ՄԵԾ ՇՈՒՔՈՎ ՆՇՈՒԵՑԱՒ ՇՈԻՇԻԻ ԱԶԱՏԱԳՐՈՒԹԵԱՆ 22ԱՄԵԱԿԸ

p5 shou  Հայաստանի նախագահի աշխատակազմի հասարակութեան եւ տեղեկատուութեան միջոցներու հետ կապերու վարչութիւնը փոխանցեց, որ աշխատանքային այցելութեամբ Արցախ այցելած Հայաստանի նախագահ Սերժ Սարգսեան մասնակցեցաւ Համաշխարհային Բ. պատերազմի 69ամեակի, Ղարաբաղի բանակի եւ Շուշիի ազատագրման 22րդ տարեդարձին նուիրուած ձեռնարկներուն: Հայաստանի նախագահ Սերժ Սարգսեան եւ Արցախի նախագահ Բակօ Սահակեան Ստեփանակերտի յուշահամալիրին մէջ ծաղկեպսակ եւ ծաղիկներ զետեղեցին Համաշխարհային Բ. պատերազմին ընթացքին զոհուածներու յիշատակը յաւերժացնող յուշարձանին եւ Արցախեան ազատամարտի նահատակներու շիրիմներուն:

Նախագահներ Բակօ Սահակեան եւ Սերժ Սարգսեան նաեւ այցելեցին Շուշի, ուր ծաղկեպսակ եւ ծաղիկներ զետեղեցին յուշարձանի պատուանդանին եւ սպարապետ Վազգէն Սարգսեանի յուշարձանին: Այնուհետեւ նախագահները այցելեցին քաղաքին մէջ կազմակերպուած ցուցահանդէստօնավաճառը:P5 SHOUSHI2

Շուշիի մէջ տեղի ունեցած տօնակատարութեան ընթացքին նախագահ Սահակեան նախագահ Սարգսեանին յանձնեց “Գրիգոր Լուսաւորիչ“ շքանշանը՝ Արցախի Հանրապետութեան մատուցած իր բացառիկ ծառայութիւններուն համար:
Ձեռնարկներուն մասնակցեցան Արցախի Հանրապետութեան երկրորդ նախագահ Արկադի Ղուկասեան, Հայ Առաքելական եկեղեցւոյ Արցախի թեմի առաջնորդ Պարգեւ արք. Մարտիրոսեան, Հայաստանի Ազգային ժողովի նախագահ Գալուստ Սահակեան,Արցախի Հանրապետութեան Ազգային ժողովի նախագահ Աշոտ Ղուլեան, վարչապետ Արա Յարութիւնեան, Արցախի եւ Հայաստանի բարձրաստիճան պաշտօնակատարներ, սփիւռքէն եւ արտերկրէն հիւրեր:
Լեռնային Ղարաբաղի մէջ նշուող մայիսեան եռատօնին առիթով շնորհաւորական ուղերձ յղեց նաեւ Արցախի նախագահ Բակօ Սահակեան, որ ընդգծեց, թէ Մայիս 9ը հայ ժողովուրդի պատմութեան ամէնէն յիշարժան տօներէն մէկն է, որ կը խորհրդանշէ մեր ազգային բնաւորութեան յատուկ հայրենասիրութիւնը եւ խիզախութիւնը, անձնազոհութիւնը եւ սխրանքը, օտարի լուծին դէմ ըմբոստանալու եւ յաղթելու անսասան կամքը եւ վճռականութիւնը: Ըստ Սահակեանի, ասիկա եկած է դարերէն եւ իր վկայութիւնը ստացած է Համաշխարհային Բ. պատերազմի տարիներուն, երբ տարբեր ժողովուրդներու հետ ձեռք ձեռքի մեր հայրերը եւ պապերը կը կռուէին ֆաշական Գերմանիոյ դէմ՝ փրկելով աշխարհը նացիականութեան ճիրաններէն: Նախագահ Սահակեան շեշտեց, որ անոնց հերոսական դասը շարունակեց արդէն նոր սերունդը՝ արցախեան ազատամարտին ընթացքին պաշտպանելով հայրենի հողը եւ կռելով նոր յաղթանակներ: P5 SHOUSHI4
“Պաշտպանութեան բանակի կազմաւորումը եւ Շուշիի ազատագրումը դարձան այն կարեւոր ձեռքբերումները, որոնք հիմք դրին մեր հետագայ բոլոր յաջողութիւններուն համար: Հայաստանի եւ սփիւռքի մեր քոյրերուն եւ եղբայրներուն հետ միասին կարելի եղաւ ոչ միայն յաղթանակ տանիլ մեզի պարտադրուած ծանր ու դաժան պատերազմին ընթացքին, այլեւ կառուցել օրէ օր շէնցող եւ զօրացող երկիր՝ շարունակելով հայրենիքի համար նահատակուած քաջ հայորդիներու կիսատ ձգած գործը եւ յաւերժացնելով անոնց յիշատակը“, իր ուղերձին մէջ յայտնեց Լեռնային Ղարաբաղի Հանրապետութեան նախագահը:
Իր կարգին, Ամենայն Հայոց Գարեգին Բ. կաթողիկոսը շնորհաւորական իր ուղերձին մէջ հայրապետական իր օրհնութիւնը եւ շնորհաւորութիւնները փոխանցեց հայ ժողովուրդին՝ Մայիս 9ի պանծալի յաղթանակներուն առիթով:
Վեհափառ հայրապետը ընդգծեց, որ Մայիս 9ը մարդոց եւ ազգերու խաղաղ ու ազատ ապրելու աստուածաշնորհ իրաւունքի եւ հայրենիքի պաշտպանութեան նուիրական խորհուրդ ունի մեզի համար: Գարեգին Բ. կաթողիկոսը նշեց, որ աշխարհասփիւռ հայերը Համաշխարհային Բ. պատերազմի ընթացքին բոլոր ռազմաճակատներուն հերոսական մասնակցութիւն ունեցած են բռնութեան դէմ պայքարին եւ յաղթանակի ձեռքբերման գործին մէջ: “Հայրենասէր եւ քաջարի նոյն ոգիով հայորդիք ազատագրեցին Շուշին՝ մեծ յաղթութեամբ պսակելով արցախեան ազատամարտը: Լի ենք հաւատքով՝ Աստուծոյ զօրակցութեամբ յաղթանակով պիտի պսակուի նաեւ արցախահայութեան ազատ ու անկախ ապրելու արդար իրաւունքը“, ընդգծեց վեհափառ հայրապետը:
Շուշիի մէջ, տօնակատարութեան ընթացքին նախագահ Սահակեան նախագահ Սարգսեանին յանձնեց “Գրիգոր Լուսաւորիչ“ շքանշանը՝ Արցախի Հանրապետութեան մատուցած իր բացառիկ ծառայութիւններուն համար
Նախագահ Սերժ Սարգսեան նշեց, որ Համաշխարհային Բ. պատերազմի տարիներուն հարիւր հազարաւոր հայեր կռուեցան արդարութեան եւ ազատութեան խրամատներուն մէջ՝ բարձր պահելով հայ ռազմիկի անունը եւ պատիւը: Հանրապետութեան նախագահը ընդգծեց, որ ասիկա հայութեան համար նախ եւ առաջ խաղաղութեան տօն է, որ արդար աշխատանքի եւ հայրենի երկիրը ոտքի կանգնեցնելու պատմական կարելիութիւն տուաւ: “Ճակատագիրը մեզի համար սահմանած էր այլ պատմական կարելիութիւն մը եւս, մայիսեան այլ յաղթանակ մը եւս: Մայիս 9, 1992ին մենք կրկին արդարութեան եւ ազատութեան խրամատին մէջ էինք ընդդէմ ազգային խտրականութեան եւ եղեռնագործութեան: Շուշիի ազատագրումով ֆիզիքական բնաջնջումէն փրկուեցաւ ոչ միայն Ստեփանակերտը, այլեւ ամբողջ Արցախը, իսկ աւելի լայն առումով՝ Հայաստանը եւ հայութեան հեռանկարը: Այսօր մենք երախտագիտութեան գլուխ կը խոնարհենք մեր բոլոր այն քաջերուն յիշատակին առջեւ, որոնք կեանքով վճարեցին մեր խաղաղութեան գինը: Կեցցէ՛ խաղաղութիւնը, որ աշխարհի բոլոր բարիքներուն մայրն է: Փա՛ռք մեր հերոսներուն“, կը յայտնէ Հայաստանի նախագահը իր ուղերձին մէջ:

Be the first to comment

Leave a Reply

Your email address will not be published.


*