ԱՊՈՒ ՏԱՊԻԻ ՄԷՋ ՆՈՐԱԿԱՌՈՅՑ ՍՐԲՈՑ ՆԱՀԱՏԱԿԱՑ ԵԿԵՂԵՑՒՈՅ ՕԾՈՒՄ

p10 ard church

Ուրբաթ, Դեկտեմբեր 12-ին, կատարուեցաը օծումը՝ Ապու Տապիի Սրբոց Նահատակաց եկեղեցւոյ, որ ամբողջական համալիր մըն է՝ իր կառատունով ու պարտէզով: Այցելողներուն ուշադրութիւնը կը գրաւեն Հայոց Ցեղասպանութեան նահատակներուն նուիրուած խաչքարը, Սուրբ Մեսրոպ Մաշտոցի արձանը եւ Հայոց Այբուբենը ներկայացնող յուշակոթող մը։
Եկեղեցին կառուցուած է հայկական ոճով: Անոր կից կը գտնուին Ազգային Առաջնորդարանն ու վարժարանը՝ իրենց յարակից սրահներով եւ այլ բաժիններով ու յարմարութիւններով։p10 church2
Սրբոց Նահատակաց եկեղեցւոյ օծումը կատարուեցաւ հանդիսաւոր շուքով՝ նախագահութեամբ Արամ Ա. Կաթողիկոսի, որ այս առթիւ ժամանած էր Արաբական Միացեալ Էմիրութիւններ։ Օրուան պատարագիչն էր Լիբանանի Հայոց Թեմի Առաջնորդ Գերշ. Տ. Շահէ Եպս. Փանոսեան։ Վեհափառ Հայրապետին կողքին արարողութեան իրենց մասնակցութիւնը բերին Թեհրանի Հայոց Թեմի Առաջնորդ Գերշ. Տ. Սեպուհ Արք. Սարգիսեան, Սպահանի Հայոց Թեմի Առաջնորդ Գերշ. Տ. Բաբգէն Եպս. Չարեան, Արաբական Միացեալ Էմիրութիւններու եւ Քաթարի Կաթողիկոսական Փոխանորդ Հոգշ. Տ. Մեսրոպ Վրդ. Սարգիսեան, Մեծի Տանն Կիլիկիոյ Կաթողիկոսութեան Դպրեվանքի տեսուչ Հոգշ. Տ. Թորգոմ Վրդ. Տօնոյեան, Կաթողիկոսարանի Լսատեսողական գրասենեակի պատասխանատու Հոգշ. Տ. Պետրոս Աբղ. Մանուէլեան եւ գաւազանակիր Հոգշ. Տ. Նշան Աբղ. Լախոյեան։
Արարողութեան նաեւ ներկայ էին Արաբական Միացեալ Էմիրութիւններու քրիստոնեայ համայնքներու ներկայացուցիչները, Լիբանանի ու Հայաստանի դեսպանները, այլ գաղութներէ ժամանած ազգայիններ եւ մեծ թիւով հաւատացեալներ։
Եկեղեցւոյ օծումէն անմիջապէս ետք, Վեհափառ Հայրապետը հոգեշունչ պատգամ մը տուաւ ներկայ ժողովուրդին։ Գոհութիւն ու փառք տալէ ետք Աստուծոյ, որ այս հոգեպարար առիթը ընծայած է իրեն՝ կատարելու Ապու Տապիի Սրբոց Նահատակաց եկեղեցւոյ օծումը, Արամ Ա. Կաթողիկոս իր գնահատանքն ու շնորհակալութիւնը յայտնեց Միացեալ Էմիրութեանց օրուան նախագահ Շէյխ Մուհամմէտ Զայէտին՝ անոր ցուցաբերած գործնական աջակցութեան համար։ Նորին Սրբութիւնը նաեւ գնահատեց բարերարներն ու կնքահայրերը, որոնք իրենց նիւթական մասնակցութեամբ սատար հանդիսացան եկեղեցւոյ շինութեան։ p10 church7
