Ոչ Եւս Է Արմէն Սամուէլեան

SAMUELIAN2

ՓԱՐԻԶ («Նոր Յառաջ»).- Յունիս 24-ին, 85 տարեկանին իր մահկանացուն կնքեց Հրանդ Սամուէլի որդին՝ Արմէն Սամուէլեան, որու անունը սերտօրէն առընչուած պիտի մնայ Փարիզի հայ մտաւորական կեանքի պատմութեան:
Իր հօրմէն վարակուած՝ գրականութեան սիրահար, ողբացեալը անոր «Սամուէլեան» գրատան գիրքերու բոյրին եւ փոշիներուն մէջ հասակ առած էր:
Արեւելագիտութեան մատենագիտութեան ճիւղին մէջ հմտանալու համար Արմէն յաճախած էր Փարիզի Արեւելեան լեզուներու ամպիոնը, հետեւելով փրոֆ. Ֆէյտիի դասընթացներուն, սորված՝ հայերէն եւ արաբերէն։
Արմէն Սամուէլեան, 1945-ականներէն արդէն խորասուզուած էր Մէօսիէօ-լը-Փրենս փողոցի միջազգային հռչակ վայելող այս գրատան հազարաւոր գիրքերուն մէջ, որ Ցեղասպանութենէն ետք Փարիզի մէջ կազմաւորուող հայ համայնքի, բայց նաեւ գաւառաբնակ ամբողջ Հայութեան հանդիպման վայրը դարձած էր: Իսկ 1977-ին, Հրանտ Սամուէլի մահէն ետք, Արմէն Սամուէլեանի եւ իր քրոջ՝ Ալիս Սամուէլեան-Ասլանեանի անունները անմիջականօրէն պիտի կապուէին գրատան հետ, որ դեռ երկար տասնամեակներ պիտի հանդիսանար ֆրանսահայ մտաւորականութեան —եւ ոչ միայն— ժամադրավայրը, ակունքը, դարբնոցը:SAMUELIAN3SAMUELIAN1
Հայ Դատի թունդ պաշտպաններ՝ Արմէն Սամուէլեան եւ քոյրը մեծ ներդրում ունեցած են նաեւ հրատարակչական գործին մէջ, ինչ կը վերաբերի Հայ Դատի եւ Հայկական Հարցի թեմաներով լոյս տեսած ֆրանսերէնով հատորներուն (որոնց հեղինակները անպայման անցած էին Սամուէլեան գրատունէն), որոնք պէտք էր վայելէին հայ կազմակերպութիւններու նեցուկը։
Նաեւ իրենց ա՛յդ վաստակին համար է, որ 2007-ին, Հայաստանի տարուան առթիւ Արմէն եւ Ալիս պարգեւատրուած էին Պատուոյ լեգէոնի ասպետի շքանշանով:
Արմէն Սամուէլեանի մահով՝ Փարիզի հայ համայնքի երբեմնի փառաւոր խմբանկարէն կը պակսի մէկը եւս, որու տեղը պիտի մնայ պարապ:
Էջ մը եւս փրթաւ փարիզի հայ մտաւորական կեանքի պատմութեան գիրքէն:

Be the first to comment

Leave a Reply

Your email address will not be published.


*