Հայ-Չինական Հռչակագիր

china1

ԵՐԵՒԱՆ.- Հ.Հ. նախագահ Սերժ Սարգսեան քանի մը օրով այցելեց Չինաստան, ուր տեղի ունեցան պաշտօնական հանդիպումներ: Մարտ 25-ին, նախագահ Սարգսեան հանդիպում մը ունեցաւ Չինաստանի նախագահ Շի Ժինփինկի հետ: Երկու պետութիւններու ղեկավարները ջերմ եւ բարեկամական մթնոլորտի մէջ խորհրդակցեցան հայ-չինական յարաբերութիւններուն, ինչպէս նաեւ փոխադարձ հետաքրքրութիւն ներկայացնող միջազգային եւ տարածաշրջանային քաղաքական հարցերու մասին:
Հանդիպման աւարտին, Հայաստանի եւ Չինաստանի նախագահները ստորագրեցին «Հայաստանի Հանրապետութեան եւ Չինաստանի Ժողովրդական Հանրապետութեան բարեկամական համագործակցութեան յարաբերութիւններու հետագայ զարգացման եւ խորացման մասին» հռչակագիր մը, որուն մէջ կը նշուի, թէ կողմերը պիտի շարունակեն զարգացնել փոխադարձ յարգանքի, հաւասարութեան եւ փոխադարձ շահերու հիման վրայ ձեւաւորուած յարաբերութիւնները, ու հետեւելով նախապէս կատարուած 1996-ի եւ 2004-ի հռչակագրերու դրոյթներուն՝ հետեւողականօրէն պիտի իրականացնեն երկկողմանի համագործակցութեան ընդլայնման ուղեգիծ՝ քաղաքական, առեւտրական, տնտեսական, մարդասիրական եւ այլ ոլորտներու մէջ, հայ-չինական յարաբերութիւններու բարեկամական համագործակցութեան զարգացման նպատակով, ի շահ երկու երկիրներու ժողովուրդներուն:
Նոր հռչակագիրին մէջ, հայկական կողմը կը հաստատէ Չինաստանի քաղաքականութեան իր աջակցութիւնը՝ հանդէս գալով Թայուանի անկախութեան դէմ եւ վերահաստատելով, որ Թայուանի հետ որեւէ պաշտօնական կապ պիտի չհաստատէ:china2
Չինական կողմը հանդէս եկաւ Արցախի հակամարտութեան խաղաղ եւ արդար կարգաւորման օգտին՝ Մ.Ա.Կ.-ի կանոնադրութեան հիմնական նպատակներուն եւ միջազգային իրաւունքի համընդհանուր ճանչցուած սկսզբունքներուն համաձայն:
Երկու կողմերն ալ յայտարարեցին, որ պիտի չանդամակցին որեւէ միութեան կամ դաշինքի, որոնք ուղղուած են կողմերէն մէկուն ինքնիշխանութեան, ապահովութեան եւ տարածքային ամբողջականութեան դէմ, ու պիտի չձեռնարկեն այնպիսի գործողութիւններու, որոնք վնաս կը հասցնեն միւս կողմի ինքնիշխանութեան, ապահովութեան եւ տարածքային ամբողջականութեան, ներառեալ՝ երրորդ կողմի հետ պայմանագիրներու կնքումին ու իրենց տարածքին մէջ այնպիսի կազմակերպութիւններու եւ խմբաւորումներու արգիլման, որոնք վնաս կը հասցնեն միւս կողմին:
Կողմերը լիովին սատարեցին երկու երկիրներու ժողովուրդներուն ընտրած զարգացման ճանապարհը, եւ հաստատեցին աջակցութիւնը միւս կողմի ջանքերուն՝ ուղղուած պետական անկախութեան, ինքնիշխանութեան, ապահովութեան եւ տարածքային ամբողջականութեան ամրապնդման, ընկերաքաղաքական կայունութեան ապահովման եւ ազգային տնտեսութեան զարգացման: Նաեւ նշուեցաւ, որ առեւտրական, տնտեսական կապերը հայ-չինական յարաբերութիւններու բարեկամական համագործակցութեան կարեւոր բաղկացուցիչն են: Չինական կողմը կը խրախուսէ իր ձեռնարկութիւններուն՝ Հայաստանի մէջ ներդրումներ կատարելու եւ նոր ձեռնարկութիւններ ստեղծելու հարցով:
Կողմերը պատրաստակամութիւն յայտնեցին հանգամանօրէն քննելու նիւթական համագործակցութեան զարգացման հարցը, ներառեալ՝ ազգային արժէքներու փոխանակումները, նաեւ՝ գտնելու ֆինանսաւորման բազմազան միջոցներ եւ նիւթական աջակցութիւն տրամադրելու համագործակցութեան կարեւոր նախագիծերուն:
Նշուեցաւ, որ Մետաքսի ճանապարհի տնտեսական գօտիի համատեղ ստեղծման նախաձեռնութիւնը նոր հնարաւորութիւն պիտի ընձեռէ երկու երկիրներու բազմակողմանի համագործակցութեան համար: Նաեւ, պիտի շարունակուի ընդլայնուիլ ուսանողներու փոխանակումը: Չինական կողմը պատրաստ է պետական կրթաթոշակներու տրամադրումը շարունակելու Չինաստանի մէջ հայ ուսանողներուն, եւ աջակցելու բոլոր բնագաւառներուն մէջ մասնագիտացած անձնակազմեր պատրաստելու հարցով:
Նաեւ, նշուեցաւ աշխուժացոնելու երկխօսութիւնն ու գործակցութիւնը, Մ.Ա.Կ.-ի ու այլ միջազգային կազմակերպութիւններէն եւ կառոյցներէն ներս:
Երկու կողմերը հանդէս եկան ահաբեկչութեան դէմ, հաստատելով թէ, անոնք պատրաստ են աշխուժացնելու երկու երկիրներուն միջեւ կապերն ու համագործակցութիւնը, համատեղ պայքարելու ահաբեկչութեան, դրամի «մաքրագործման», թմրոցուցիչներու ապօրինի առուծախին եւ այլ ձեւերու դէմ: Կողմերը պատրաստակամութիւն յայտնեցին համապատասխան ձեւով շարունակելու համագործակցութիւնը՝ ռազմական պատուիրակութիւններու փոխադարձ այցելութիւններու, զինուորականներու պատրաստման, ռազմական օգնութեան ցուցաբերման եւ այլ բնագաւառներէ ներս:

Be the first to comment

Leave a Reply

Your email address will not be published.


*