Անդրադառնալով եկեղեցւոյ անունին՝ Վեհափառ Հայրապետը ըսաւ. «Մենք Սրբոց Նահատակաց անունով մկրտեցինք այս եկեղեցին, Հայոց Ցեղասպանութեան 100-ամեակի սեմին, որպէս յիշեցում մեր ժողովուրդի զաւակներուն, որ մեր նահատակները իրենց հաւատքով ու կտակով մաս պէտք է կազմեն մեր ամէնօրեայ կեանքին ու պայքարին։ Սրբոց Նահատակաց եկեղեցւոյ օծումը յիշեցում մըն է իւրաքանչիւր հայու ու ողջ հայութեան, թէ մենք պիտի շարունակենք հաւատարիմ մնալ նահատակներու պատգամին՝ արդարութիւն պահանջելով ցեղասպանէն ու աշխարհէն։ Քանի մը ամիսներ առաջ, Տէր Զօրի Սրբոց Նահատակաց եկեղեցին քանդուեցաւ նոյն ցեղասպանին զօրակցութեամբ. թող աշխարհը իմանայ, որ պատմութեան ընթացքին մեր եկեղեցիներն ու վանքերը քանդուեցան, սակայն անոնց փոխարէն մեր ժողովուրդը նորերը կառուցեց։ Այսօր եւս, մենք նոր Սրբոց Նահատակաց եկեղեցի շինեցինք, որովհետեւ մեր ժողովուրդը գիտէ քանդումը շինութեամբ ու մահը կեանքով նուաճել»։
Արամ Ա. Վեհափառ Հայրապետը հանդիպում մը ունեցաւ նաեւ Արաբական Միացեալ էմիրութեանց նախագահ Շէյխ Մուհամմէտ Պըն Զայէտի հետ։
Նշենք թէ, 1998-ին, Շարժայի մէջ կատարուած էր Սուրբ Գրիգոր Լուսաւորիչ եկեղեցւոյ օծումը, ուր անգամ մը եւս Արամ Ա. այցելեց եւ կատարեց Սուրբ եւ Անմահ Պատարագ: Օրուան պատարագիչն էր Սպահանի Հայոց Թեմի Առաջնորդ Գերշ. Տ. Բաբգէն Եպս. Չարեան: Պատարագի ընթացքին Նորին Սրբութիւնը իր Հայրապետական պատգամը ուղղեց ներկայ հաւատացեալներուն:p10 church8
Վեհափառ Հայրապետը անդրադարձաւ եկեղեցւոյ առաքելութեան մեր ժողովուրդի կեանքին մէջ եւ այդ ծիրէն ներս հոգեւորականի կոչումին, իսկ
աւարտին ան կոչ ուղղեց հաւատացեալներուն այս գիտակցութեամբ մասնակից դառնալու եկեղեցւոյ կեանքին՝ զայն նկատելով առանցքը հայ համայնքին:
Արամ Ա. այցելեց Շարժա-Տուպայի Օհաննէսեան Ազգային Վարժարան, ուր աշակերտները մեծ խանդավառութեամբ դիմաւորեցին։ Աւելի քան երկու հարիւր աշակերտութիւն ունեցող յիշեալ վարժարանին բացումը կատարուած էր Վեհափառ Հայրապետին կողմէ տասնութ տարիներ առաջ։
Արամ Ա. Հայրապետը իր հայրական խօսքին մէջ, նախ գնահատեց բոլոր ծնողները, որոնք իրենց զաւակները յանձնած են հայ դպրոցին։ Առանց հայ դպրոցի հայ կեանքը պիտի կորսնցնէ իր հայկական դիմագիծը, ըսաւ Նորին Սրբութիւնը, որ աշակերտներուն ուղղած հարցումներով խանդավառ մթնոլորտ մը ստեղծեց։ Վեհափառ Հայրապետը նաեւ իր գնահատանքի խօսքը ուղղեց դպրոցի տնօրէնութեան, ուսուցչական կազմին ու խնամակալութեան, վեր առնելով անոնց նուիրումը հայակերտումի առաքելութեան։ Ան յատուկ կերպով գնահատեց դպրոցի բարերար Տէր եւ Տիկ. Յարութ Օհաննէսեանը։ Նորին Սրբութիւնը ըսաւ, մօտէն ճանչնալով բարերարը գիտէ, թէ ան որքան սիրով կապուած է հայ դպրոցին։ Ապա, շարունակելով իր խօսքը ըսաւ, թէ Յարութ Օհաննէսեան ո՛չ միայն այս դպրոցը շինեց, այլ նաեւ կը շարունակէ ամէն տարի նիւթական կարեւոր ներդրումով զօրավիգ կանգնիլ դպրոցի կրթական աշխատանքներուն։

Be the first to comment

Leave a Reply

Your email address will not be published.


*