ԿԱՑՈՒԹԻՒՆԸ ՔԵՍԱՊԻ ՇՐՋԱՆԷՆ ՆԵՐՍ

0 0
Read Time:3 Minute, 29 Second

Kesab-events01  Մարտ 21-էն ի վեր, կացութիւնը պայթուցիկ է Քեսապի շրջանէն ներս: Այս գծով, Բերիոյ թեմի մամլոյ գրասենեակէն մանրամասնօրէն կը տեղեկանանք թէ, այդ օր վաղ առաւօտեան` ժամը 5:45-ին, Թուրքիոյ սահմանէն թափանցած, ծայրայեղական խմբաւորումներ իրենց արձակազէններու եւ թրքական բանակի հրթիռարձակումներու օժանդակութեամբ գրաւած են շրջանի Կասիոս լերան բարձունքին վրայ գտնուող սուրիական ամէնամօտիկ ոստիկանատունը, որ թրքական զօրանոցին դէմ կը գտնուի: Անցնող երկու տարուան մէջ, այդ շրջանէն թափանցման ոչ մէկ փորձ պատահած էր:  

Հոն վիրաւորուեցաւ ոստիկանապետն ու սպանուեցան շարք մը ոստիկաններ, ապա զինեալները թափանցեցին Սեւ Աղբիւր գիւղ եւ գրաւեցին երկու ոստիկանատուներն ու բարձրադիր տուներու վրայ զետեղեցին իրենց արձակազէններն ու սկսան կրակել խաղաղ բնակչութեան վրայ: Մինչեւ առաւօտեան ժամը 7:30, արդէն մեծաթիւ հրթիռներ պայթեցան Քեսապի մէջ: Ապա զինեալները յարձակեցան Լեղի Ջուր շրջանի եւ մաքսատան վրայ:kessab events2

Լեղի ջուր կոչուած շրջանն ու 45-րդ կէտը Քեսապի մէջ կարեւոր դիրքեր են: Լեղի ջուրէն մինչեւ Գալատուրանի ծով 25 քլմ․(15 մղոն) սահմանագիծ կ՛երկարի Թուրքիոյ հետ:

Սահմանագծին վրայ, սուրիական երեք ոստիկանատուններ կան, ներառեալ մաքսատունը` շուրջ հարիւր ոստիկաններով միայն:

1952-53 թուականներէն Սուրիոյ եւ Թուրքիոյ մէջ  համաձայնութիւն  գոյութիւն ունի, ըստ որուն սուրիական կողմը` միայն ոստիկանատուներով, թրքական կողմին հետ համատեղ պիտի պաշտպանէ Սուրիա-Թուրքիա սահմանը եւ ծանր հռետանի մը  5 քլմ․ հեռու պիտի մնայ սահմանէն: Այս պատճառով ալ սուրիական բանակը ներկայութիւն չէր այդ շրջանին մէջ: Թուրքիան եւս նշեալ պայմանագրով յանձնառու կ՛ըլլար հսկել սահմանն ու թոյլ չտալ զինեալ անօրինական թափանցումներուն: Սակայն Թուրքիան խախտեց արդէն նշեալ համաձայնագրի պայմանները:

Լեղի Ջուրի եւ Կասիոսի բարձունքին վրայ թրքական կողմը ունի հսկայ հրթիռներու եւ ռատարներու կայան, որոնց մօտէն անցան զինեալներն ու թափանցեցին Քեսապ:

Տեղւոյն համայնքի պատասխանատուները հայ բնակչութիւնը հաւաքեցին Էքիզօլուխի բարձունքին վրայ, ապահովական անցարգելին մօտ եւ հանգրուանաբար անոնց ուղարկեցին աւելի ապահով վայրեր` Պասիթ եւ Լաթաքիա:

Մինչ այդ Սուրիոյ բանակը հասաւ օժանդակելու եւ պաշտպանելու Քեսապը:

Սուրիական բանակը մինչեւ իրիկուն բաւական վնասազերծեց շրջանն ու դուրս մղեց զինեալները, եւ վերստին պաշարեց Սեւ Աղբիւրի եւ Քէմմէյի ոստիկանատուները, զինեալներ սկսան տեղի տալ: Մարտ 22-ին բախումները կրկին սաստկացան: Զինեալ խմբաւորումներ կրկին յարձակեցան այս անգամ թրքական օժանդակութեամբ, այս իրողութիւնը “Ճապհաթ Ալ-Նուսրա“, “Շամ ալ-Իսլամ“ եւ “Անսար ալ-Շամ“ արմատական ծայրայեղ շարժումնրը իրենց կայքերուն վրայ հաստատած են, նշելով  թէ եօթ ամիսէ ի վեր կը պատրաստուին այս օրուան` թրքական կողմէն խուժելու համար այս շրջանները:kessab1

Քեսապի բնակչութեան 90 տոկոսը հեռացաւ շրջանէն: Գալատուրանտ եւ Քեսապի մէջ մնացած էին 10-15 ընտանիք, որոնք իրենց կարգին լքեցին իրենց բնակարաններն ու հաստատուեցան Լաթաքիա:

Քեսապ մնացին որոշ թիւով տարեցներ, որոնք չուզեցին լքել իրենց բնակարանները: Զինեալները, Կիրակի Մարտ 23-ին գրաւեցին Քեսապը, պատանդ վերցուցին այնտեղ մնացած հայերու, պղծեցին երեք հայկական եկեղեցիները, սկսան կողոպտել բնակարանները: Ահաբեկիչները թափանցած էին Էքիւզօլուխի հարաւը, դաշտային բաժինը եւ Տիւզաղաճ գիւղը: Բանակը հակայարձակումի չէ անցած տակաւին եւ կը սպասէ յաւելեալ ուժերու: Միւս կողմէ, ծանր մարտեր կ՛ընթանան Խրթպէթ Սըլաս եւ Պէյթ Ֆարէս շրջաններուն մէջ, ուրկէ ահաբեկիչ զինեալները կը փորձեն մտնել Պելան գիւղը:

Եթէ թրքական միջամտութիւնը չըլլար բանակը արդէն ետ մղած կ՛ըլլար ներխուժողները: Զինեալները տեղացիներու վկայութեամբ, թրքական միջամտութեան շնորհիւ կրցան կրկին յառաջխաղացք արձանագրել: Քեսապի բնակչութիւնը այս դրութեամբ հաւաքուած է Լաթաքիոյ դպրոցին ու եկեղեցւոյ մէջ: Շուրջ 670 հայ ընտանիք (90% բնիկ քեսապցի), որոնք Քեսապ եկած էին ժամանակաւորապէս Եագուպիէէն, Րաքքայէն եւ Հալէպէն այժմ կը գտնուին Լաթաքիա:

Միջազգային պաշտօնական աղբիւրները այսօր կը հաստատեն թրքական կողմին ուղղակի դերակատարութիւնը Քեսապի վրայ գործուած ներխուժման: Քեսապ ներխուժումը նորագոյն փաստն է սուրիական պատերազմին մէջ Թուրքիոյ  ունեցած դերակատարութեան: Թուրքիան քաղաքական սեփական ծրագիր կը մշակէ հակահայ գործունէութիւն ծաւալելու:kessab2

Նշենք թէ Հ.Յ.Դ. Բիւրոյի Հայ Դատի Կեդրոնական խորհուրդը հաղորդագրութիւն մը հրատարակած էր, Մարտ 23-ին, յայտնելով.-

Կը դատապարտենք Քեսապի վրայ, Թուրքիոյ ճամբով, վերջին օրերուն կատարուած յարձակողական գործողութիւնները:

Ամիսներէ ի վեր, մենք կը զգուշացնէինք միջազգային համայնքը, թէ Սուրիոյ մէջ կռուող այս օտար ծայրայեղական կռուողներ կը ներկայացնեն մեծագոյն վտանգը Սուրիոյ մէջ քրիստոնեայ փոքրամասնութեան համար: Հայաբնակ Քեսապ աւանի եւ շրջակայ գիւղերուն վրայ այս դաժան եւ չհրահրուած յարձակումներով նորագոյն օրինակն են այդ բռնութէան, որ գործօն կերպով կը քաջալերուի դրացի Թուրքիոյ կողմէ:

Կոչ կ՛ուղղենք բոլոր պետութիւններուն, որոնք ազդեցութիւն ունին Սուրիոյ հակամարտութէան մէջ, գործածելու իրենց տրամադրելի բոլոր միջոցները` Քեսապի խաղաղ բնակչութեան դէմ այս յարձակումներուն վերջ դնելու եւ թոյլ տալու անոնց` ապահով եւ անվտանգ վերադառնալու իրենց տուները:

Վերջին հարիւր տարուան մէջ, այս երրորդ անգամն է, որ հայութեան կը պարտադրուի հեռանալ Քեսապէն. երեք պարագաներուն ալ` Թուրքիան կամ եարձակողն է եւ կամ` յարձակողներուն աջակցողը:

Միաժամանակ, անհրաժեշտ է, որ միջազգային համայնքը զսպէ Թուրքիան, որպէսզի ան դադրեցնէ իր հակահայ այս եւ նման գործողութիւնները, եւ ընդհանրապէս Հայաստանի ու հայութեան դէմ իր թշնամական քաղաքականութիւնը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՄԵԾԻ ՏԱՆՆ ԿԻԼԻԿԻՈՅ ԱՐԱՄ Ա. ԿԱԹՈՂԻԿՈՍԸ ԿԸ ԶՕՐԱԿՑԻ ՔԵՍԱՊԻ ՀԱՅՈՒԹԵԱՆ
Next post Հ.Օ.Մ.-Ը 125 ՀԱԶԱՐ ՏՈԼԱՐ ԿԸ ՏՐԱՄԱԴՐԷ ՍՈՒՐԻԱՀԱՅՈՒԹԵԱՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles