերասփիւռի կայաններուն հարցումներուն պատասխանելով, երեսփոխան Բագրատունի շեշտեց, որ Հ.Յ. Դաշնակցութեան համար բռնագրաւողին դիմադրելը սրբազան դատ է եւ թէ՛ պաղեստինցի եւ թէ՛ հայ ժողովուրդները ունին իրաւազրկուածի նոյն վիճակն ու պայքարելու նոյն հաստատակամութիւնը` յիշելով, որ Պաղեստինի հայութիւնը անքակտելի մէկ բաժինն է պաղեստինցի ժողովուրդին ու անոր պայքարին:
Նշենք թէ, անցեալ Յունուարին, Պաղեստինեան իշխանութեան նախագահ Մահմուտ Ապպաս Բեթղեհէմի Ծննդեան տաճարին մէջ մասնակցած էր հայոց Սուրբ Ծննդեան եւ Աստուածայայտնութեան տօնին: Պաղեստինի նախագահը նախապէս մասնակցած էր նաեւ Ծննդեան տաճարի հայոց վանքին մէջ Երուսաղէմի հայոց պատրիարք Նուրհան արք. Մանուկեանի կողմէ տրուած հիւրասիրութեան: Հիւրասիրութեան ընթացքին պատրիարքը ողջունած է Ապպասի ներկայութիւնը, որմէ ետք Պաղեստինի նախագահը շնորհաւորած էր Երուսաղէմի Սուրբ Յակոբեանց միաբանութիւնը եւ Պաղեստինի հայերը` Սուրբ Ծննդեան եւ Աստուածայայտնութեան տօնին առիթով:

Be the first to comment

Leave a Reply

Your email address will not be published.


*