Պոսթըն.- Մայքըլ Կանտոլֆիի «Առաւօտ Լուսաբեր»ը… Ի Յիշատակ Հայոց Ցեղասպանութեան 100-ամեակին

Լուսանկար՝ Liza Voll
Լուսանկար՝ Liza Voll

Թղթակից

Յատուկ «Հայրենիք»-ի համար

Հանրածանօթ երգեհոնահար Պերճ Ժամկոչեանի (1929-2004) հիմնած «Կոմիտաս» հիմնարկը, որ 1970-էն ի վեր կը գործէ, այս տարի մտայղացումը ունեցած էր երգեհոնով յօրինուած գործ մը պատրաստել, ի յիշատակ Հայոց Ցեղասպանութեան հարիւրամեակին:
Այս յօրինումը վստահուեցաւ Մայքըլ Կանտոլֆիի (ծնած 1956-ին,Մելրոզ – Մասաչուսէց), որուն համար շուտով յստակացաւ թէ, երաժշտական բնագաւառէն աւելի կարեւոր էր նոյնինքն ահաւոր դէպքին՝ Հայոց Ցեղասպանութեան մասին, աւելի մօտէն ծանօթանալն ու տեղեկանալը:
Ան 2014-ի աշնան, երկար ուսումնասիրութիւններ եւ ընթերցումներ կատարեց, շատ աւելի մօտէն ծանօթանալու համար 1915-ի իրադարձութիւններուն:

Մայքըլ Կանտոլֆի
Մայքըլ Կանտոլֆի

Արդիւնքը…28 վայրկեան տեւողութիւն ունեցող գործ մը՝ «Առաւօտ Լուսաբեր»ը («Ascending Light»), որ առաջին անգամ ըլլաով ներկայացուեցաւ ունկնդիրներուն, Պոսթընի համերգային նուագախումբի սրահէն ներս, Մարտ 26-28 (նաեւ պիտի կրկնուի Մարտ 31-ին):
Նաեւ տեղւոյն համերգասրահի վերանորոգուած երգեհոնին համար պատրաստուած այս գործին համար, նկատի առնուած էր ֆրանսացի երիտասարդ երգեհոնահար Օլիվիէ Լաթրին, որ ամենայն հարազատութեամբ տիրապետեց ստեղնագործին վրայ, իր կողքին ունենալով Պոսթընի համերգային նուագախումբն ու իր երիտասարդ լաթվիացի մաէսթրօն՝ Անտրիս Նելսոնսը:
«Առաւօտ Լուսաբեր»ը կը բաղկանայ երկու մասերէ՝ «Վիս Վիթալիս» եւ «Տիգրանակերտի Օրօր»ը:
Հայկական երանգներու եւ կշռոյթի ծանօթ ունկնդիրին համար, շուտով յատուկ կապ մը կը ստեղծուի այս գործին ունկնդրութեամբ: Հոն կը հնչեն «Տըլէ Եաման», «Հայր Մեր»ն ու այլ հայկական մեղեդիներ, որոնք մերթ տխրութիւն եւ մերթ զուարճանք կը ստեղծեն:
Երգեհոնի կողքին, Կանտոլֆիի այս գործին մէջ կը տիրապետեն նաեւ փողային եւ հարուածային գործիքները, միշտ ալ իրենց ետին ձգելով հայկական երանգներ:
Այս գործի ներկայացման աւարտին, երկար ծափողջոյններէ ետք, նաեւ բեմ բարձրացաւ նոյնինքն յօրինող Կանտոլֆին, իր կողքին ունենալով մաէսթրօ Նելսոնսն ու երգեհոնահար Լաթրին:
Նշենք թէ, նախքան այս յայտագիրը, կատարուեցաւ զրոյց եւ հարց-պատասխան՝ Կանտոլֆիի այս գործին մասին, ուր բազմիցս խօսուեցաւ Հայոց Ցեղասպանութեան մասին: Փոխան բանախօսութեան կամ կլոր սեղանի, այս անգամ արուեստն ու մշակոյթն էին, որոնք կը կատարէին Հայոց Ցեղասպանութեան ճանաչման աշխատանքը:
Այս ելոյթներուն երկրորդ մասով, մաէսթրօ Նելսոնս ներկայացուց Կուսթավ Մալըրի վիթխարի գործերէն՝ վեցերորդ համանուագը:

 

Be the first to comment

Leave a Reply

Your email address will not be published.


*