ԳԱԼԻՖՈՐՆԻՈՅ ԽՈՐՀՐԴԱՐԱՆԸ ՃԱՆՉՑԱՒ ԱՐՑԱԽԻ ԱՆԿԱԽՈՒԹԻՒՆԸ

0 0
Read Time:2 Minute, 12 Second

 california-resolution ՍԱՔՐԱՄԵՆԹՕ.- Գալիֆորնիոյ նահանգային խորհրդարանը Հինգշաբթի, Մայիս 8-ին, պատմակշիռ քայլ մը առաւ Արցախի անկախութեան միջազգային ճանաչման ուղղութեամբ՝ 70 թեր եւ 1 դէմ քուէով վաւերացնելով Արցախի Հանրապետութեան ժողովուրդի ինքնորոշման իրաւունքը ճանչցող AJR-32 բանաձեւը:

Գալիֆորնիոյ օրէնսդիր մարմինը նաեւ որոշեց իր բանաձեւը յղել Ամերիկայի Միացեալ Նահանգներու Քոնկրէսին եւ նախագահին՝ դիմելով անոնց, որ իրենց կարգին նպաստեն Արցախի ժողովուրդի ինքնորոշման իրաւունքի ճանաչման:

Բանաձեւի քննարկման ընթացքին խօսք առին անդամներ Մայք Կաթօ, Թիմ Տանըլի, Սքաթ Ուիլք, Իըն Քալտերոն, Քաչօ Աշաճեան եւ Շերըլ Պրաուն:

«Այսօրուան ջախջախիչ մեծամասնութիւնը շահած այս քուէարկութեամբ, Քալիֆորնիոյ նահանգային խորհրդարանը պաշտօնապէս կը կանգնի Լեռնային Ղարաբաղի ժողովուրդին կողքին եւ կը վերահաստատէ իր անտեղիտալի յանձնառութիւնը՝ բոլոր ժողովուրդներու ազատութեան եւ ինքնորոշման իրաւունքին հանդէպ», յայտարարեց Քալիֆորնիոյ նահանգային խորհրդարանի նախագահ Ճան Փերէս:

«Այսօրուան պատմական քուէարկութիւնը ցոյց կու տայ, թէ այս օրէնսդիր մարմինը կամքը ունի իրականութիւնը ճանչնալու, հակառակ այդ քայլին դէմ դրուած լուրջ արգելքներուն: Կը դրուատեմ պաշտօնակիցներս, որոնք որոշեցին նեցուկ կանգնիլ իրականութեան, ազատութեան եւ ժողովրդավարութեան: Արցախի ժողովուրդին կողքին կանգնելու այս քայլը շատ բան ունի ըսելիք՝ ինքնորոշման իրաւունքին տիրանալու եւ անկախ պետութիւն մը դառնալու ճամբուն վրայ արցախցիներուն առած կարեւոր քայլերուն մասին», ըսաւ խորհրդարանի անդամ Ատրին Նազարեան:

 Իր կարգին, բանաձեւի համահեղինակ Քաչօ Աշաճեան յայտարարեց. «Այս բանաձեւը յատկանշական քայլ մըն է Արցախի Հանրապետութեան անկախ պետութիւն ըլլալու հանգամանքը ճանչնալու արշաւին մէջ: Կ՛ուզեմ շնորհակալութիւն յայտնել յատկապէս պաշտօնակիցիս՝ խորհրդարանի անդամ Մայք Կաթոյին, որ այս հարցը խորհրդարանին մէջ քննարկման նիւթ դարձուց: Հպարտ եմ, որ Գալիֆորնիոյ նահանգը Արցախի Հանրապետութեան անկախութեան եւ ազատութեան նեցուկ կանգնելու սոյն քայլը որդեգրեց»:

 

 

 

 Հ.Յ.Դ. Արեւմտեան Ամերիկայի 

Կեդրոնական Կոմիտէի Յայտարարութիւնը

 

Հայաստանէն դուրս մեծագոյն թիւով հայ բնակչութիւն ունեցող Գալիֆորնիա նահանգի խորհրդարանը (Assembly) Հինգշաբթի, Մայիս 8-ին, ջախջախիչ մեծամասնութեամբ պատմական քայլ մը առաւ՝ որդեգրելով Արցախի Հանրապետութեան անկախութիւնը ճանչցող բանաձեւ մը:

Հայ Յեղափոխական Դաշնակցութեան Արեւմտեան Ամերիկայի Կեդրոնական կոմիտէն կ՛ողջունէ այս խիզախ քայլը, որ վկայութիւնն է ամերիկահայութեան տքնաջան աշխատանքին, ինչպէս նաեւ Գալիֆորնիա նահանգի հանրային պաշտօնատարներուն ցուցաբերած յարգանքին՝ հանդէպ բոլոր ժողովուրդներու, այս պարագային նաեւ՝ Արցախի ժողովուրդի ինքնորոշման իրաւունքին:

Այս քուէարկութիւնը մեծապէս կ՛ամրապնդէ հայ ժողովուրդի ոգին՝ իր արդար տենչանքները հետապնդելու ճանապարհին, ինչպէս նաեւ կը շեշտէ Լեռնային Ղարաբաղի ժողովուրդին շղթայազերծած սեփական ճակատագիրին տէր ըլլալու, ինքնակառավարման ժողովրդավարական համակարգ մը ստեղծելու եւ այդ ճամբով իր գոյութեան սպառնացող վտանգները դիմագրաւելու պայքարին կարեւորութիւնը:

Առաւել գնահատելի կը գտնենք այն իրողութիւնը, որ Քալիֆորնիոյ օրէնսդիր մարմինը ազատութեան եւ ինքնորոշման սկզբունքները ամրապնդող իր այս քաջարի քայլը առաւ՝ ի հեճուկս ատրպէյճանական ուժեղ ճնշումներուն: Գնահատելով Նահանգային օրէնսդիր մարմինին մէջ այս բանաձեւին կողմ քուէարկած իւրաքանչիւր էսամպլիմէնի քայլը՝ կ՛ուզենք առանձին գնահատանք արձանագրել հանդէպ այդ մարմինի անդամներ Մայք Կաթոյի, Ատրին Նազարեանի, Քաչօ Աշաճեանի եւ Խորհրդարանի նախագահ Ճան Փերի, որոնք ղեկավարեցին այս դրական արդիւնքը ապահոված ճիգերը՝ հարազատօրէն ներկայացնելով իրենց ընտրատարածքի բնակչութեան շահերը:

Սոյն բանաձեւին որդեգրումը վճռական յաղթանակ մըն է հայ ժողովուրդին, Արցախի բնակչութեան եւ յանուն ինքնորոշման իրաւունքի պայքար տանող բոլոր ժողովուրդներուն համար:

 

Հ.Յ.Դ. ԱՐԵՒՄՏԵԱՆ ԱՄԵՐԻԿԱՅԻ 

ԿԵԴՐՈՆԱԿԱՆ ԿՈՄԻՏԷ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՄԵՐ ՇԱՏ ՍԻՐԵԼԻ ՀԱՅՐ ՌԱՓԱՅԷԼԻՆ.- ՅԵՏ ՎԱԽՃԱՆՄԱՆ ՀՐԱԺԵՇՏԻ ԳԱԶԵԼ
Next post ՆՈՐ ՀՐԱՏԱՐԱԿՈՒԹԻՒՆ ՄԸ՝ «ԻՏԱԼԻՈՅ ՀԱՅ ԻՐԱԿԱՆՈՒԹԻՒՆԸ» (1915-2000)

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles