Հ.Մ.Ը.Մ.-ի Միջդիւանական 9-րդ Խորհրդաժողովին Փակումը

hmem5
Շաբաթ, 29-ի hոկտեմբերի կէսօրին, Նիկոսիոյ մէջ իր աշխատանքները աւարտեց Հ.Մ.Ը.Մ.-ի միջդիւանական 9-րդ խորհրդաժողովը, որ սկսած էր հինգշաբթի, 27 հոկտեմբերին, կազմակերպութեամբ Հ.Մ.Ը.Մ.-ի Կեդրոնական վարչութեան եւ մասնակցութեամբ միութեան 7 Շրջանային եւ 12 Մեկուսի շրջաններու 40 ներկայացուցիչներու:

Խորհրդաժողովը երեք օրուան ընթացքին կատարեց ընդհանուր արժեւորումը միութեան վերջին մէկ տարուան գործունէութեան եւ գնահատանքով անդրադարձաւ Հ.Մ.Ը.Մ.-ի նորաստեղծ մասնաճիւղերուն` Թիֆլիսի, Մոսկուայի, Միւնիխի եւ Հոլանտայի մէջ ծաւալած աշխատանքներուն: Խորհրդաժողովը յատուկ կարեւորութեամբ քննեց Հայաստանի մէջ Հ.Մ.Ը.Մ.-ի տարածման եւ ամրապնդման ծրագիրները` նորանոր միաւորներու եւ կեդրոններու ստեղծման անհրաժեշտութեամբ: Հիմնական քննարկման նիւթ դարձաւ նաեւ Հ.Մ.Ը.Մ.-ի Սուրիոյ մասնաճիւղերուն իրավիճակը եւ այս առիթով խորհրդաժողովը հրապարակեց յատուկ զօրակցագիր մը:

Հ.Մ.Ը.Մ.-ի 9-րդ խորհրդաժողովը իր օրակարգին վրայ ունեցաւ միութեան սկաուտական, մարզական եւ վարչական աշխատանքները հունաւորող ծրագիրներ: Քննարկումի նիւթ դարձան համա-Հ.Մ.Ը.Մ.-ական յառաջիկայ մարզախաղերը (2017) եւ բանակումը (2018) լաւագոյն ձեւով կազմակերպելու ձեւերը: Որոշուեցաւ, որ համա-Հ.Մ.Ը.Մ.-կան մարզախաղերով ազդանշանը տրուի միութեան 100-ամեակի տօնակատարութիւններուն, իսկ բանակումով եւ Երեւանի մէջ կազմակերպուած մեծաշուք հանդիսութեամբ փակումը կատարուի միութեան մէկ դարեայ յոբելենական տարուան:

Խորհրդաժողովը իրազեկ դարձաւ Հ.Մ.Ը.Մ.-ի 100-ամեակի նախապատրաստութիւններուն: Ներկայացուեցան 100-ամեակի խորհրդանշանը, բնաբանը, երգը, գլխաւոր հանդիսութիւններուն ծրագիրն ու հրատարակչական աշխատանքները: Նշուեցաւ նաեւ Հայաստանի Ա. Հանրապետութեան 100-ամեակը արժանավայել շուքով կատարելու անհրաժեշտութիւնը:

Խորհրդաժողովը քննեց նաեւ միութեան քարոզչական համակարգին վերաբերող հարցեր եւ գոհունակութեամբ տեղեկացաւ, որ արդէն իսկ ընթացք առած են միութեան արդիական կայքի պատրաստութեան, «Մարզիկ» պաշտօնաթերթի թուայնացման եւ «Մարզիկ» երկլեզու լրատուին աշխատանքները:

Ներքին վարչական իմաստով, խորհրդաժողովը շեշտեց արդի արհեստագիտութեան միջոցներէն առաւելագոյնս օգտուելու հրամայականը: Այս իմաստով, ներկայացուեցաւ «Կուկըլ»-ի հետ Հ.Մ.Ը.Մ.-ի կնքած համաձայնութիւնը եւ միութեան ռազմավարական ծրագիրի արդի արհեստագիտութեան բաժինին նորագոյն ծրագիրները:

Խորհրդաժողովի աւարտին, մասնակիցները արծարծեցին Հ.Մ.Ը.Մ.-ի աշխարհասփիւռ 107 մասնաճիւղերը յուզող ազգային ընդհանրական մտահոգութիւններ (Միջին Արեւելքի հայութեան տեղաշարժ, Եւրոպայի մէջ նոր գաղութներու կազմակերպման պահանջ, հայախօսութեան նահանջ, նիւթական դժուարութիւններ, երիտասարդութեան ներգրաւման միջոցներ, դաստիարակչական արդիական ծրագիրներ եւ այլն):

hmem4Շաբաթ, Հոկտեմբեր 29-ի երեկոյեան, Հ.Մ.Ը.Մ.-ի միջդիւանական 9-րդ խորհրդաժողովի մասնակիցները ներկայ գտնուեցան Կիպրոսի Հ.Մ.Ը.Մ.-ՀԵՄ-ի մասնաճիւղի սկաուտական հանդիսութեան, ուր տեղի ունեցաւ սկաուտներու գնահատագիրներու յանձնում եւ աստիճաններու տուչութիւն:

Հանդիսութեան խօսք առաւ Հ.Մ.Ը.Մ.-ի Կեդրոնական վարչութեան ատենապետ Գառնիկ Մկրտիչեան: Խօսքին աւարտին, ան Հ.Մ.Ը.Մ.-ի «Ծառայութեան» շքանշանով պարգեւատրեց Հ.Մ.Ը.Մ.-Հ.Ե.Մ.-ի վաստակաշատ անդամ, ատենապետ Յակոբ Գազանճեանը: Նոյն առիթով, ան յուշանուէրներով պատուեց կիպրահայ համայնքի երախտաշատ անդամներէն Արթօ Դաւիթեանը, Նիկոսիոյ հոգեւոր հովիւը, Հ.Յ.Դ. կոմիտէն եւ Հ.Մ.Ը.Մ.-Հ.Ե.Մ.-ի վարչութիւնը:

 

 

Զօրակցագիր
Հ.Մ.Ը.Մ.-ի միջդիւանական 9-րդ խորհրդաժողովը (Նիկոսիա, Հոկտեմբեր 27-29, 2016) իր եռօրեայ նիստերուն ընթացքին լայնօրէն անդրադարձաւ Հ.Մ.Ը.Մ.-ի պատմական շրջաններէն Սուրիոյ ներկայ իրավիճակին:

Խորհրդաժողովը դրուատիքով արձանագրեց, որ հակառակ Սուրիան հարուածող արիւնալի պատերազմին, Հ.Մ.Ը.Մ.-ի Սուրիոյ 5 մասնաճիւղերը` Հալէպը, Դամասկոսը, Լաթաքիան, Գամիշլին եւ Քեսապը, ազգային բարձր գիտակցութեամբ եւ միութենական օրինակելի յանձնառութեամբ` իրենց գործունէութիւնը կը շարունակեն անխախտ հաւատքով եւ կամքով:

Հ.Մ.Ը.Մ.-ի գաղափարական դրօշին տակ ծառայող քոյրեր եւ եղբայրներ իրենց բոլորանուէր մասնակցութիւնը կը բերեն գաղութի պահպանման ու պաշտպանութեան վեհ գործին` ի հարկին զոհաբերելով իրենց գարուն կեանքերը:

Հ.Մ.Ը.Մ.-ի միջդիւանական 9-րդ խորհրդաժողովը, միութեան աշխարհասփիւռ մեծ ընտանիքին անունով խոնարհեցաւ Սուրիոյ պատերազմին զոհուած 24 Հ.Մ.Ը.Մ.-ականներու յիշատակին դիմաց եւ իր բարձր գնահատանքը յայտնեց տագնապալի պայմաններու մէջ Հ.Մ.Ը.Մ.-ի ազգանուէր գործը շարունակող հաւատաւոր միութենականներուն:

Այս առիթով խորհրդաժողովը շեշտեց Հ.Մ.Ը.Մ.-ի Սուրիոյ ընտանիքին ամբողջական զօրակցութիւն ցուցաբերելու անհրաժեշտութիւնը, որպէսզի շրջանը անխափան շարունակէ նորահաս սերունդներու հայապահպանման նուիրական իր առաքելութիւնը:

Հ.Մ.Ը.Մ.-Ի ՄԻՋԴԻՒԱՆԱԿԱՆ 9-ՐԴ ԽՈՐՀՐԴԱԺՈՂՈՎ

Be the first to comment

Leave a Reply

Your email address will not be published.


*